Firifai

FIRIFAI GOI OROUBAIRO OWAOWA

¹Na Foru, Dimodini naini uwae Yesu Kerisonu waiya ukeka miyai. Uwama yewa owaowa yanake odaisu. Yesu Kerisonu wake naukaisa orouini sosi uwara yawokeka dai orouini dikoni orouini ya Firifai goiro Godinu wake naukaisa orouini ya yaisinabairo yewa owaowa yanake odaisaisua eawe.

²Iyanu Babae Godini iyanu Dai Waria Mi Yesu Kerisoini Emuama ya unu kofisike emenu irau ukeka sineka yabairo mafisiro me irauaiai ibifone ibake weakune.

Foruma Godibairo we ma irauaiai ui wake

³Nama yabake imukadae Godibairo we ma irauaiai ukakune. ^4-5Ya Firifai goi orou yama Godinu wake nauisa. I nauisa furoma ewa ewa uke aarebe awoena nanu odoro naini Godinu wake demuiro weibaisi ibake nae imukama rooro ukakuneke Godibairo guriguri ukaada we ma irauaiai ukakune. ⁶Na iwoka, Godima yanu imuka ubarenaro kawama waiya ukeibi i ari eno enaenari ukeebe Yesu Kerisonu owere fafeku odoro idua uke me sifeku. ⁷Godima yaini naini iya unu koreibi ibake yaini naini Godinu wake demuiro yawokada weaisi. Nae ana ebaro ibine danu ubiye nama adinaro Godinu wake we eneiareibisararo yama nauisake yanu imuka yaisina Yesu Kerisobairo odeibisa ibake nae yabake imukari ukaada imukenewaa ukakunia ibake weakune. ⁸Godi Dawa ibai iwoka, Yesu Kerisoma iyabake imukari ukakuni i ari eno naini yabake imukari ukenewaa ukakunia.

⁹Ya Firifai goi orou yama Godinu imukeka imukenewaa ufoke uke iwoka uforo yanu moi oroubake imukari ukeka daiwere ufone ibake Godibairo guriguri ukakune. ¹⁰Yama eno ufoisaie i irauaiai imukekaini nono i merama ukeka imukaini imuke giena ukaada ideie meramaro nono yewadeie irauaiaiya eno wefoke we ma irauaiai mane uforo yanu imuka amearubu ibifiro Yesu Kerisonu owere fafeku odoro emema yabake wayai da wefisane ibake weakune. ¹¹Nanu ararae yabairo Yesu Kerisonu irau ukeka ibifiro enaenari mane uforo emema efisake Godi we ma irauaiai ufisane ibake Godibairo guriguri ukakune.

Foruma ana ebaro ibi ima Godinu wake daiwere ui

¹²Nanu naiyemuku, yewa wake nauawe. Na ana ebaro odekaini aneme aneme nabairo ukekaini ibaima na unu korakunararo Yesu Kerisonu irau wake wenewaa ukakune. ¹³Nae eno ukakune ibake i gaemani orounu dai uwara yawokaisa meremere orouini eme yaisina emuama nabake dawae Yesu Kerisonu wake naukeka mi ibake ana ebaro ibinua eno iwoka sinaisa. ¹⁴Nae ana ebaro ibinero Godinu wake naukaisa moi orouma nanu ukeka sineka eraada ana ebaro aneka ibaibake ia sine dakaisake Yesu Keriso imukenewaa ukaada Godinu wake wenewaa ukaisa.

¹⁵Moi orou emuae emenu arara waiya ufisane ibake naini dino ukaada ibake Yesu Kerisonu wake weaisaroma nono moi orouma Yesu Keriso imukada Danu wake weaisa. ^16-17I dubuenaro Godinu wake weaisa oroue emua iwoka, nae Yesu Kerisonu wake yawokada we ibake ana ebaro odiakaro ibine. Ibaie emua iwoka sinaisake nabake imukari ukaada ibake Yesu Kerisonu wake weaisa. Nono i bokairo wene i Godinu wake weaisa orou emuae emenu onarou mane imukada na inimuwere mafokoro nama ana ebaro ibaada imuka merama umane ibake Yesu Kerisonu wake weaisa. ¹⁸Enoroma na aneaneme wemau? I orou yaisina emenu imukeka irauaiaiba me ie idua. Emua yaisinae Yesu Kerisonu wake weaisa ibake imukama rooro ukakune.

Na wirokekaro ibimauie Yesu Kerisoini demuiro ibifukua wei wake

¹⁹Na iwoka, yama Godibairo guriguri ukeiforo Godinu Imumu Irauma na unu koreifaraku ibake yewabai yaisina irauaiai ufiro ana ebaroma odaifokaisaro me nauwaro famau. ²⁰Nae Godi imukenewaa ukakuneba ibake na arara me aneme merama ukeroma maru ukeka. Nanu awoena ibine enaenari ibimauba ba feamau aribaie emema ibai eraada Yesu Kerisonu ibi we ma daiwere ufisane ibake weakune. ²¹Nae eno we imukakune, nanu awoena ibineie Yesu Kerisoini demuiro ibinisu. Nono nanu dubuenaro feamauie nono nanu awoena ibine ibai ma beremauke irauaiai ibimau. ²²Na yewa dooro ibimauie Godinu wake emebairo weimauro naukada Godinu wake naukeka orou sifeisa. Ibake aneaneme we imumau? I me ibeimauba ba feamau ari na iwoka me. ²³I imukeka raarayaima nanu imukeka ma owefisine ukaisi. Enoba nanu ararae Yesubairo aneka. Ie irauaiai. ²⁴Nono na yewa orofaro ibimauie ya unu komiauro yanu Godi imukeka imuka irauaiai imufoisa. ²⁵Enoba na iwoka, nama yewado ibimauke ya unu komiauro yanu Godi imukeka imuka ara sifekuro yama ibai iwoka sinaada rooro ufoisa. ²⁶Nae yewado ibaada yabairo yadai famauie Yesu Kerisoma na irauaiai yawokeifaraku ibaibake yama Godibairo we ma irauaiai ufoisa.

I Firifai goi orou Foruini enafisake urafisane wei wake

^27-28Yae Yesu Kerisonu wake naukeka oroua irau ukeka sineka mane ukenewaa uawe. Yabairo famauba me ariba yanu irau ukeka sineka wake mane naumau. Ibake nanu ararae ya orouma Godinu wake naukada daaba demuiro enare ara ufoke daaba demuiro imufoke Godinu wake weforo moi orouma yaini wasai ufeisaie ia da sifone weakune. Yama ia da sifoisaie i yaini wasai ukaisa orouma ibai eraada i feare dakaku inaaro anifeisaro Godima ya ma wirofiakubai emua iwoka sifeisa. ²⁹Godinu imukekae eno imukaku, Godima Danu arararo eno uiba ibake yama Yesu Keriso imukaisake Danu waiya ukaisaro nono Yesu Kerisonu ibibake awe waa yabairo fafekua Godima eno imukaku. ³⁰Yaini naini iyama seidanini uranaisi. Yae nanu adinaro uraneibisara wake nauisake adinaro nanu uraneka ibai yama ereibisake nono awoena uwama seidanini uranaisu wake naukaisa enaenari yaini naini iyama kowede seidanini uranaisi.

Iyanu onarou ma okoanaku ufeke naiyemukubake ure nuda ufene wei wake

¹Yae Yesu Kerisobairo ibaadae buna daiwere ukaisaba me? Yesu Kerisoma yabake imukari daiwere ukaada yanu imuka ma irau ukakunero me irauaiai ibinisaba me? Godinu wake naukaisa orouini yaini Godinu Imumu Irauini demuiro ibinisaba me? Yanu yanu imukari uke makanaisaba me? ²Yama i ari eno uke makaneifoisabaie yanu yanu imukari uke makaeweke demui daaba mane imuaweke Godinu waiya demuiro uawero ibaibake na rooro daiwere uma. ³Yanu onarou manebake da imuaweke yanu ibi da we ma daiwere uawe. Yanu onarounu ibi we ma okoanaku uaweke nono moi orou emenu ibi we ma daiwere uawe. ⁴Yanu ukeka sineka manebake da imuaweke moi orou aneaneme unu kofiakaisa ibai imukada emenu ukeka sinekaini imuawe.

Keriso Danu mane ma okoanaku uiro nono Godima Dawa ma daiwere ui wake

^5-7Yesu Keriso imuke eaweke nono Danu ukeka sineka ari uke eawe. Dawae Godi. Nono Danu Godinu ukeka sineka yabakenewaa dauike Danu bunaini danu arakekaini i eka medike eme yaisinanu waiya ukeka mi sinaada ba eme sini. ⁸Dawae ba eme sini ibake Dawae Danu onami ma okoanaku uike Godinu arara uike feari. Dawae i korosiro feareka inimu munike feari. ^9-11Eno ui ibake Godima Dawa fearekaroma ma uyarike urero odike i orounu ibi ibi yaisinabairoma Danu ibi mane ma daiwere ui. Enoba aina ainama Yesu Kerisonu ibi naufisake ifoma Danu ibooro kodudu yanafisane ibake eno ui. I urero ibeka orouini dooro ibeka orouini doo wowonaro ibeka orouini emua yaisina ifoma danu ibooro kodudu yanafeisa. Eme yaisina emua emenu bebekuma eno wefeisa, Yesu Keriso dawae iyanu Dai Waria Miya eno wefeisake iyanu Babae Godinu ibi we ma irauaiai ufeisa.

Iya yaisina edoro ari sifeke eme yaisinabairo ibifene wei wake

¹²Naiyemuku, nanu moi owaowaro wake yewadoya eawe. Nama yabairo ibaada aneme weibisara ibai naukada enaenari ukeibisa. Nono awoenae na yabairo ibe dakakuneba ibake yama ena adinaro aneaneme ukeibisa enaenari mane ukenewaa uawe. Godima i wirokeka ya marieba ibake Godi mane iifa daiwere uaweke i wirokeka waiya ukenewaa uawero yanu wirokeka irauaiai sifi. ¹³Godi Dawa yabairo ibaada Danu arara ukaada Dawa imufoke Danu waiya ufone ibake ya aine wai ure unu korakune.

¹⁴Aneme aneme ufoisaie kamena da weaweke urane rarane da uawe. ^15-16Eno ufoisaie emema yabake wayai da wefeisaro irauaiai mane ibifoisa. Yae Godinu amaraku. Enoba yae i meramawere ukeka imuka imukaisa orounu dumuwere imukeka ari imuka da imuawe. Ramefa edoro ukeibaku i ari eno emuabairo yama edoro uaweke Godinu wake emuabairo weawe. Eno ufoisaro Yesu Kerisoma fafekuie nama yabairo ukeibisara i irauaiai waiyabake rooro umau.

^17-18Yanu Godinu wake naukekae Godibairo ofereni ode sibore sianeka i ari odakune ibake na ma feafokaisaie idua rooro umau. Nae awoena yaini rooro ukakune. Enaenari yama awoena naini nanu feamau ibaibake rooro uawe.

Dimodinu wake

¹⁹Yesu Keriso Danu arara ufekuie nama Dimodi we odaimauro yabairo aafeku. Dawae yabairo aafekuke iro ibeebe owefekuke nabairo fare yanu aneaneme ibinisa wake wefekuro na naumake rooro umane ibake weakune. ^20-21Dimodi dawae yabake imukenewaa ukakune. Nono i moi orouma Yesu Kerisonu waiya imuke dakaisake emenu ukeka sineka mane imukenewaa ukaada emenu onarou mane yawokeibaisa. ²²Nono Dimodi dawae ya iwoka. Dawae nanu ba amara ubi ari eno. Dawaini naini uwama Godinu wake demuiro we enereibaisu. ²³Yewa ana ebaro na yawokakuneka orouma aneaneme nabairo ufeisaro na iwoka simauie Dimodi we odaimauro yabairo aafekua eno we imukakune. ²⁴Na iwoka, Yesu Kerisoma nanu daaba ukakuba ibake naini yabairo sabu aamau.

Efafadaidusinu wake

²⁵Nono awoenae na eno we imukakune, yama Efafadaidusi we odaisaro fo weeka mi sinike nabairo fare ibaada na unu korebe nono awoena naini waiya demuiro ukaku. Dawaini naini uwae Yesu Kerisonu meremere miyai ari eno. Nama dawa ma owemake we odaimaro yabairo aafine eno we imukakune. ²⁶Dawae danu goi orou ane efiane ibake imukari ukaku. Dawae arama uiro i wake yama nauisaro dawae yanu Godi imukekabake imukari ukaada danu goiro anifine ukaku. ²⁷Dawae arama daiwere uike feafine ukeibiro Godima dawabake imukari daiwere ukaada ma wiroi. Godima dawaini naini uwabake imukari ui. Nae imuka inimu ukeka keuwere waure ibake dawa ma wiroi. ²⁸Enoba nanu arara daiwere dawa yabairo aareka. Dawa aafiro yabairo yama dawa efoisake rooro ufoisaie nanu yabake imuka inimu ukeka idua me sifeku. ^29-30Dawa yabairo fafekuie yama Yesunu ibiro dawabake arie daiwere weawe. Dawae Yesu Kerisonu waiya ukaada yama nabairo ibe meba ibake yanu orofa munike na unu kori. Eno ukaada arama uike feafine uiba ibake dawa yabairo fafiro rooro ukaada i mi munenewaa ufone ibake yewa wake yabairo weakune.

Ainama Yesu Keriso imukakuie Dawae gienabu ukeka miya wei wake

¹Nanu naiyemuku, nanu moi wakenaku yewadoya eawe. Yesu Keriso me irauaiai imukada rooro uawe. Yabake eno weebe koroko da sifarakuro yama ibai naukada imuka irauaiai sifoisa. ²I meramawere oroue nauwaro waa kua ari eno. Emuae eno meo weaisa, ya wirofone wefoisaie yanu ofe kuuawe weaisaya emenu wake da nauawe. ³Iya iyanu ofe kuufeisiie Godinu amaraku da sifeisi. Iyama Godi imukeka imuka mane imukenewaa ufeisi i deima idua irau. Eno ufeisiie i ba ofe kuureka ari ufeisi. Yesu Kerisoma iya ma wiro’iba ibake ibai imukada rooro ukaisike nono iyanu ofenu arara ukekabake imuke dakaisi. ⁴I Du orouma emenu ofe kuurekabake imukaisa. Nono nae ba Du mi. I Du orouma emenu ofe kuurekabairo wirofeisaie naini iini enaenari umau. Eno weroma nono iyama eno da ufeisi. ⁵Nanu amaema na dokararo odo eida (8) me siniro nanu ofe kuuka. Nanu amae babaeye Isaraera ayaka. Emuae Bedimaninu sisia sirorari orou. Enoba nae ba Du mi. Nae Ferosi mi sineke Mosesinu darawadu yaisina ukenewaa ukeibisara. ⁶Adinaro nama Mosesinu darawadu imukeibisaraba ibake Godinu wake naukeibisa oroubairo nama merama daiwere uke yareibisara. Eno uke yareibisarake nono i Du orounu darawadu yaisina ukenewaa ukeibisaraba ibake i Du orounu ukeka sinekabake nabairo merama ibe me. ⁷Nono awoenae nanu adina imukeka ari eno me, eno we imukakuneke nono nanu arara Yesu Keriso imumane ibake nanu adina ukeibisara merama imuke mede. ⁸Nae Yesu Keriso imue ibake ima nanu adina merama imukekaini ukeka sinekaini i yaisina ma berekakuba ibake nae Yesu Keriso imumane ibake i Nanu adinaro ukeka sineka yaisina me sara kekeu ariya eno we imukakune. ⁹Ibake Mosesinu darawaduma na ma irauaiai uke dakararoma nono Yesu Kerisoma na ma irauaiai ukeka bouro ibake Dawabairo ibine. Godi Danu ararae eme yaisina Yesu Keriso imukeka, i imukaini gienabu ukekae Godibairoma fari. ^10-11Enoba nanu ararae Yesu Keriso iwokabu simake Danu feareroma uyareka buna iwoka umake enaenari feamake nono uyamane ibake Yesubairo dakaa uke ibaada Danu wauri oferi enaenari waurada i adina merama imukeka medakune. Nanu ararae Danu fearike uyari enaenari nae feamake uyamane ibake weakune.

Foru dawa durame bokairo fafine ui wake

¹²Nae gienabu meba i wenebai yaisina uke da unekema nono nanu ararae i wenebai yaisina umau. Adinaro Yesu Kerisoma na we mune odikaraba ibake Dawa ari eno simane weakune. ^13-14Nanu naiyemuku, nae awoena gienabu meke Dawa ari eno me. Eno meroma nono i adina ukeka sineka yaisina medakuneke i awoena Yesu Kerisonu daabaro bunama imusu ari uke anaada i gienabu ibeka mumane ukakune. I awoena Yesu Kerisonu daabaro bunama imusu ari uke durame anakuneba I Godima iyabake Yesu Kerisobairo we bou ui i moko mumane duramakuneba ane urero famauie i moko idua mumau.

¹⁵Ya Godinu wake naukenewaa ukaisa orouma na imukakune enaenari imukeifone ibake yewa wake weakune. Nono moi imusu imufoisake Godinu ba wake naukenewaa ufoisaie Godima ya we ma iwoka ufiakuro ibai yaisina iwoka sifoisa. ¹⁶Iyanu dawako aneaneme irauaiai ukeibisi enaenari ufene ibake weakune.

¹⁷Naiyemuku, nanu moi wakenaku yewadoya eawe. Nanu ukakune sinakune enaenari uawe. Nanu ukeka ukakune sinakune enaenari ukaisa orou erenewaa uaweke enaenari uawe. ¹⁸Nanu adinaro we wake enaenari ii du maisurada wemaro ya yaisina nauawe. Eme keuwere Godinu daabaro enaradama nono Yesu Keriso korosiro feari Mibake wasai ukaisa. ¹⁹Emua feafeisaie i meramawere orofaro anifeisa. Emenu godiye irau urunaini emenu boana. Emuae emenu maru ukekabake fukeru ukaisa. Emuae yewa dooro ibeka mane imukenewaa ukaisa. ²⁰Nono iyanu ba irau ibekae urero ibifeisi. Iyanu ma wirokeka mi, Yesu Keriso, iroma fafeku ibake koro ukenewaa ukaisi. ²¹Yesu Keriso Dawae buna daiwere. Dawae fafekuke i yaisina ma berefekuba ibake Dawama i eraerabusa yaisina Danu bunama yawofeku. Dawa fafekuie iyanu yaureka ofe mufekuke Danu irau ofe ari i bunama iyabairo awoena ofe mamisi.

We iifa ukekabake wei wake

¹Nanu naiyemuku, nae yabake imukari daiwere ukaada ya emiane weakune. Naiyemuku, yae nanu imukama rooro ukekaini nanu waiya ukekanu moko munekae idua. Enoya iyanu Dai Waria Mibairo ibenewaa uawe.

²Yudiaini Sinidaikini i aweka unayaima Yesu Kerisonu imukeka daaba demuiro imufisike urane rarane da ufisine ibake weakune. ³Naiye, ae na ukakune demui waiya ukaku mi, i awekayai unu koyana. I awekayaima adinaro na unu koreibiakiro Godinu wake weibisara enaenari nono moi mi Keremidi dawaini i moi orouini emenu ibi ibi Godinu wake naukaisa orounu ibi ibinu bukaro ibinu. I orou emuaini Godinu waiya demuiro ukeibisa.

⁴Yewa wake kakure eaweke enaenari uawe. Yesu Kerisobairo ibaadae yanu imukama rooro daiwere ukeibiawe. I wake nono wemaro ya nauaweke imukama rooro daiwere ukeibiawe!

⁵Iyanu Dai Waria Mi fafine ukinua eme yaisinabairo ure namuaweke ibiawe. ⁶Aneme anemebake da imuaweke Godibairo yanu we nauke erekaini yanu arara yaisinabake Godibairo guriguri ukaada yewa furo we ma irauaiai ukeibiawe. ⁷Ya eno ufoisaie Godinu kakawera irauaiai ukeka yabairo ibifeku. Enoba Godinu kakawera irauaiai ukekaini emenu irauaiai ukekaini imusu imusu. Enoba Godinu irauaiai ukekae yabairo ibaada Yesunu bunama ya yawokeifiakuro Yesubairo me irauaiai ibifoisa.

⁸Naiyemuku, nanu dubuena kai wake yewadoya eawe. I ba ukekaini irauaiai ukekaini eme moibairo gienabu ukekaini irauaiai imukekaini arakekawere imukekaini ure nuda uke weekaini Godi we ma irauaiai ukekaini i irauaiai ukekabai imukenewaa ukeibiawe. ⁹Nanu we ma iwoka ukeka sineka i yaisina ere nauke uke eno ukeibisa enaenari uawero i irauaiai Godi Dawa yabairo ibenewaa ufi.

Foruma Firifai goi orounu me makekabake rooro ui wake

¹⁰Yae nanu ibeka ibake imukada yama nabairo makakunekaro nama Godibairo we ma irauaiai ukakune. Nae ibai iwoka, adinaro yanu ararae nabake me makeka. Eno nono adinaro me makeka daaba me ibake yama make dayaka. ¹¹Nanu ibekae irauaiaiba meramawere ari ibake imukama imuke dakaada idua me irauaiai ibakune. Nanu meramawere ibeka ibake weroma kamena we dakakune. ¹²Nabairo eraerabusa dai menaku ibinuba daiwere ibinu ari ibaibake weroma imuke dakakuneke nae irauaiai ibine. Uruna iseroma boana urekaini uruna ise mero desini urekaini ibai na iwoka. Nono i eraerabusa keuwereba eraerabusa keu menaku ari ibai na iwoka sinaada ibine ibake weroma imuke dakakune. ¹³Yesu Kerisoma na buna makakunaraba ibake Godima nabairo makara waiya yaisina ukenewaa ukakune.

¹⁴Nono yae nanu meramawere ibeka ibake imukada nabairo makakunekaie irauaiai ukeibisa. ¹⁵Ya Firifai goi orou yae ibai iwoka, na Masadonia orofaro ibaada Godinu wake weebe medeke anero yama naini i me makekaini munekaini demuiro naka naka uke makaneibisi. Enoba moi sosiro Godinu wake naukeibisa orouma eno uke dakeibisaro nono ya Firifai goi orou mane adinaro eno ukeibisa. ¹⁶Na Desoronika goiro ibeibisara furoe yama oi moi odo odoro odaiseibisaro nabairo fareibiro muneibisara. ¹⁷Nae i oibake weroma imukenewaa uke dakakuneka yae nabairo i oi makakunekaba ibake dubuenaro yama Godibairo yanu moko mufoisa ibai nama imukenewaa ukaada rooro daiwere ukakune. ¹⁸Nabairo awoenae yanu me makakuneka eraerabusa keuwere ibinu. Yama yanu aneme aneme Efafadaidusibairo maisaro waure aare nabairo makararo yanu eraerabusa keuwere nabairo ibinu. Enoba yanu me makekae i irauaiai ofereni ode sibore sianao ari eno. Godima yanu makakuneka eraerabusa eraada ie irauaiaiya eno we imukaku. ¹⁹Godi Danu eraerabusa yaisina Yesubairo ibinu enaenari Godima yabairo mafiane weakune. ²⁰Iyanu Babae Godinu ibi mane aine wai ure we ma daiwere ukeifene weakune.

Dubuena kai arie wei wake

^21-22Yesu Kerisonu wake naukaisa orou yaisinabairo nanu arie wake we odaisakunea ane weawe. I naini demuiro ibaada Godinu wake naukaisa orouma yabairo arie wake we odaisaisa. I Godinu wake naukaisa orouini nono i gaemani yawokakune dai mi Sisa, danu uwararo waiya ukaada Godinu wake naukaisa orouini emua yaisina yabairo emenu arie wake we odaisaisa.

²³Iyanu Dai Wari Mi Yesu Kerisonu irau unu koreka yabairo ibene ibene ibeifine weakune.