Ruki

RUKINU OWAOWA

Rukima yewa wake Diafarasibake owaowa yanake odi

^1-2Naiye, Diafarasi, nanu wakenaku ewadoya ea. Yesu Kerisoma buna ukeka keuwere iyabairo ukeibi. Moi orouma Danu buna ukeibi ibai ereibisake Danu wake iyabairo weibisake nono owaowaro yanakada iyabairo makeibisa. ³Emuama eno ukeibisaba ibake nanu imukekae i ari eno imukakune, Yesunu buna ukeka yaisina naukenewaa ukeibisaraba ibake i wake yaisina gienabu owaowaro odimake abairo odaimane eno imukada ibake owaowa yanake odakune. ⁴I buna ukeibiro naui ena wake ba adaadake iwoka ufane ibake abairo yewa owaowa yanake odaisakune.

Aneruma Dioni babadaido ukeka mi danu amaema dawa dofeku wake

⁵Adinaro Erodi, dawae gaemani orounu dai yawokeka mi. Enoba dawae Diudia orofa yawokeibi. Dawama yawokeibi i furoe moi dawako ofereni ode sibore sianeka mi danu ibiye Sakarayasi dawa ibi. Danu akaemuku demui orou emuae Abaida weaisa orou. Dawaini danu orouini i dai sosi uwara ubarenaro Godinu waiya demuiro ukeibisa. Enoba Sakarayasi danu awekanu ibiye Erisabedi. Erisabedie Eroninu sisia aweka. Eroninu orouini Godibairo ofereni ode sibore sianeibisa. ⁶I aiyaka emua Godinu daabaro gienabu enaada Danu darawaduini Danu wakeini imukenewaa ukeibisi. Eno ukeibisiro Godima emenu irauaiai ukeka sineka ereibi. ⁷Erisabedi dawae amara ara sini ibake amara dore dauke me ibeebe i aiyaka me ewai ure bauwaka ure eno uisi.

⁸Enoba i Abaida orounu waiya ukeka odo idua fari. I ofereni ode sibore sianeka orounu bisarae ukeibisa emenu waiya ukeka odo idua fariba ibake emenu ibi ibi fefaro yanakeibisake mauwa ubarenaro odeibisa. Eno uke odeibisake guriguri ukeibisake demui ibi mane muneibisa. ^9-10I odoe eno uisake Sakarayasinu ibi muka. Sakarayasinu ibi mukaba ibake Sakarayasima dai sosi uwara ubarenaro Godibairo ofereni odifine amuike ibibaie i fare ku siane ibisa orou yaisina aweawero ibaada guriguri uisa. ¹¹Eno uisaro Sakarayasi enare ibaada eribaie Godinu aneru irauaiai urumuma imusu ari inaa iro ofereni odeibisa baena wana enaro adinaroma enare ibiro eri. ¹²Erike imuka merama ukaada ia daiwere iyari. ¹³Ia iyariro i aneruma eno wei, Sakarayasi, ia da sia eno wei. Godima anu guriguri ukaku ibai naukinuba anu aweka Erisabedima amara dofekuro danu ibiye Dioni mamifakua eno wei. ¹⁴Amara dofekuro yanu imuka irauaiai ukaada rooro ufuaisiro eme keuwere emuaini iini rooro ufeisaya eno wei. ¹⁵Eno weike nono wei, i amaranaku dai sifekuke Godinu dai mi sifekuro Godima efekua wei. Anu amarama waini aduaini ara aduaini da ifekua eno wei. Danu amaema dawa dofeku odoroma Godinu Imumu Irauma danu imuka ubarenaro isafekuke ibeifekua eno wei. ¹⁶I mima Godinu wake wenewaa ufekuke eme keuwere emenu ba me ukekabairoma ma owefiakuro emenu Dai Godinu daabaro anifeisaya i aneruma eno wei. ¹⁷Iraidanu ukeka sinekaini bunaini mufekuke dawako anifekuro nono i Mesaiama danu umuro aafekua wei. I babaebairo anifekuke i babaemukunu imuka ma owefekuro emenu amaraku nono imukari ukaada irauaiai mane imukeifeisaya wei. I Godinu wake nauke medaisa orounu imuka ma owefiakuro nono imukeka irauaiai imukeifeisaya wei. Enoba dawae i orou eno uke bou ufiakuie Dai Waria Mi idua fafekua i aneruma eno wei.

¹⁸I aneruma eno weiro Sakarayasima anerubake ma owerike eno wei, nanu awekaini naini uwae bauwaka ure ewai ure eno ukisude aneaneme anu wake iwoka simau wei? ¹⁹Eno weiro i aneruma dawabake nono wei, nanu ibiye Geibiro. Nae Godibairo ibakunea wei. Godima yewa irau wake nama abairo wemane we odainararo ibake abairo fanea wei. ²⁰Eno weike nono wei, nanu wake nauke meba ewadoma ane i amaranaku dofeku odoroma yeka mie wake muu ufakuke koko mi ari wake da we ibifakua eno wei. ²¹Eno ukaada we makaneibisibaie i fare ku siane ibisa orouma Sakarayasi koro ukeebe eno we imuisa, i miye aneme ukaada dai sosi uwara ubarenaro yafawere ibinu ari eno we imuisa. ²²Sakarayasima i dai sosi uwara ubarenaroma isarike emuabairo wake wefine we imuikema nono koko mi ari ukaada wake we daui. Ibake i aweawero enare ibisa orouma eno we imuisa, dawae kubekube erinua eno we imuisa. Eno we imuisaro Sakarayasima wake muu ukaada ibake wake moi emuabairo we dauike wanama uke kowokowo mane ui. ²³Eno uike moi odo odo ibeebe danu waiya ukeka odo me siniro danu uwararo idua ani.

²⁴Dubuenaro Erisabedima boana munike manabe kai fai (5) uwara ubarenaro fe ibeibi. ²⁵Dawama eno wei, nae amara dore me ibake nanu adinaro ibekae meramawereroma nono awoenae Godima na eraada unu korakunaraba eme moima na da we irufokaisaya eno wei.

Yesu Danu amaema dofine aneruma wei wake

²⁶Erisabedi manabe sikisi (6) boana bobo ibiro Godima Danu aneru, Geibiro we odairo aneruma isare aarike Gareri orofa Nasaredi goiro ani. ^27-28I goiro moi adarabaini dodoo uke dakeibi aruma ibi. Ibibaie moi mima i aruma ure burise ere mero i arumama moi mi mufine we bou uke oisaro me ibi. I aruma mufine we oisaro ibi mi danu ibiye Diosefu. Dawae i adinaro dai yawokeka mi Deiwidinu sisia mi. I arumanu ibiye Meri. Aneruma i arumabairo farike eno wei, aruma, yaure ibinu, ae Godinu we mune odi aruma. Godi Dawa abairo ibinua wei. ²⁹Eno weiba ibake Merima imuka merama daiwere ukaada eno we imui, anemebake i ari eno wake weaku we imui? ³⁰I aneruma Meribake nono wei, ia da sia wei. Godima i irauaiai eraakuyainuba boana mufakuke aya amara dofakuie Danu ibiye Yesu mamifakua wei. ^31-33Dawae dai miwere sifekuro eme yaisinama Dawae i Dai Godinu Amaraya eno weifeisa. I Dai Godima Danu oinami Deiwidinu yawokeibi orofa mafekuro i Isaraera orou Dawama yawofiakuro Danu yawokeifiaku waiya da me sifekua eno wei.

³⁴Eno weiro Merima anerubake ma owerike eno wei, nae eme mede aneaneme eno umau wei? ³⁵Eno weiro nono i aneruma Meribake nono wei, Godinu Imumu Irauma abairo isafekuro i urero Dai Godinu buna daiwere mafekuro isare aare oba unao ufekuba amara dofakuie Dawa Godinu iifa miya eno wefeisaya wei. ³⁶I aneruma eno weike nono wei, anu yayae Erisabedi ewainakuma adinaro boana muninuke i amara ara sinia weaisa aweka boana bobo ibinuro manabe sikisi (6) me sininua eno wei. ³⁷Ie ara me. Godima aneme wefekuie enaenari ufakua eno wei. ³⁸I aneruma eno wei ibake Merima dawabairo eno wei, nae Godinu waiya ukakune aruma na yewadoya einake anu wenu wake enaenari ua wei. Merima eno weiro i aneruma Meri idua medike ani.

Merima Erisabedinu uwararo awaawa ani wake

³⁹Merima moi odo yaure ibeebe uyarike moi Diudia orofa oraara goiro sabu amuke ani. ^40-43Merima Sakarayasinu uwararo ane farike Erisabedi arie weibibaie Erisabedinu amara boanaro amani amani ui. Eno uiro Godinu Imumu Irauma Erisabedinu imuka ubarenaro isariba ibake Erisabedima daiwere weike eno wei, Godima a i awekabo yaisinabairoma we ma irauaiai ukakuyainuke nono anu dofaku amaranakuini we ma irauaiai ukakua eno weike nono wei, nanu Dai Waria Minu amaema anemebake nabairo farinu wei? ⁴⁴Ama arie wake wenuro naunero nanu amara boana ubarenaro rooro ukaada ibake amani amani ukinua eno wei. ⁴⁵Ae Godinu wake naukakuba ibake Godima a we ma irauaiai ukakuyainua wei. Dawa abake we bou ui enaenari ufekua eno wei.

Merima yaura kairoma Godi we ma irauaiai ui wake

^46-47Erisabedi eno weiro Merima yaura kairoma eno wei,

nanu imuka ubarenaroma Godi we ma daiwere ukakuneke Godi nanu wirokeka miya weada rooro ukaada weakunea eno wei. ⁴⁸Godima Danu merama uke ibaada waiya ukaku aruma eraada imukakunara ibake eno ukakune. Ibake i dubuenaro fafeisa orou yaisina emuama nabake irauaiaiya wefeisaya eno weakune. ⁴⁹I buna Godima nabake irauaiai ukeka keuwere ukakuro nono Danu ibiye iifawere wenea eno wei. ^50-51Nono i awoena ibinisa orouini nono dubuenaro fafeisa orouini aina ainama Dawa we iifa ukaada imukenewaa ufeisaie emua yaisinabake imukari daiwere ufiaku weakunea wei. Godi Danu buna wanama buna ukeka keuwere ukaku. I merama imukeka fukeru bobo orou ma berakakunero imusu imusu anaisa. ⁵²Nono i bunawere yawokaisa orou we mune ma okoa ukakuniake nono i daiwere me orou ma daiwere ukakunia. ⁵³Enoba i eraerabusa me oroubake irau eraerabusa makakuniaro irauaiai ibaisa. Nono i eraerabusa keuwere bobo orou emua moi eraerabusa make dakakuniake aniawe weakunea weaku. ⁵⁴Danu adinaro unu kofiane we bou ui ibake imukakuniake Danu waiya ukeka Isaraera orou yaisina Dawama unu korakune. ⁵⁵Godima Eibaramuini danu sisia sirorari orouini emua yaisina imukari ukeka we bou uiba ibake imukada enaenari ukakua weakune,

Merima i wake eno wei. ⁵⁶Meri dawae Erisabedibairo manabe kai buuba iro dawaini ibeebe medike owere danu uwararo ani.

Dioni babadaido mi doka odobake wei wake

⁵⁷Erisabedinu amara doreka odo fariro danu amara dori. ⁵⁸Danu amara doriro danu kakamuku naburakaini nono danu emenu kakamuku naburakaini i goi orouini emua yaisina nauisake we imuisa, Godima Erisabedibake imukari daiwere ukakuyainuba amara dorinua, we imuisake dawaini rooro daiwere uisa. ^59-60Odo eida (8) me siniro i Du orounu bisaraba amaranakunu ofe kuureka odo idua fariba ibake i orou yaisina fakake danu ofe kuufisane ku siane ibaada eno weisa, i amaranaku danu babaenu ibi Sakarayasi mamia weisaro Erisabedima nauike eno wei, meya, danu ibiye Dioni mamimaua wei. ^61-63Eno weiro nauisake nono weisa, yewa mi, iyanu akaemuku demui oroubairo i ibi meya, media weisake danu babaebake wanama wanama uisaro nono Sakarayasima moko wanama wanama uiro fefa maisaro Sakarayasima owaowa yanake odi, danu ibiye Dioni, mamimaua eno owaowa yanake odiro i orou yaisina i owaowa ekake imuka foria uisa. ⁶⁴Sakarayasima eno owaowa yanake odiro danu wake we dakeibibai idua me siniro wake idua weike Godi we ma irauaiai ukeibi. ⁶⁵Eno ukeibi ibake danu goi orou yaisina ia iyareibisa. I wake Diudia oraara orouini aboro aboro we eneibisaro naukeibisa. ⁶⁶I wake nauka orouma imukama merama imukada eno we imuisa, Godinu buna i amaranakubairo ibinuba dawa dai sifekuke aneaneme ufeku ariya eno weisa.

Sakarayasinu we bou ui wake

^67-68Godinu Imumu Irauma Dioninu babae Sakarayasinu imuka ubarenaro isariba ibake Sakarayasima wake we bou ukaada eno wei, iya Isaraera orounu Dai Godima Danu oroubairo isare aarike iya ma wirokakuniba ibake Dawa we ma irauaiai ukaisia wei.

^69-70Godima Danu we bou ukeka orounu bebekuroma adinaro wei wake enaenari ui ibake Godima moi mi Deiwidinu sisia oroubairoma ma uyari. I miye bunake ma wirokeka mi. ^71-72Iyabake wasai ukaisa orouini imuka ka ukaisa orouini emenu wanaro mareke mufekuke odifiakuro me irauaiai anifeisi. Danu adinaro iyanu babaemukubairo we iifa ukeibi i wake imukada ibake enanari ukaku.

^73-75Godima iyanu babae Eibaramu imukada Danu we bou ui wake enaenari ukakuba iyaini wasai ukaisa orounu wanaroma mareke mumisike iya we ma irauaiai ukaada we fira umisi. Enoba ia da sifeisike Godinu ibooro irauaiai ukeka sineka mane ukaada gienabu ukeifeisia wei.

⁷⁶I Sakarayasima eno weike nono wei, a nanu amaranaku, iyanu Dai Godinu we bou ukeka amaraya eno wefeisa. Ako anifakuke iyanu Dai Waria Minu daaba wabuke bou ufakua wei. ⁷⁷Danu ma wirokeka wake ama emuabairo wefakuro naufeisaro emenu merama merama ukeka mufekuke imuke medifekuba ibake Dawa imufeisa. Ama Godinu emebairo imukari ukekaini irauaiai ukekaini we ma iwoka ufakuro naufeisaya Sakarayasima eno wei.

^78-79Eno weike wei, Godima iyabake imukari daiwere ukakuba i dai edoro ari ureroma isare aafekuke i dumuini fearekanu riuro ibinisi orou edoro ufekuke Danu gienabu daaba iyabake ma iwoka umisiro me irauaiai ibifeisi weakunea wei.

⁸⁰I amaranaku Dioni dawa ibeebe dai sinaada danu imuka yaisina Godibairo odaada imuka irauaiai ui. Dawae dai mi sinikema nono i eme ibe me orofaro ibeebe iroma i Isaraera oroubairo Danu onami we ma boroo yafiane iro fari.

Yesu doka odobake wei wake

¹I furo Kisa Ogasidasi dawae Romani dai gaemani mi. Enoba dawama moi darawadu owaowa yanake odike mariero i orofa aboro aboro waure anisaro i owaowanu wake nauisa. I darawadue senisisi muneka darawadu wake. I orofa akaka orou yaisinanu ibi ibi yaisina mufine ibake i darawadu owaowa yanake odairo waure anisa.

²Kuiriniasima Siria orofa yawokeibibaie i furo i senisisi darawadu owaowa idua waure faka. ³I orou yaisina emenu amae babaenu goiro emenu ibi ibi bukaro odifisane anisa.

⁴Diosefu dawae Deiwidinu sisia miba ibake Gareri orofa Nasaredi goiroma Diudia orofa Bediriemu goiro ani. Ie Deiwidinu goi ibake iro ani. ⁵Diosefu danu mufekua we oisa boana bobo aruma Meri munike emenu ibi bukaro yanake odifisine amuke anisi. ^6-7I Bediriemu goiro amuke anisike ibeebe Merima danu kawama amara idua dorike wauma oba uike boromakaunu uruna iseka orofaro odiro aine ibi. I ba uwara uwara ubarenaro yaure ibeka orofa ibe meba i boromakaunu uruna iseka orofaro odiro aine ibi.

I mamoe yawokeka orouini aneruini emenu wake

⁸I orofaro moi mamoe abu yawokeka orou emenu mamoe abu koero dumuro yawokeibisa. ⁹Emenu mamoe abu yawokeibisabaie Godinu aneruma emuabairo fariro Godinu arakekama edoro daiwere ari i mamoe abu yowokeibisa oroubairoini edorowere uiba ibake i oroue ia daiwere sika. ¹⁰Enoba i aneruma emuabake eno wei, ia da siaweke nanu wake nauawe wei, irauaiai wake wemaro eme yaisina naufisake rooro ufisane fanea wei. ¹¹Eno weike nono wei, i ma wiroke mune aneka mi, Dawae, Mesaia, Godinu Keriso, Danu amaema awoena dorinua wei. ¹²Danu aine ibinu ubue eno, wauma oba uke oisaro boromakaunu uruna isaisa orofaro aine ibinua iro yodia uke aniaweke fou uawe wei.

^13-14Eno weibibaie idua buna aneru keuwere i aneru unabairo fakake Godi we ma irauaiai uisake eno weisa, urero Godinu ibi we ma daiwere ufeisia weisa. Nono yewa dooro aina ainama Godinu wake naufeisaie Danu irau ukeka emuabairo mafiakuro me irauaiai ibifeisaya weisa. ¹⁵I aneruma eno weisake i orou idua mediriekake urero amuke anisa. Amuke anisaro i mamoe abu yawokeibisa orouma eno weisa, Godinu aneruma iyabairo weisa wake enaenari anifeke Bediriemu goiro i amaranaku ane efe weisa. ¹⁶Eno weisake sabu sabu ane fakake ekabaie Merini Diosefuini emua idua yaure ibisiro i amaranakue boromakaunu uruna iseka orofaro aine ibiro eka. ^17-18Ekake anisake i aneruma i amaranakubake wei wake eme yaisinabairo weisaro i wake nauisa orouma foria daiwere uisa. ^19-20I mamoe abu yawokeka orouma owekake emenu orofaro anisake iro yaure ibaada i anerunu wakeini emenu naisama eka ibaini imukada Godi we ma irauaiai ukeibisa. Merima emebairo wake moi we dauike i ukeibi ibai mane imukama imukenewaa ukeibi.

Yesunu ibi mamisa wake

²¹Odo eida (8) me siniro Danu ofe kuukake Danu ibi Yesu mamisa. I ibiye aneruma adinaro Meri boana mune me i furo we bou ui enaenari mamisa.

Yesu Simionibairo waure anisa wake

²²Merima i amaranaku doriba danu iifa wanadu ukekaini oferini ode sibore sianeka odo idua fari. Ie Mosesinu darawadu ibake Yesu mukake Derusaremu goiro dai sosi uwara ubarenaro Yesu Godibairo ma iwoka ufisaro efine waure anisa. ²³Godinu bukaroma eno weaku, awekama danu kawama amara dofekuie i amara Godinu iifa amaraya eno weaku. ²⁴Eno weakuba Merini Diosefuini emua emenu iifa wanadu ukekaini ofereni ode sibore siafisine anisi. I oferenie uneinakuyai o awoena ubari unayai. Ie emenu darawaduba ibake i Isaraera orouma eno ukeibisa.

^25-26I furo moi mi, danu ibiye Simioni, dawae Derusaremu goiro ibeibi. I mima iro ibaada Godi imukada Danu waiya gienabu ukeibi. Dawae iya Isaraera orou iyanu ma wirokeka efine ibeibi. Enoba Godinu Imumu Irauma dawabairo adinaro eno wei, ae sabu da feafakuke Godinu we bou ui Keriso efakukema aima feafakua eno wei. ²⁷Godinu Imumu Irauma Simionibairo weiro ibake Simionima dai sosi uwara ubarenaro ani. Iro anike enare ibibaie Merini Diosefuma emenu darawaduma weaku ibake enaenari ufisake Yesu Godibairo ma iwoka ufisane ibake emuama Dawa waure faki. ^28-32Waure fakike Simioni eki. Ekiro Simionima i amaranaku munike Godibairo we ma irauaiai ukaada eno wei, Dai Waria Godi, Ama nabairo we bou ui amaranaku erakune. Ama eme yaisinabairo we odi, i ma wirokeka mi erakuneba nae idua feamane weakunea wei. Eno weike wei, Anu we odi Amara, Dawae i Du me imusu orou yaisinanu dai edoro ari. Dawae Anu Isaraera orounu arakekaba emema efeisaya Simionima eno wei. ³³Eno weiro Merini Diosefuini emuama i amaranakubake i wei wake nauisake imuka foria uisi. ^34-35Simionima Merini Diosefuini emua we ma irauaiai uike Meribake eno wei, yewa amaranaku ea wei. Dawae moi Isaraera orou ma wirofiakuke nono moi Isaraera oroue fanisi mafiakuke ma feafiaku. Dawae Godinu wake wefekuie Dawa Godinu ereka ubu ibake emema Dawaini dino ukeifeisake Dawa medifeisa ibake emenu imukama imukeka ma boroo yafeisaya weike nono wei, anu imukari daiwere muneifakuke dai bauma anu imuka kai umane kuunao ari ukeifekua eno wei.

^36-37I furo moi we bou ukeibi aweka danu ibiye Ena. Dawae Feneuronu aruma. I Asura Du oroue danu akaemuku demui orou. I awekae ewai uri. Danu emeini oya seweni (7) ibeibisiro nono danu eme me siniro danu mane oya keuwere, eidi fo (84) ibeibi. I aweka ewai dai sosi uwara mede dakeibike iro ewekaini dumuini ibaada guriguri ukaada moi odo odoro uruna ise dakeibi. ³⁸Simionima wake we me sinibaie i awekama idua farike i amaranaku erike Godi we ma irauaiai ui. Nono dubuenaro Dawa i Godima i Romani gaemani yawokeibisa orou Derusaremu goiroma yowefiakua weada yawokeibisa oroubairo anike eno wei, ibakeye i ma wiroke mune aneka Mesaia weaisa mi dawa na erea wei. Weike eno mane we eneiareibi.

Yesuini Danu amae babaema Nasaredi goiro owere anisa wake

³⁹Merini Diosefu Godinu darawadu wakema wei enaenari uke me sikike Derusaremu goi meisike iroma Gareri orofa, emenu Nasaredi goiro anisi. ⁴⁰I amaranaku dai sinaada buna munaada iwoka daiwere muneibiro Godima Dawa we ma irauaiai ukeibi.

Yesunaku dai sosi uwararo ani wake

⁴¹Yesu Danu amaeini babae oya aine wai ure Derusaremu goiro Godima Isaraera orounu Idifiroma waure aneka banau uruna ifisine aneibisi. ⁴²Yesu oya ireweni (11) me siniro ie emenu bisaraba ibake Derusaremu goiro enaenari anisa. Iro anisake ibeibisa. ^43-44I banau me siniro Danu amaeini babaema Derusaremu goi mesike anisiro i okoa amaranaku, Yesu, Dawa emuaini ane daui. Dawae Danu mane i Derusaremu goiro ibi. Danu amae babae emuama danu ibeka iwoka me ibake eno we imuisi, Dawae Danu naiyemukuini demuiro anisaya we imukada i odoro gienabu aneibisi. Aneibisiro dumu siniro Yesu fare dauiba ibake Dawa yodia ukeibisi. Emenu goi orouini Yesunu naiyemukuini emua yaisinabairo yodia ukeebe fou ure dauisi. ⁴⁵Fou ure dauisi ibake owekike Derusaremu goiro yodia ufisine owere anisi. ⁴⁶Iro ane fakike yodia ukeebe odo buuba me siniro dai sosi uwara ubarenaro amuisi. Amuisiro Yesuma i dai sisa orounu ku ubarenaro yaure ibaada emenu wake naukada emuabairo wake moi we nauke ereibi. ⁴⁷Eno ukaada yaure ibibaie i orouma Danu moko wake naukada Danu moko wakeini Danu iwoka daiwerebake imuka foria ukeibisa. ⁴⁸Yesuma eno ukeibibaie Danu amae babaema fare eraada imuka foria uisike Danu amaema eno wei, nanu amara, anemebake Anu babae uwa eno ukeyanu wei? Anu babaeini naini uwa A yodia ukaada enaisua wei. ⁴⁹Eno weiro Yesuma ma owerike eno wei, anemebake Na yodia ukakuneki? Nae Nanu Babaenu uwara ubarenaro yaure ibineie irauaiairoma nono anemebake ma nuna ukaisi wei. ⁵⁰Eno weiro Merini Diosefuma Danu wei wake ma nuna uisi. ⁵¹Yesuini emua Nasaredi goiro owere anisa. Yesuma emenu weibisi wake nauke mede dakeibi. Ibake Danu amaema i wake yaisina moi oroubairo we dakeibike me imukama imukeibi.

⁵²Yesu dai sinadae buna muneibike iwoka daiwere muneibiro Godima Dawa we ma irauaiai ukeibiro nono emema Dawae irauaiai miya eno weibisa.

Dioni babadaido minu we ma iwoka ukeibi wake

^1-2Daibiriusi Kisa, i Romani gaemani orounu dai miye dawa dawama oya fifidini (15) i orofa yaisina yawokeibi. I orofa yawokebe oya fodini me siniro oya demui mane ibooro ibiro yawokeibibaie Godima danu wake Dionibairo weiro isare aari. Dionie Sakarayasinu amara, dawama eme ibe me yao orofaro ibeibiro Godinu wake dawabairo isare aari. I furo Faeradima Diudia orofa yawokeibiro nono Erodi dawae Gareri orofa yawokeibi. Nono danu dabue Firifuma Aiduriaini Durekonaidini orofayai yawakeibi. Risaniasima Ebiriana orofa yawokeibi. Einasini Kaiyafasini emuae i furo dai ofereni ode sibore sianeka waiya ukeibisi. ³I furo Godinu wake Dionibairo isare aariro nauike Dionima Diodeni adua ewa bokenaroma eka bokenaroma Godinu wake aboro aboro we eneiareibi. Godinu wake we enaada eno weibi, yanu merama merama ukeka imuke mediawero Godima yanu merama merama ukeka mufike imuke medifiro ya babadaido umia i wake eno we eneiareibi. ^4-5Isaiya Godinu wake we bou ui mi danu bukaroma Dionibake eno weaku,

dawae eme ibe me yao nauwaro wake we enaada eno weaku, I Dai Waria Minu daaba wabuke ma gienabu uawe. Oraara daabaini madoini kifuru kafuruini ma giena uaweke i daaba ma gienabu uawe. ⁶Eme yaisina Godinu ma wirokeka mi efisane weaku,

Isaiyama eno owaowa yanake odiro Dionima enaenari ukeibi. Danu ararae eme yaisina emenu merama merama ukeka medifisake Yesunu wake naufisane ibake eno weibi.

⁷Eme keuwere Dionibairo babadaido ufisane fakaro Dionima emuabake eno wei, ya waruma murie! Ainama Godinu fafekuke yabairo yanu merama ukekabake dino ufekubai wenuro naukisake ibake nabairo babadaido ufoke Godinu dino ukekabai ma berefone nabairo durame faraisa wei? ⁸Owere aniaweke i merama ukeka imuke mediaweke irau ukeka mane ibooro odiawero Godima efike iduaya wefi wei. Eno weike nono wei, me sara ufoisake Eibaramu dawae iyanu babae iyae danu sisia oroua wefoisaie i ari eno meya weike nono wei, Godima Eibaramunu ba sisia oroue yewa omama ubu ufiane wefekuie ubu ufiakua eno wei.

⁹Godinu kodo fanisi ufi odo idua fafine ukaku. Moi mima uya ei mamakuke ana umafine ukaku enaenarie Godinu kodo ufeku odoro yanu merama ukeka sinekabake ya kodo ufine ukaku. Moi ana irau kaibai da uwafekuie umane kuufekuke mune inaaro siafekua wei. ¹⁰Eno weiro i ku siane ibisa orouma eno weisa, Godima iyae aneaneme irauaiai ukeka ufene weaku weisa? ¹¹Eno weisa ibake Dionima wei, aina mi dawa dei barukeka dei raarayai boboie moi dei barukeka me mibairo moi dei mafi. Enaenari uruna keuwere bobo mi dawa naka naka ufi wei. ¹²Moi dakesi muneka orouma Dionibairo babadaido ufisane fakake eno weisa, Godima iyae aneaneme ufene weaku weisa? ¹³Eno weisaro Dionima emuabake eno wei, i Romani gaemani orounu weaisa dakesi oi mane muaweke nono moi deiro dakesi oi da muawe wei. ¹⁴Moi ame orouma dawabairo fakake eno weisa, Godima iyae aneaneme ufene weaku weisa? Eno weisaro Dionima emuabake ma owerike eno wei, emebake merama merama dauke yayakaweke emenu oi waira da uaweke yanu moko oi mane muawe Dionima eno wei.

¹⁵I Du orou yaisina i ma wiroke mune aneka Mesaia weaisa Mi koro ukenewaa ukeibisaba ibake emenu imusu we makanada eno weisa, Dioni, dawae Godinu Mesaiaba me? Emenu emenu eno weibisa. ¹⁶Eno weibisabaie Dionima emenu imukeka iwoka sinaada emuabake eno wei, nae adua mane babadaido ukakuniaya wei. Nono dubuenaro moi mi nanu umuro aafeku mi Danu bunae daiwere na ari eno me. Nae irauaiai meba Danu ibooro da inare kuumaua wei. Dawae moi orou Godinu Imumu Irauini inaama babadaido ukenewaa ufiakua wei. Inu ubiye Dawama Danu buna mafiakuke iyanu merama ukeka sinekaroma ma irau ufiakua eno wei. ¹⁷Dionima eno weike nono wei, Dawae Danu uidi kai amuke adiadi yareka dirii sisina ma irauaiai ufine saboroma uidi kaibai kore urero eku sianakuro oyauma i ifuru afuru mane urefu yare waure anakuro uidi kaibai mane eu sisinaro isaraku. I ba kaibaie uwara ubarenaro odakuke i kemibai mane i feare dakaku inaaro sianaku. I inaama ifuru afuru aine wai ure yareifekua Dionima Godinu emebake kodo ufeku ibai ibake eno wei. ¹⁸Dionima eno we iifa ukeibike Godinu irau wake i oroubairo yareibirie.

^19-20I Gareri orofa yawokeibi dai mi, Erodima danu dabuenu aweka Erodiasi mareke munike danu ba me merama ukeka keuwere ukeibi ibake Dionima dino wake Erodibake wei. Eno weiro ibake Erodima Dioni ana ebaro odi. Erodima Dioni ana ebaro odi ie danu moi merama ukeka daiwere idua ui.

Dionima Yesu babadaido ui wake

^21-22Dionima i orou yaisina babadaido uke me sinike Yesu babadaido uiro Yesuma guriguri ukaada weibibaie ure eba ui. Ure eba uiro Godinu Imumu Irauma ubari ada ari eno uke isari. Dawabairo isare aariro ureroma wake isare aarike eno wei, Ae Nanu Amara ubiba Nanu imuka yaisina Abairo ibinuro Nae rooro daiwere ukakunea wei.

Yesunu akaemuku yaisinanu ibi ibibake wei wake

²³Yesuma Danu dai sineka oya dedi (30) ma bereike emebairo Danu kawama waiya ubi. Eno ukeibiro emema, Dawa Diosefunu amaraya, weibisa.

Diosefu, dawae Eirinu amara. ²⁴Eiri, dawae Madadinu amara. Madadi, dawae Riwainu amara. Riwai, dawae Merokainu amara. Merokai, dawae Danainu amara. Danai, dawae Diosefunu amara. ²⁵Diosefu, dawae Madaiasinu amara. Madaiasi, dawae Eimosinu amara. Eimosi, dawae Naumunu amara. Naumu, dawae Esorinu amara. Esori, dawae Neigainu amara. ²⁶Neigai, dawae Medinu amara. Medi, dawae Madaiasinu amara. Madaiasi, dawae Simeinanu amara. Simeina, dawae Dousekanu amara. Douseka, dawae Dodanu amara. ²⁷Doda, dawae Doanainu amara. Doanai, dawae Reisanu amara. Reisa dawae Serubabeonu amara. Serubabeo, dawae Sirudionu amara. Sirudio, dawae Nerinu amara. ²⁸Neri, dawae Merokainu amara. Merokai, dawae Adinu amara. Adi, dawae Kosaninu amara. Kosani, dawae Emodamunu amara. Emodamu, dawae Erunu amara. ²⁹Eru, dawae Diosuanu amara. Diosua, dawae Iriesanu amara. Iriesa, dawae Doriminu amara. Dorimi, dawae Madadinu amara. Madadi, dawae Riwainu amara. ³⁰Riwai, dawae Simioninu amara, Simioni dawae Diudanu amara. Diuda, dawae Diosefunu amara. Diosefu, dawae Donamunu amara. Donamu, dawae Iriekiminu amara. ³¹Iriekimi, dawae Mereanu amara. Merea, dawae Menanu amara. Mena, dawae Madadanu amara. Madada, dawae Neidaninu amara. Neidani, dawae Deiwidinu amara. ³²Deiwidi, dawae Desinu amara. Desi, dawae Obedinu amara. Obedi, dawae Bouasinu amara. Bouasi, dawae Samoninu amara. Samoni, dawae Neisoninu amara. ³³Neisoni, dawae Aminadabunu amara. Aminadabu dawae Adamininu amara. Adamini, dawae Aninu amara. Ani, dawae Esaronunu amara. Esaronu, dawae Feresinu amara. Feresi, dawae Diudanu amara. ³⁴Diuda, dawae Deikafunu amara. Deikafu, dawae Aisikinu amara. Aisiki, dawae Eibaramunu amara. Eibaramu, dawae Diranu amara. Dira, dawae Neionu amara. ³⁵Neio, dawae Seruganu amara. Seruga, dawae Reunu amara. Reu, dawae Fereginu amara. Feregi, dawae Ibanu amara. Iba, dawae Siranu amara. ³⁶Sira, dawae Keinaninu amara. Keinani, dawae Afakadinu amara. Afakadi, dawae Seminu amara. Semi, dawae Noanu amara. Noa dawae Remekinu amara. ³⁷Remeki, dawae Meduseranu amara. Medusera, dawae Inokinu amara. Inoki dawae Derodinu amara. Derodi, dawae Mererianu amara. Mereria, dawae Keinaninu amara. ³⁸Keinani, dawae Enosinu amara. Enosi, dawae Sedinu amara. Sedi, dawae Adamunu amara. Adamu, dawae Godinu amara.

Seidanima Yesu uke iruke ereibi wake

¹Godinu Imumu Irauma Yesunu imuka ubarenaro isarike wake fariro Yesuma i Diodeni adua idua medike ani. Idua medike aneibibaie Godinu Imumu Irauma Yesu eme ibe me orofaro waure ane odi. ²Waure ane odiro Yesuma iro odo fodi (40) aineibibaie seidanima Yesu uke iruke ereibi. Yesuma odo fodi (40) iro ibaada uruna ise dake ibeibiro odo keuwere me siniro desini daiwere uri. ³Eno uiro seidanima Yesubake eno wei, Ae ba Godinu Amarabaie wearo yewa omama buredi sifiro ia wei. ⁴Eno weiro Yesuma seidanibake ma owerike eno wei, Godinu bukaroma eno weaku, emema uruna mane ifeisaie emenu ibekae ba meya weakua wei. ⁵Eno weiro seidanima Yesu we munike moi orofaro amuke ane odike i ibeka oroorofaini emeini yaisina sabu ma boroo yariro eri. ⁶Eriro seidanima Yesubake nono wei, i oroorofaini emeini yaisina na makara ie nanuba aina aina yabake mamiane wemauie mamiaua wei. Eno weike seidanima Yesubake nono wei, yewa orofa akakaini erawa naukawa i yaisina Abake mamauanero Ama yawokeifiakua wei. ⁷Nanu umu udiro ukafu ufakuke nabairo guriguri ufakuie i yaisina Abairo mamauanea wei. ⁸Eno weiro Yesuma nono ma owerike eno wei, yewa wakeye Godinu bukaro ibinu, i Dai Godibairo mane guriguri uaweke Danu waiya mane uawe eno ibinua Yesuma wei. ^9-11Eno weiro seidanima Yesu we munike Derusaremu goiro waure ani. Waure anike i dai sosi uwara eku fou duboro amuke ane odike eno wei, Ae ba Godinu Amarabaie ewadoma bibi uake isare aniaro Godima Danu bukaro wei enaenari i aneruma A yawokada wanama gabo mamimekaro me irauaiai isare ane isafakuro Anu umu omama da ufekua wei. ¹²Eno weiro Yesuma dawabake nono ma owerike eno wei, Godinu bukaroma eno weaku, anu Dai Godi da uke iruke ea eno weakua wei. ¹³Seidanima danu uke iruke ereka yaisina me siniro Yesu idua medike moi odoroma nono uke iruke efekubake medike owere ani.

Yesu Danu kawama waiya Gareri orofaro ubi ena wake

¹⁴Godinu Imumu Irauma Yesu buna daiwere mairo Yesuma Gareri orofaro nono ani. Aniro eme keuwere Danu wake i orofa aboro aboro iro yaisina we eneiareibisa. ¹⁵Yesuma i Du orounu sosi uwara uwararo we ma iwoka uke eneiareibiro naukada Dawa we ma daiwere ukeibisa.

Yesu Nasaredi goi orouma ere meisa wake

¹⁶Yesuma Nasaredi goiro fari. Adinaro Yesu Dawa okoanakuro i Nasaredi goiro ibeibi. Danu sabadi odoro ukeka bisarae i Du orounu sosi uwara uwararo amukeibi, nono i odoe enaenari uike i bukaro wake kakufine uyarie enari. ¹⁷Uyare enariro moi mima i we bou ukeka mi Isaiyanu buka Yesubairo mairo muni. I buka munike ma uramike i wake yodia uke ane fou uri. I buka ubarenaro ibi wakeye eno,

¹⁸Godinu Imumu Irauma Nabairo ibinu ibake Dawama Na i eraerabusa me oroubairo Godinu irau wake weimane ibake weakune. Na mune odaikaraie i wake weimane fare. Dawama na we odaikaraie i ana ebaro ibinao uke ibinisa orou ma worome odaimiaro fare anifisane ibake na we odaikararo farea eno wei. Ya naisa kikori bobo ari orou ya naisa foraeweke eawe. Ya arawere yawokeibekaro ibeka orou ya iroma mediaweke aniawe. ¹⁹Godinu irauaiai yawokaku odo idua fafine ukinua eno weimane ibake Na we odaikararo fare.

²⁰I bukaro wake eno kakurike i buka nono dadau uike i buka yawekeibi mibairo maike yauri. Yauriro i ku siane ibisa orouma Dawa erenewaa uisa. ²¹Yesuma yaure ibaada eno wei, awoenae yanu yaure ibaada naukisa Godinu bukaro wake enaenari ukakua wei. ²²Yesuma eno wei ibake i yaure ibisa orouma we makanada eno weisa, Danu wenu wakeye irauaiaiya weisake Danu bebekuroma fari irau wakebake imuka foria uisake nono weisa, yewae anemedei ubu weisa? Dawae ba Diosefunu amaraba mero weisa? ²³Eno weisaro Yesuma emuabake ma owerike eno wei, yanu imukaisa ibai Na iwokaro yanu adinaro dadaa eno wefoisa, i arama ma wirokeka mi ae anu onami ma wiroa. Inu ubiye eno, anu Kafenamu orofaro buna ukeibi i ari anu ba goiro enaenari ua, yama eno wefoisaya wei. ²⁴Yesuma eno weike nono wei, Nanu ba wake wemaro nauawe wei. Moi we bou ukaku minu goi orouma dawa iifa uke dakaisaya wei. ²⁵Ba weakune, Iraida imuke eawe! Iraida waiya ukeibi i furo wabu awekabo keuwere ibeibisa. I furo oya buubaini moi oya ane abanaroma obi make dake ibeibiba ibake arumu daiwere fari. ²⁶Arumu daiwere fariro Godima Iraida danu goiro wabu awekabobairo we odaise dauiro Iraidama Saidoni orofa Serefadi goiro wabu aweka una demui mane unu koria wei. ^27-29I moi we bou ukeka mi Eraisa imuke eawe. Dawae Siria orofaro beko bobo mi, Neimani, ma wiroike i Isaraera orofaro ibisa Du oroubairo beko bobo orou ma wiroke dariea weada i adinaro Danu onamibake i we bou urieka orouma uisabai enaenari Danu onamibake ma boroo yaraada Yesuma eno weibaie i Du orounu sosi uwara ubarenaro yaure ibisa orouma i wake naukada ararua uriero Yesu i goiroma ma youre mukake unamu efaroma siafisane waure anisa. ³⁰Siafisane waure aneibisabaie Yesu emenu wana daaroma me ari uike iroma ani.

Seidaninu moi merama imumu bobo mibake wei wake

^31-32Yesuma Gareri orofa Kafenamu goiro isare ani. Iro isare ane farike sabadi odoro i orou we ma iwoka ukaada bunawere wei ibake i orouma imuka foria uisa. ^33-34I Du orounu sosi uwara ubarenaro moi seidaninu merama imumu bobo mi yaure ibi. I sosi uwara ubarenaro yaure ibaada daiwereroma eno wei, Yesu Nasaredi Mi, media! Aini aneme uke makafune aarinu wei? Na iwokaya na ma merama ufarine aarinua wei. Na iwoka A. Ae Godinu iifa mi wei. ³⁵Eno weiba ibake Yesuma sabu eno wei, wake da weake imuka ubarenaroma amuake ania wei. Yesuma eno wei ibake i seidaninu merama imumuma i mi mune sianiro dooro isariro i seidaninu merama imumuma i mi moi merama ukeka uke dauike i mi idua medike ani. ³⁶Ibai eka orouma imuka foria ukaada emenu emenu we makakake eno weisa, Dawae wake bunawere weakuro seidaninu merama imumuma naukada anaisaya weisa. Aneaneme yewa ari buna wake weaku weisa? ³⁷I orouma Danu ukeibi wake i Gareri orofaroma aboro aboro we eneiareibisa.

Yesuma eme keuwere ma wiromirie wake

^38-39Yesuma uyarike Du orounu sosi uwara medike Saimoninu uwararo ani. Ane farike uwara ubarenaro amuike eribaie Saimoninu naroeya ofe wadada uibake aine ibiro eri. Ereibiro i orouma eno weisa, dawa ma wiroa weisaba ibake Yesuma i awekanu buudiro enare ibaada i ofe wadada ukeibi ibaibake wake bunawereroma wadada me sia weiro ure nuda ui. Wadada ukeibi ibai me siniro i awekama uyarike emua uruna mariero isa.

⁴⁰Eweka ane isareibiro i goi orou emenu arama imusu imusu uke ibisa orou yaisina Yesubairo waure fare odiriekaro Yesuma emua yaisina wanama ure buririero emua yaisina wiroisa. ⁴¹Seidaninu moi merama imumu bobo orou emuaini iini waure fare Yesubairo odiriekaro Yesuma weibiro i seidaninu merama imuma i orou medirieka. Emua medaada wake daiwere eno weisa, Ae ba Godinu Amaraya weisa. I seidaninu merama imumuma Yesu Dawae Kerisoya weada iwoka sikaba Yesuma emuabake i wake da weawe wei.

Yesuma Diudia orofaro Danu wake wei

⁴²Wai awanakuro Yesuma i goi idua medike yao orofaro ani. Aniro i orouma Dawa yodia ukeebe yodia ukeebe ane fou uraada eenu weisa, iya da mediake iyanu Kafenamu goiro ibia weisa. ⁴³Eno weisaro Yesuma emuabake eno wei, Godinu yawokaku irau wake moi goi goiro wemane ibake Godima Na we odaikararo farea wei. ⁴⁴Yesuma i Diudia orofa Du orounu sosi uwara uwararoma aboro aboro Godinu wake ane weibi.

Yesu Danu dawako iwoka ukeka orou we murie wake

¹Moi odoro Yesuma Genesareda kuna udi gibudiro enare ibaada i oroubairo Godinu wake we ma iwoka ukeibiriero i orouma Dawa ubi ubinaku fare ku sianada daba daba ure makaneibisa. ^2-3Eno ukeibisaro eribaie boudi sia raarayai kuna udiro ibisiro eri. I boudi onarou orouma i boudiyai meisake emenu iwame urokeibisaro erieke Saimoninu boudiro ane amui. Ane amuike Saimonibake eno wei, bara uaro eka deka anife weiro enaenari ui. Yesuma i boudiro yaure ibaada iroma i orou we ma iwoka ukeibirie. ⁴We ma iwoka ukeebe we ma iwoka uke me sinike Yesuma Saimonibake eno wei, kuna kouro aniaweke yanu iwame siawero isafiro adua abu muawe wei. ⁵Eno weiro Saimonima wei, Dai Waria Mi, dumu yafa adua abu mufene iwame siane awake enarainisike mune dakisia weike nono wei, Ama weakuba iwame siafeisiro kunaro isafekua weike weiro enaenari uisa. ⁶Eno uisake iwame ei mamisake ekabaie adua abu keuwere mukaba ibake iwame ma babafine ui. ⁷Enoba emenu moi adara wana fisifisi uisaro emua unu kofiakane boudiro ane faka. Fakake adua abu waukake boudiro oisaro boudi sia raarayai wake fariro inuu yafisine uisi. ⁸Saimoni Fidama ibai erike Yesunu umu udiro iboo yanakaisari ukaada eno wei, Dai Waria Mi, nae merama merama ukeka miya na medinake imusu ania wei. ⁹Dawaini danu adua abu demuiro mune eneibisa orouini emuama i adua abu fefera ekake ibake ia sirie. ¹⁰Debedinu amarayai Deimisini Dionini emua Saimoninu adua abu demuiro mune eneibisa orouma ia sirie. Yesuma Saimonibake eno wei, ia da sia wei. Adua abu munaku enaenari dubuenaroe eme we mufiakua ia da sia wei.

¹¹Emenu boudiroma gibudiro fare isakake emenu eraerabusa yaisina meisake Yesunu umuro anisa.

Yesuma moi beko mami mi ma wiroi wake

¹²Yesuma moi goiro ibeibibaie moi beko mami mi dawaini i goiro ibeibi. Ibaada Yesu erike Yesubairo farike Danu umu udiro iboo yanakaisari ukaada eenu wei, Anu arara na ma wirofarine wefakuie na ma wiroina wei. ¹³Eno weibaie Yesuma wana sianike i mi ure burisada eno wei, ie Nanu araraya wei. Yesuma i beko me sia weibaie idua me sini. ¹⁴Yesuma i mibake nono wei, eme moibairo da wayai weake i ofereni ode sibore sianeka mibairo aniake ma iwoka uaro efi wei. Anu ofe ubu irauaiai yainua Mosesinu darawaduma weaku enaenari i bekoma ma merama ukakune orou ma wirokada ofereni odaisa enaenari uaro emema efisa wei.

¹⁵Yesuma eno weiroma nono emema Danu buna ukeka i oroorofa yaisinaro we eneibisa ibake arama ukeibirie orou keuwere Yesubairo wirofisane waure fareibirieka. ¹⁶Ibake Yesuma eme ibe me orofaro guriguri ufine aneibi.

Yesuma moi umu wana daba mami mi ma wiroi wake

¹⁷Moi odoro Yesuma we ma iwoka ukeibibaie Ferosi orou keuwere fakake naukeibisa. I Ferosi orouma Gareri goi goini Diudia orofaro goi goini Derusaremu goini iroma Yesubairo fakake Danu wake nauisa. I furo Godinu buna Yesubairo ibiba ibake Yesuma eme keuwere ma wirokeibirie. ¹⁸Moi orouma wana siane me umuma enare me mi boiso dubo uisake wearo ode waukake Yesubairo odifisaro ma wirofine waure faka. ¹⁹Eme keuwere uwara aisame dadau uisaba ibake uwara ubarenaro ane dauisa. Aisamero ane dauisake uwara fou fafaro amuisake i fou ma eba uisake i wana siane me umuma enare me mi danu boiso duboini weaini i bobo ebaroma owainanaku Yesu enare ibi orofaro oisaro isari. ²⁰Eno uisaro Yesuma emenu mi ba ma wirofeku ibai imukeka daiwere iwoka uike i mibake eno wei, Nanu amara, anu merama merama ukeka muneke imuke medinea wei. ²¹Yesuma eno wei ibaibake i darawadu ma iwoka ukeibisa orouini Ferosi orouini imukama eno wei imuisa, Dawa eno wenuba ibake Godinu ibi we ma okoanaku ukaku. Dawa aina? Godi mane emenu merama merama ukeka mufekuke imuke medifekua eno we imuisa. ²²Yesuma emenu we nauke ereka iwoka ukaada ibake emuabairo eno wei, yanu imukama eno anemebake imukaisa wei? ²³Yesuma eno weike wei, abodei wakema i arama mibake wemau? Anu merama merama ukeka mumauke imuke medimau wemauba, uyaake anu wea muake ania wemau arie wei? Abodei wakema arawere wei? Eno weike nono wei, anu wea muake ania wei. I dei wakema arawere wei nono anu merama ukaku ima imuke medimau wene wakeye ara me wei. Anemedei bunawere umauro Nanu buna efoisa wei? ²⁴I dooro eneibaku Ba Eme Sini Minu bunae daiwereba ibake emenu merama merama ukeka munakuneke imuke medakune. Yama ibai ma nuna unao ufoisaba eno umaua weike i wana siane me umuma enare me mibake nono wei, uyake anu wea muake anu goiro ania wei. ²⁵Yesuma eno weibaie i mima emenu ibooro idua uyarike danu wea munike Godi we ma irauaiai ukaada danu goiro ani. ²⁶Eno uiro eme yaisina dawa ekake imuka foria daiwere ukaada ia siriero Godi we ma irauaiai ukaada eno weisa, yewadei ubue kawama erisia weisa.

Yesuma Riwai u we muni wake

²⁷Yesuma i goi idua medike ani. Aneibibaie moi dakesi oi muneka mi, danu ibiye Riwai, dawae danu dakesi oi muneka uwararo yaure ibiro eri. Yesuma erike i mibake eno wei, Nanu umuro aarake Nanu iwoka ukeka mi sia wei. ²⁸Eno weiro ibake i mima uyarike danu ukeibi eraerabusa yaisina medike Yesunu umuro ani.

²⁹Riwaima dai banauwere Yesubake ui. I dai banauwere uiro i dakesi oi muneka orouini moi eme keuwere i banau ifisane faka. ³⁰Emuaini Yesunu iwoka ukeka orouini demuiro uruna iseibisa. Eno ukeibisaro i Ferosi orouini i darawadu ma iwoka ukeibisa orouini emuama Yesunu iwoka ukeka oroubake kamena weada eno weisa, yaini i dakesi oi muneka orouini i merama merama ukeka orouini yade anemebake demuiro uruna isaisa weisa? ³¹Eno weisaro Yesuma emuabake ma owerike eno wei, i arama uke me oroubake weroma i arama ma wirokeka mi aare dakinuke i arama uke ibinisa oroubake wenuke aarinua wei. ³²I ari enoe i irau oroubake wemane wayo aare dauneke i merama merama ukeka oroubake yanu merama merama ukeka imuke mediawe wemane ibake wayo fanea eno wei.

I uruna kau ukekaini we nauke erekabake wei wake

³³Moi orouma Yesubake eno weisa, Dioninu iwoka ukeka orouma emenu bisaraba ibake odo keuwere uruna ise dakaada kau ukaisake guriguri ukaisa, enaenari i Ferosi orounu iwoka ukeka orouma eno ukaisa. Nono Anu iwoka ukeka orouma eno uke dakaisake urunaini aduaini sara mune isaisaya eno weisa. ³⁴Eno weisaro Yesuma emuabake ma owerike eno wei, yama imukaisabai yanu wayo kofiakaisa orou i aweka awoena mufeku minu banauro uruna da ifeisake me ibifeisake anifeisa? I ari eno me! ³⁵Nono moi odoro i aweka awoena mufeku mi waure anifeisaie i orou uruna da ifeisake kau ufeisaya eno wei. ³⁶Yesuma emuabake eno weike nono wei, Mosesinu adina darawaduini Yesunu awoena wakeini da ma demuiro ufoisaya weada ibake yewa wake emuabake dubo waure weike wei, moi mima awoena wau da ma babareroma i awoena wau fekama adina wau sia ebaro da fifini ufeku wei. Eno ufekuie i awoena wauini adina wauini emenu ubue imusu imusuba ibake awoena wauini adina wauini merama sifekua eno wei. ³⁷Yesuma eno weike nono moi wake eno wei, ainama awoena waini adua i adina abu ofero iifekuie i awoena wainima i adina abu ofe ma babanao ufekuke isanao ufekuba ibake i awoena waini adina abu ofe ma merama ufekua wei. ³⁸Eno unao ufekuba ibake i awoena wainie i awoena abu ofero iifeku wei. ³⁹Nono ainama adina waini mane ifekuke nono awoena waini arara dafekuro wefekuie, i adina wainiye irauaiaiya weadabake eno ufekua wei. Yesuma Mosesinu adina darawadu wakeini Danu awoena we ma iwoka ukeka wakeini ibake yewa dubo waure weeka wake i ari eno wei.

I sabadi odobake we nauke ereka wake

¹Moi sabadi odoro Yesuini Danu iwoka ukeka orouini konoura waiya ubarenaro fare fisii yare anaada Danu iwoka ukeka orouma konoura ma roiroi yaraada wanama ma buruburu yare isaada enereibisa. ²Eno uisaro i Ferosi orouma ekake eno weisa, anemebake i ari eno ukaisa weisa? Iyanu darawaduma weaku, sabadi odoro eno da uforo weakubairoma nono anemebake eno ukaisa weisa? ³Eno weisaro Yesuma emuabake ma owerike eno wei, yanu dai sisia mi Deiwidini danu orou emua desini uriero uruna muneibisa i dadaa ya bukaro kakuraisaba me wei? ⁴Yesuma eno weike nono wei, Deiwidi dawae desini uriba ibake Godinu uwara ubarenaro amuike weiro i dai ofereni ode sibore sianeka mima Godinu ereibi iifa buredie i dai sosi uwara yawokeibisa orou mane iseibisa buredi mairo munike isaada danu oroubairo mariero isaya wei. Emuae eno uisaro Godinu darawaduma emua unu koreka daaba dadau uke dakakua wei. ⁵Yesuma eno weike emuabake nono wei, i Ba Eme Sini Mi Dawae i sabadi odonu ubi mi. Enoba Dawama i odo idua yawokeibakua eno wei.

I wana merama bobo mibake wei wake

⁶Moi sabadi odoro Yesuma i Du orounu sosi uwara ubarenaro amuike we ma iwoka ukeibi. We ma iwoka ukaada eribaie moi baena wana merama bobo mi idua yaure ibiro eri. ⁷I darawadu we ma iwoka ukeibisa orouini Ferosi orouini emuama Yesu erenewaa ukaada Yesuma i wana merama mi ma wirofekuba me arie weisake ibake Yesu erenewaa ukaada we makakake eno weisa, i mi ma wirofekuie Dawa wayai wefeisia weisake ibake ereibisa. ⁸Yesuma emenu imuka ubarenaro imukeibisa ibai iwoka sinike i wana merama mibake eno wei, yewado Na ubiubi aarake enaa wei. Eno wei ibake i mima danu yaure ibi orofaroma uyarike Yesu ibi udiro ane enari. ⁹Ane enariro Yesuma i oroubairo eno wei, abodeima irauaiai, yewa mi dawa sabadi odoro unu komauba ba ma merama umau wei? Dawae ma wiromau imukaisaba ba ma feamau imukaisa wei? ¹⁰Eno weike i orou yaisina busikai ma oweowere uke erieke i wana merama mibake eno wei, anu wana siaa weiba ibake i mi dawa danu wana sianibaie danu wana gienabu sinike idua wiroi. ¹¹Eno uiro i orouma ibai ekake imuka ka daiwere uisake eno weisa, Yesu Dawa aneaneme ufeisi ari we makaka.

Yesunu afasoro orou yaisina duwero (12) we mune demuiro odirie wake

¹²I odoro Yesuma oraararo guriguri ufine amuke ani. Oraararo amuke anike Godibairo dumu yafa guriguri ukaini. ¹³Wai awanakuro Danu umuro eneibisa orou yaisina u weiro Dawabairo faka. Fakaro i faka oroubairoma eme duwero (12) mane we murieke emuabake yae afasoro oroua wei. ^14-16I orounu ibi ibiye yewado, Saimoni, danu moi ibiye Fida mami. Fidanu nabueye Enuduru. Fidaini Enuduru aidakaini Deimisini Dionini Firifuini Badoromiaini Madiuini Domasini Arofiesinu amara Deimisini, moi Saimoni, dawae Keinani goi mi, dawaini Deimisinu amara Diudiasini moi Diudiasi Ikariada, Dawae Yesu we forairo muka mini, Yesuma i orou yaisina we mune demuiro odirie.

Yesuma we ma iwoka uke nono arama orou ma wiroke eno ukeibirie wake

^17-18Yesuini Danu iwoka ukeka orouini i oraararoma fakaro isare aaka. Yesunu umuro eneibisa eme feferaini Diudia orofa orouini Derusaremu goi orouini dawararo goiyai Dairaini Saidoni orouini eme keuwere Dawabairo Danu wake naufisake emenu arama imusu imusu urie ibai wirofisane fakaro emua ma wiromirie. Yesuma i seidaninu merama imumu bobo orouini emua ma wiromirie. ¹⁹Yesunu buna Dawabairoma fare aniba ibake i orouma Yesu ure burisake wiroisa.

Rooro ukekaini imukari ukekabake wei wake

²⁰Yesuma Danu iwoka ukeka orou eraada eno wei, Godinu ure yawokaku orofa ya meramawere ibeka orou yanua rooro uawe wei.

²¹Yae awoena desini urakuneba nono dubuenaroe Godima ya unu koreifiakuro me irauaiai ibifoisa ibai imukada rooro uawe wei. Nono awoena ii weaisakema nono dubuenaro yo wefoisaya rooro uawe wei.

²²Yae i Ba Eme Sini Minu orouba ibake eme moima yabake imuka ka uke yafiakaisake yabairo me sara merama ufeisake yanu ibi we ma merama ufeisa. Eno ufiakaisaie rooro uawe wei. ²³I odoro eno yabairo ufeisaroma nono yanu moko muneka daiwere urero mufoisaya rooro uaweke rooro daiwere ufoisa ibai imuaweke bibi uraada amuke isare uawe. I orounu oinamukuma Godinu we bou ukeibirie oroubake enaenari meramawere ukeibisa.

²⁴Ya eraerabusa keuwere orou erenewaa uforo! Yama awoena irauaiai ibinisaroma nono yanu eraerabusa yaisina sabu me sifekuba ibake meramawere ibifoisa. ²⁵Ya awoenae uruna isaisaro boana urakune orou erenewaa uforo, yama dubuenaroe desini daiwere ufiakuro ifoisa uruna meba ibake ii wefoisa. Awoena yae rooro ukaada yo weaisakema nono dubuenaroe imukari ufoisake ii wefoisaya eno wei.

²⁶Emema ya we ma irauaiai mane ufeisaie erenewaa uforo! Emenu babaemukuma i meo we bou ukeka oroubake enaenari we ma irauaiai mane urieka.

I wasai oroubake imukari ukeka wake

²⁷Yesuma i wake eno weike nono wei, ya Godi imukaisa oroubake wake wemaro nauawe. Yaini wasai ukaisa oroubake imukari uaweke emema yabairo imuka ka uke yafiakaisaie emuabairo irauaiai uawe wei.

²⁸Emema yabairo wake merama wefeisaie emuabairo irauaiai wake weaweke nono yabairo meramawere ukaisa oroubake Godibairo guriguri uawe wei. ²⁹Ainama ya omeafera ufiakuie nono moi enaini ma oweawero ufia. Ainama yanu sedi mufekuie yanu dei barukekaini dawabake maewe wei. ³⁰Aina ainama eenu wefeisaie emenu wefeisa rabu emuabake mayakawe. Ainama yanu eraerabusa mufekuie nono da we muawe. ³¹Emema yabairo aneme ufisane wefeisaie emuabairo enaenari uawe wei.

³²Emema yabake imukari ukaisaro emua moko imukari ukaisaie irauaiairoma nono Godima yabake ya irauaiai orou da wefekua eno wei. Inu ubiye i eme yaisinaini i merama merama ukaisa orouini enaenari emenu emenu imukari uke makanaisa.

³³Yabairo ainama irauaiai moko moko uke makafoisa nono anemebake urero moko mufone ufoisa? I merama merama ukaisa orouini enaenari ukaisa. ³⁴Emema yabairo anemerabu eenu wefeisaro makaada eno we imufoisa, emuabairo dubuenaro moko mumau we imufoisaie nono anemebake urero moko mufone ufoisa? I merama merama ukeka orouini enaenari ukaisaya eno wei.

³⁵Yaini wasai ukeifeisa orou imukari uyakaweke emuabake ukeka irauaiai uaweke emua we muyakawe. Eno ufoisake mokobake imuke dafoisaie yanu urero moko daiwere mufoisa. Eno ufoisaie yae i urero ibinu Godinu amaraku sifoisa. Yanu Godi Dawae irauaiai. Dawae i imuke dakaisa orouini i omi ukaisa oroubake emuabairo irauaiai ukakune. ³⁶Iyanu Babae Godima eme yaisinabake imukari ukakune enaenari uawe Yesuma eno wei.

Moi orounu ukeka sineka ere weekabake wei wake

³⁷Yesuma eno weike nono wei, moi oroubairo moi mi me sara wayai da wefoisaie Godima ya wayai da wefekua eno wei. Nono moi oroubake me sara wayai wefoisake fanisi mafiakaisaie nono Godima enaenari yabake wayai wefekuke fanisi mafiakua eno wei. Moi orounu merama ukeka imuke medifoisaie Godima yanu merama ukeka imuke medifekua eno wei.

³⁸Moi oroubairo mafoisaie nono Godima yabairo mafiakuke nono moibai deiro makeifiakuro oraara ukeebe wake fafeku. Aneme aneme mafoisaie enaenari yanu moko mufoisaya Yesuma eno wei.

³⁹Yesuma emuabake moi wake dubo waure weike eno wei, naisa kikori bobo mima moi naisa kikori bobo mi wanaro mamifekuke waure anifekuie i miyai emuae kafururo isafisisia eno wei.

⁴⁰I uke iwoka ukaku miye danu sisa mi ma bereke me. Nono i uke iwoka ukeibaku mi dawa i we ma iwoka ukeibaku mi ari eno i yaisina iwoka ukakuie danu sisa mi ari sinakua eno wei.

^41-42Yesuma eno weike wei, nono iyanu imuka ubarenaro meramako efekema ai dubuenaro wefene ibake eno wei, anemebake moi minu naisaro ifurunaku erenewaa ukaisake nono yanu naisaro ibinu ana kuku ari ifuruwere ere dakaisa? Anemebake eno weaisa, kaka, ukeka meramawere dai me ifurunaku ari mune siama weaisake nono yanu naisaro ukeka meramawere, ana kuku ari ibinuro ere dakaisa? Ya meomao weaisa orou yanu naisa ubarenaro ibinu ana kuku ko mune siaweke erenewaa uaweke nono yanu kaka nabuenu naisa ubarenaro ifuru mune siawe wei. Yesuma emenu merama merama ukekabake dubo waure weada yewa wake i ari eno wei.

Moi anaini danu kaibake wei wake

⁴³Yesuma nono wei, irau ana dawa merama kaibai da uwafekuro nono merama ana dawa irau kai da uwafekua eno wei. ⁴⁴Irau ana warafekuie irau kai uwafeku. Nono merama ana warafekuie merama kai uwafeku. Moi anama irau kai uwafekuie irau anaya wefeisa. Nono moi anama merama kai uwafekuie merama anaya wefeisa. Aneme aneme ufeku enaenari wefeisaya eno wei. Boruba kai sinisini bobo anaro mune dakaisaya eno wei. Imusu anaro fasiforo naadidi kai ari iro mune dakaisaya eno wei. ⁴⁵I ari enoe, i irau mima irauaiai wake weakuie danu imukaro ino mebake irau wake mane weaku. Nono i merama mima meramawere wake weakuie danu imukaro ino daiwere ibinuba ibake merama wake mane weakua eno wei. Moi mima danu imuka ima wake farakuba ibake i ari eno mane weibakua Yesuma eno wei.

Uwara ma enareka miyai emenu wake

⁴⁶Anemebake Nae iyanu Dai Waria Miya weaisake nono Nanu wake nauke dakada imuke dakaisa? ⁴⁷Ainama Nabairo fafeisake Nanu wake naufeisake enaenari ufeisa, i oroue i ari eno we enaenari umiaua wei. ⁴⁸Moi mima uwara ma enafine ui. Uwara kukubukai eba yafawere daune isare anike kukubukai oma duboro sianike omaini dooini sianike usima yanairo ara sini. Danu uwara eno ubu uiro obini okuini fakikema ma doroo yare dauisi. ⁴⁹Nono moi orouma Nabairo fafeisake Nanu wake naufeisakema nauke medifeisa i oroue i ari eno we enaenari umiau. Moi mima uwara ma enafine uikema kukubukai siane dauike me adua gibudiro ma enari. Eno uiro obi isarike oku farike i minu uwara sabu ma doroo yariro i uwara idua me sini. I enaenari emema Nanu wake da naufeisaie sarawere ufeisaya Yesuma eno wei.

Yesuma moi Romani ame kafudeni minu waiya ukeka mi ma wiroi wake

¹Yesuma Danu we ma iwoka ukeibi wake i oroubairo we me sinike kafenamu goiro ane fari. ²Ane fariro moi Romani ame kafudeninu waiya ukeibi ubi mi arama uike feafine ukeibi. ³Ukeibiro moi orouma Yesunu eme ma wirokeibirie wake weisaro i ame kafudeni mima nauike danu waiya ukeka mi ma wirofine moi Du dai orou Yesubairo we odairiero anisa. ^4-5Anisake ane Yesubairo faka. Yesubairo fakake eenu weada eno weisa, i miye irauaiai mi, dawae iya Du oroubake imukari ukakuni. Dawama iyanu sosi uwara ma enaria weisa. ^6-7I orouma eno weisaba ibake Yesuini emuaini demuiro owere anisa. Daaba yafa me ekanaku aneibisabaie i ame kafudeni danu we odairie naiyemukuma fakake Yesubairo i minu wake eno weisa, Dai Mi, nae irauaiai mebake Abairo fare daunea nanu uwararo da aarake wake mane wearo nanu waiya ukeka mi wirofi wea eno fare weisa. ⁸Nae dai ame miroma nono moi dai orouma na yawokakunekaro nono nama ame orou keuwere yawokakuniaya eno wei. Ibake nama moi mi a ania weakunero anaku. Nono moi mi a ewaro aara weakunero aaraku. Nanu waiya ukeka mibairo a eno ua weakunero enaenari ukakua weakune weia weisa. ⁹Eno weisaro Yesuma i wake nauike imuka foria ukaada owere eraada Danu umuro aareibisa oroue keuwerebake ma owerike eno wei, i wake naukaisa? Ya Isaraera oroubairo yama Na imukeka imuka i ari eno fou ure daunea eno wei. ¹⁰I Minu naiyemukuma Yesu meisake i minu uwararo owere anisa. Ane fakake ekabaie i arama uke ibi mi wiroikeibiro eka.

Yesuma moi wabu awekanu amara feariro ma uyari wake

¹¹Moi odoro Yesuini Danu iwoka ukeka orouini moi eme keuwereini emuama Neina goiro anisa. ¹²Anisake i goiro fareibisabaie i goi orouma moi feari mi uwararoma ooru ubarenaro odifisane waure aneibisa. I feari mi danu amaeye wabu aweka danu amarae i una demui mane. Enoba i wabu aweka dawabairo moi amaraku me. I wabu awekaini i goi orouini emuama aneibisa. ^13-14Aneibisaro i Dai Waria Mima i wabu aweka erike imukari daiwere ukaada eno wei, ii da wea weike anaada i feari minu wearo yabairo i wearo oisake waure aneibisa orouma idua enaka. Enakaro Yesuma eno wei, awoena mi, uyaa wei. ¹⁵Eno weibaie i mi idua uyare yaurike wake wei. Yesuma i mi danu amaebairo nono ma owere anu amara idua weike mai. ¹⁶Yesuma eno uiro i orouma ia siriebake Godi we ma irauaiai ukaada eno weisa, awoenae i daiwere we bou ukeka mi iyabairo uyarinua weisa. Awoenae Godima Danu orou unu kofiane ukakuro eraisia eno weisa. ¹⁷Yesuma i uibai i Diudia orofaroma aboro aboro moi goi goiro we eneiareibisa.

Dioni babadaido mibairoma wake waure faka oroubake wei wake

^18-19Dioninu iwoka ukeka orouma i wake yaisina Dionibairo weisa. Eno weisaro Dionima danu iwoka ukeka miyai weiro dawabairo ane fakiro Dionima eno wei, iyanu Dai Waria Mibairo aniawake eno weawa, ae iyanu koro ukaisi Mesaiaba moi mima fafekuro efeisi ariya weike euwa, aniawake we nauke eawa wei. ^20-21Eno weiro i miyaima anisike Yesubairo fakibaie Yesuma arama imusu imusu urie orouini umu beobeo bobo orouini naisa kikori bobo orouini seidaninu merama imumu bobo orouini emua yaisina ma wirokeibiriero ekike Yesubake eno weisi, Dioni babadaido mima uwa we odainuro danu wake Abairo wefune aare farisua weisi. Eno weisike Dioninu wake eno weisi, Ae iyanu koro ukaisi Mesaia A iduaba moi mima fafekuro efeisi weisi? ²²Eno weisiro Yesuma emuabake ma owerike eno wei, oweawake Dionibairo aniawake yanu awoena eraisi iini naukaisi ibai yaisina dawabairo eno weawa, i naisa kikori bobo orou emuae eraisaro i umu beobeo bobo orou emuae gienabu enaraisaro i beko mamakune orou emuae wirokada ofe irauaiai ibinisaro i ome gogore nauke me koko orou emuae naukaisaro i fearaisa oroue fearaisa iroma ma uyarakuniaro i meramawere ibinisa oroubairo Godinu wake weaisa eno weawa wei. ²³Ainama Na ma nuna da ufarakuke Na mede da ufarakuie Godima dawa ma irauaiai ufekuro rooro daiwere ufeku. Dionibairo owere aniawake i wake eno weawa Yesuma wei.

^24-25Dioninu wake weeka miyai emua Yesu meisike owere anisiro Yesuma i ku siane ibisa orou eraada emuabairo Dionibake eno wei, I eme ibe me yao nauwaro anemerabu efone anisa? Oyauma ouwa koe ma amani amani ukaku ari eno buna me mi efone anisa? Anemerabu efone anisa? Irauaiai oi daiwere wau mune barukaku mi efone anisa? I irauaiai wau danu make munekae daiwere orou emuae eme ibe me orofaro ibe dakaisake i dai yawokeka orounu uwararo ibinisaya eno wei. ²⁶I mede anemerabu efone anisa? I we bou ukeka mi efone anisa? Nanu wake nauawe, dawae okoanaku we bou ukeka mi me. Dawae daiwere we bou ukeka miwere. ²⁷Godinu bukaroma nono dawabake eno weaku, ea, Nanu fo weeka mi dawako we odaimauro anifekuke Anu daaba wabuke ma gienabu ufekuroma Ae ai dubuenaro anifakua ea weakua wei. ²⁸Eno weike nono wei, Nanu wake nauawe Yesuma eno wei. I furo yewa dooro awekaboma doreibirieka orou emua yaisinabairoe Dionoma daiwerero nono i oroue okoananaku. Danu ukeka waiya okoanaku me daiwereke danu waiyae bokairo. Ie ba. Nono Godinu yawokaku orofaro awoena yawokakune roiya me oroue okoanaku mero daiwere nono Dioni danu adinaro waiya ukeibi i furo dawae okoanaku ari Yesuma eno wei.

²⁹Eno weiro i orouini dakesi oi muneka orouini nauisake emuae adinaro Dionibairo babadaido uisaba ibake Godi we ma irauaiai uisa. ³⁰Nono I Ferosi orouini Mosesinu darawadu we ma iwoka ukeibisa orouini emuama Godi imukekabai eka meisaba ibake Dionibairo babadaido uke dauisa.

³¹Yesuma nono wei, yewa ibinisa oroude abo orou arie? Yewa oroue aneme ari wemau? ³²Yewa oroue amarananaku ari weakune. Amarananakuma akaka naisaro yauraisake emenu naiyemukubake eno weaisa, buma uraisiro ya yaura ure dakaisa. Sorara ukaisiro yae sorara uke dakaisaya weaisa. ³³Dioni babadaido mima farinuke moi uruna imusu imusu ise dakinuke wainini ise dakinuba ibake yama weaisa, dawae seidaninu merama imumu bobo miya weaisa. ³⁴I Ba Eme Sini Mima farinuke moi imusu imusu urunaini waini aduaini isinuro yama eno weaisa, Dawae uruna eira mi ibake waini isinuro beforo merama ukinu miya weaisa. Dawae dakesi muneka orouini merama merama ukeka orouini emenu naiye weaisaya wei. ³⁵Eno weike nono wei, I Ba Eme Sini Mini Dionini emua Godinu demui waiya ukaisi ibake i Godinu wake naukaisake emua eraisa orouma Godinu ukeka sineka baya imukaisa Yesuma eno wei.

Yesuma i Ferosi mi Saimoninu uwararo ani wake

³⁶Moi Ferosi mima Yesubake eno wei, nanu uwararo aarake uruna ia wei. Eno weibake Yesuma i minu uwararo ani. ³⁷Anike uruna ifine yaure ibibaie i goiro moi merama merama ukeibi awekama Yesu iro farinua ibai nauike anike irauaiai urumu adua omama ubu uisa kawaburo iise waurike uwara ubarenaro amuke fari. ³⁸Yesu yaure ibiro i awekama Danu derena enaro fare enare ibaada ii weibiro ii du Yesunu umuro isareibi. Isareibiro nono i awakama Yesunu umu danu yafawere fouma idima ma isurike Yesunu umu oo uike i irauaiai adua munike Yesunu umuro ma oiniro i adua Yesunu umuro kari.

³⁹Eno uiro i uruna ui ubi mi dawa Ferosi miba ibake dawama erike eno we imui, yewa miye we bou ukeka mibaironae danu ofe ure burisaku awekae merama merama ukeka bobo awekaya ibai Dawa iwoka sifine we imui. ^40-41Eno we imuiro Yesuma i mibake eno wei, Saimoni, Nanu wake wemaro naua wei. Eno weiro i mima wei, Sisa, anu wake wearo nauma wei. Eno weibaie Yesuma wei, moi miyaima moi mibairo oi we muki. Moi mi dawa daiwere fai aderedi kina (K500) we muni, Nono moi mi dawae daiwere me fifidi kina (K50.00) mane we muni. ⁴²I miyaima eno uisikema nono dubuenaro moko makekabai oi mebake i minu moko make dauisiro i oi marie mima mediawa wei. Eno weiro abo mima i oi marie mibake imukari daiwere ukaku wei? Imuke ea, Yesuma eno wei.

⁴³Yesuma eno weiro Saimonima wei, na imukakuneie eno, i oi daiwere we munike danu oi moko make daui mi dawae imukari daiwere ukakua wei. Eno weibaie, Yesuma wei, ba weakua wei. ⁴⁴Yesuma eno weike owerike i aweka eraada Saimonibake nono wei, yewa aweka eraaku? Nae anu uwararo amunebairoma ama Na umu urokeka adua make danararo i awekama Nanu umu danu ii duma urokinuke nono danu fouma idima ma isurinua wei. ⁴⁵Eno weike nono wei, ama Na yabake oo uke danararo nono dawama Nanu umu oo ukaada ibinua wei. ⁴⁶Ae Nanu iiriro irauaiai urumu adua ma oine dakinuro dawama Nanu iiriro irauaiai urumu adua ma oininua wei.

⁴⁷Enoba abake weakune i awekama Nabake imukari daiwere ukaada ibinubake danu dai meramawere ukeka muninuke imuke medinua wei. Ainama merama ukeka dai menaku imuke medakuro dawae imukari dai menaku mane ukakua wei. ⁴⁸Eno weike i awekabake nono wei, anu merama merama ukeka Nama muneke imuke medine wei. ⁴⁹Eno weiro i yaure ibaada uruna iseibisa orouma nauisake we makanada eno weisa, i merama merama ukeka mune imuke medaku mide ainadei, weisa? ⁵⁰Eno weisaro Yesuma i awekabake wei, anu imukekae daiwereba ibake wirokinua aniake me irauaiai ibia eno wei.

Yesuini aneibisa awekabobake wei wake

^1-2Moi odo odoro Yesuma Godinu yawokaku orofabake irau wake moi goi goiro we eneiareibi. Danu iwoka ukeka orou duero (12) Dawaini anisaro Yesuma seidaninu merama imumu bobo arama uke ibisaro ma wiroi awekaboini moi awekaboini Dawaini eno anisa. Moi awekanu ibiye Meri Magidarini weaisa aweka, Yesuma i awekanu imuka ubarenaroma seidaninu merama imumu seweni (7) we yowerieke i aweka ma wiroi. ³I awekaini Dusanu aweka Doana, danu eme Dusae Erodinu waiya ukeka orou yawokeibirie mi. I moi aweka ibiye Susanaini nono moi awekabo keuwereini emuama aneibisake Yesuini Danu iwoka ukeka orouini emuabairo urunaini oini makeibirieka.

I yo sianeka mibake dubo waure wei wake

^4-5I goi goi orou keuwere fare ku siakaro Yesuma emuabake dubo waure wake weada eno wei, moi mima yobai waifine waiyaro ani. Ane farike diru muni. Diru mune me sinike yobai munike siane eneibi. Yobai siane eneibiro yo moibai daabaro isakaro emema duboro amuke adiadi yare aneibisaro nono gasiroma iseibisa. ⁶Nono moi yobai oma firifiri bobo dooro isakake sabu kua fareibisaro nono doo ubarenaro gibudike doo ubarenaro adua fofo meba ibake boke ure me sika. ⁷Nono moi yobaie sinisini bobo ou kunu ubarenaro isakake irau warakakema nono ou kunuwereba onu eriro kai uwane dauisa. ⁸Nono moi yobaie irau dooro isakake irauaiai warakake kaibai keuwere uwaka. Yo kai demuima moi kaibai wani aderedi (100) uwania weike wei, i ome bobo oroue ya Nanu wake naukenewaa uawe wei.

Ibake i wake dubo waure wei

^9-10Danu iwoka ukeka orouma Yesubairo eno weisa, i dubo waure wenu i wakenu ubide aneme ari weisa. Eno weisaro Yesuma ma owerike emuabake eno wei, Godinu ararae yama Danu ure yawokaku irau fe wakenu ubi iwoka ufone ibake ma boroo yarakunekema nono i moi emebairo dubo waure weeka wakeroma weakune. I orouma i wakenu ubi ma nuna ukaisaba ibake awoena eraisakema ba bai ere dakaisa. Ibake naukeka naukaisakema nono ba bai nauke dakaisaya wei.

Yesuma i yo siane eneibi minu dubo waure wei wake ma boroo yari wake

¹¹Yesuma eno weike nono wei, i dubo waure wene wakenu ubiye eno, i yobaie Godinu wake ari. ¹²I daabae Godinu wake naukaisa orou ari. I miye Godinu wake we enarakuro i daabaro enereibeka orouma Godinu wake naukaisaro seidanima sabu farakuke i naukaisa wake idua ma nuna ukakune, i orouma naunao ufeisake wironao ufeisaba ibake eno uke yarakune. ¹³Enaenarie moi orou emua oma firifiriwere dooro siani, i ari eno emuama Godinu wake naukaisake rooro ukaisaro Godinu wakebake awe waa emuabairo farakuro ibake weada Godinu wake naukenewaa uke dakaisake emenu Godi imukeka imukae irauaiai me. Emenu imukekae irauaiai mebake i wake medaisa. ¹⁴Moi oroue i ou kunuwere orofa ariba ibake Godinu wake naukaisakema nono emenu imukeka imusu imusu imukaisake emenu arara eraerabusa munaisake emenu arara yaisina ukaisake i wakenu daaba dadau ukaisaba ibake irauaiai ukenewaa dakaisa.

¹⁵Nono moi orou emuae i irau dooro isakake irauaiai waraisa ari eno, Godinu wake naukaisakema nono emenu irau imukama imukenewaa ukaada irau wake wenewaa ukaisake ibenewaa ukaada irauaiai ukenewaa ukaisaro emema eraisaya Yesuma eno wei.

Okea wowonaro ramefabake wei wake

¹⁶Yesuma nono eno wei, ramefa biafoisake okea wowonaroba sebo wowonaro odifoisa? I ari eno ufoisa? Me, eno da ufoisa! Ramefa mune biafoisaie aiso odeka orofaro aiso odifoisaro eme aweka i edoro eraada ibifeisaya wei. ¹⁷Enaenarie Godinu yawokaku orofabake fema imuke bou ukaku eraerabusa yaisinaini i fema ukeka yaisina ma boro yafekuke edororo odifekuro eraada iwoka ufeisaya eno wei. ¹⁸Enoya i naukeka eraerabusa aneaneme wefeisaie naukenewaa uawe wei. Ainama naukenewaa ufekuie Godima moi naukeka dawabairo mafekua wei. I daiwere naukaku mibake moi naukeka mafekuke nono i demuinaku imukaisa orouma we imukaisa, nanu naukekae iduaya we imukaisaie emenu dai menaku naukaisa ibai mareke mufiakua wei.

Yesunu amaeini Danu naburakaini emenu wake

¹⁹Yesu Danu amaeini Danu naburakaini Yesubairo anifisane faka. Ane fakakema nono eme keuwere fare ku siane ibisake i daaba dadau uisaba ibake Yesubairo ane fare dauisa. ²⁰Ane fare dauisake ewa dewa enare ibisaro moi orouma emua eriekake Yesubairo ane fakake eno weisa, Anu amaeini naburakaini A emekane aarisake uwara udiro enare ibinisaya eno weisa. ²¹Eno weisaro Yesuma emuabake eno wei, Nanu amaeini Nanu naburakae Godinu wake naukada enaenari ukaisa oroue emua iduaya eyakawe wei.

Yesuma i kuna ufe we kuuri wake

²²Moi odoro Yesuini Danu iwoka ukeka orouini boudiro amukaro Yesuma eno wei, kuna ekabokenaro siraa yafe wei. Eno wei enaenari aneibisa. ²³Aneibisabaie Yesu nauka aine ibiro oyau daiwere fari. Oyau daiwere fariro kuna ufe daiwere uyariro boudi inuu yafine uiro i orou feafisane uisa. ²⁴I orouma Yesu ma uyakake eno weisa, Dai Waria Mi, iyae feafene ukaisia weisa. Eno weisaro Yesuma naisa forakada uyarike oyauini adua ufeini we kuuriro oyauini adua ufeini me sinike me mo ari sini. ²⁵Eno uiro Yesuma Danu iwoka ukeka oroubake eno wei, Na imukenewaa ukakunekaba me wei? Yanu imukeka aboro wei? Eno weiro Danu iwoka ukeka orouma ia sinaada imuka foria uisake we makanada eno weisa, yewa miye abo miro oyauini aduaini Danu wake naukisa weisa.

Yesuma seidaninu moi merama imumu bobo mi ma wiroi wake

^26-29I Gerasi orofaro seidaninu moi merama imumu bobo mima ibeibi. I mi dawae odo keuwere wau rune dakeibike uwararo aine dakaada i eme feareibisaro ane odeibirieka oma eraboro aineibi. I seidaninu merama imumuma i mibairo odo keuwere berukeibiba ibake emema i minu umu wana senima uwane kariseibisake yawokeibisa. Eno uke odeibisaroma i mima seni ma furufuru yareibiro i seidaninu merama imumuma danu derenaro amuiro eme ibe me orofaro ani. Yesuini Danu iwoka ukeka orouini emuama i Gerasi orofa kuna ekabokena iro ane enaka. I Gareri orofa moi enaroe i Gerasi orofa moi enaro nono i kunae abanaro ibi. I Gerasi orofaro ane enakaro Yesuma gibudiro isare enaribaie i seidaninu merama imumu bobo mima Yesu fou uri. Dawae Yesu fou uriro Yesuma i seidaninu merama imumubake eno wei, danu imuka ubarenaroma amuke ania wei. Eno weiba ibake i mima Yesu eraada ifoma kodudu yanakada daiwere eno wei, Yesu, dai urero ibinu Godinu Amara aini naini demui meya anemebake aarinu wei. Eno weike wei, na fanisi da maina wei. I Mi dawae odo keuwere wau rune dakeibike ofe mane enaada ba goiro ane dakeibike eme feareibisaro ane odeibirieka oma eraboro aineibi. (I seidaninu merama imumuma i mibairo odo keuwere berukeibiba ibake emema i minu umu wana senima uwane kariseibisa. Eno uke odeibisaroma i mima seni ma furufuru yareibike i seidaninu merama imumuma danu derenaro amuiro eme ibe me yao orofaro ani.) I mima Yesubairo aareibibaie Yesuma i seidaninu merama imumubake ania weibaie i mima Yesu eraada Yesunu umu udiro iboo yanakaisari ukaada wake daiwereroma eno wei, Yesu, Dai urero ibinu Godinu Amara nabake aneme ufane ukaku wei. Mediake na fanisi da maina wei. ³⁰Eno weiro Yesuma i minu ibi we nauke eribaie seidaninu merama imumu keuwere i minu imuka ubarenaro ibisaba i mima ibake eno wei, nanu ibiye keuwereya wei. ³¹Eno weiro i seidaninu merama imumuma Yesubake nono weisa, i merama orofaro iya da we odaiya weisa. ³²Eno weada ekabaie borosiri keuwere oraararo uruna iseibisaro ekake Yesubairo eenu weada eno weisa, iyanu ararae i borosirinu imuka ubarenaro amufene weaisia weisaro Yesuma wei, iro aniawe wei. ³³Yesuma eno weiba ibake i seidaninu merama imumu i minu imukaroma amuke fakake anisake i borosirinu imuka ubarenaro isaka. Eno uisa ibake i borosiri yaisina durame anisake oraara okoroma bibi ukake kunaro isare imu iseake feaka.

³⁴I borosiri yawokeibisa orouma i uisabai ekake goiro durame anaadae i goi orou yaisinabairo ibai ane wayai weisaro nauisa. ³⁵I goi orouma ibai nauisake efisane anisa. Ane Yesubairo i seidaninu merama imumu meisake anisa mi, dawae awara irauaiai uiro wau runike yaure ibiro ekake ia sirie. ³⁶Ibai ekake i seidaninu merama imumuini borosirinu uisa ibai eka orouma i awoena faka orou ibai yaisina weisaro nauisa. ³⁷I Gerasi orou yaisina ia daiwere iyakake Yesubake eno weisa, iyanu orofa mediake imusu ania weisaba ibake Yesuma boudiro anifine ane amui. ^38-39Ane amuibaie i seidaninu merama imumu me sini mima nono wei, naini anifu weibaie Yesuma meya weike wei, anu goiro aniake Godima abake imukari daiwere ukinu ibai yaisina wearo naufisa wei. Eno weiro i mima anike i goiro eme yaisinabairo Yesuma dawa ma wiroi ibai yaisina weiro nauisa.

Dairasinu arumaini Yesunu wauro ure burike wiroi awekaini emenu wake

⁴⁰Yesuma nono owerike Gareri enaro nono ani. Eme keuwere Yesu koro ukeibisabaie Yesu idua fariro Yesubake arie wake weisa. ^41-42Moi mi danu ibiye Dairasi, dawae moi Du orounu sosi uwara yawokeibi mi. Dawama Yesubairo farike Yesunu umu udiro iboo yanakaisari ui. I minu arumanaku una demuiba dawa arama uike feafine ukeibiro ibake Yesubairo farike eno wei, nanu uwararo aara wei. Eno weiro Yesuma i mi Danu uwararo ani. Aneibibaie eme keuwere Danu umuro enare waiyakake anisa. ⁴³I aneibisa ubarenaro moi aweka dawaini iini ani. I aweka dawae arama daiwere uike ibaada iwa mane dore aineibi. Oya duero (12) iwa mane doraada i arama ma wirokeka oroubairo anaada danu oi yaisina sianeibiroma danu arama irau sine dakeibi. ⁴⁴I awekama Yesunu dubuenaro farike Danu wau barunaro ure buribaie danu iwa doreibi ibai idua di kuuri. ⁴⁵Eno uiro Yesuma wei, ainama Na ure burinara wei? Eno weibaie i eme yaisinama iyae iwoka meya weisa. Eno weisaro Fidama eno wei, Dai Waria Mi, eme keuwere Anu umuro enare waiyare aaraisa iro ea wei. ⁴⁶Eno weiro Yesuma wei, ainama Na ure burinara ari. Nanu buna Nabairoma dawabairo ainuro Na karanea wei. ⁴⁷Yesuma eno weibake i awekama we imui, Dawae iwoka ukakua we imukadae ia daiwere sinike iura mamaada Yesubairo farike iboo yanakaisari ukaada danu arama irau sini ena wake idua i oroubairo weike eno wei, nae Dawa ure burinero nanu iwa dorakuneibai idua di kuurinua wei. ⁴⁸Eno weiro Yesuma ma owerike eno wei, aruma ama Na imukeka imukae daiwere ibake wirokinua weike nono wei, aniake me irauaiai ibia wei.

⁴⁹Yesuma eno weibaie moi mima Dairasinu uwararoma emuabairo farike Dairasibake eno wei, anu aruma fearinua Sisa Mibairo wake goro da wea wei. ⁵⁰Eno weiro Yesuma nauike Dairasibake eno wei, ia da siake imukenewaa uaro dawa wirofi wei. ⁵¹Dairasinu uwararo ane fakake Yesuma i orou yaisina medirieke Fidaini Dionini Deimisini i arumanu amae babaeini emua i uwara ubarenaro waure amurie. ⁵²Waure amukada nauibaie uwara ubarenaro yaure ibisa orouma sorara ukeibisaro nauike eno wei, ii da weawe. I aruma feare mero nauka kunawere aine ibinua wei. ⁵³Yesuma eno wei ibaibake i orouma yo weisa. I aruma dawae fearinuba nono da uyafekua weisake ibake yo weibisa. ⁵⁴Yesuma i arumanu wanaro munike eno wei, arumanaku uyaa wei. ^55-56Yesuma eno weibaie i ai dai sineibi arumanakuba idua imu sianada iroma uyari. Uyariro Yesuma eno wei, uruna dawa maaro ifi weiro danu amae babaema imuka foria uisi. Uisiro Yesuma emuabake nono wei, eme moibairo i wake da weawa wei.

Yesuma Danu iwoka ukeka orou duero (12) waiya marie wake

¹Moi odoro Yesuma weiro Danu iwoka ukeka orou duero (12) Dawabairo fake. Dawabairo fakaro emuama seidaninu merama imumu we yowefisake imusu imusu arama uke ibeka orou ma wirofiakane ibake emuabairo buna marie. ²I iwoka ukeka orou buna marieke eno wei, aniaweke Godinu yawokaku orofa irau wake weaweke imusu imusu arama uke ibinisa orou ma wiroyakawe wei. ³Nono waure aneka eraerabusa da muawe. Urini yoakeini urunaini oini moi wauini da mune aniawe wei. ⁴Moi goiro fafoisake moi uwara ubarenaro amufoisake ibaada yanu wake i goi oroubairo we me sifoisake anifoisaya wei. ⁵Eno uforo abo goi orouma ya da mufiakaisake yanu wake da naufeisaie yanu derena emua mayakaweke yanu umuro doo maisuawero efisake iya medimisane ukaisaya we imufisaro aniawe wei. Eno uawero Godima emua da mufiaku ibai emua iwoka ufisa wei. ⁶Yesuma eno weibake anisa. I goi goiro anaada Godinu irau wake weibisake i imusu imusu arama uke ibeibisa orou ma wirokeibirieka.

Erodima Yesu ma nuna ui wake

⁷Erodi, i gaemani orou yawokeibirie dai mima Yesunu ukeibi sineibi ibai nauike ma nuna ui. Eno uiro moi orouma eno weisa, Dionima fearike nono uyaria weisa. ⁸Nono moi orouma eno weisa, Iraida dawama fearike nono uyariba ibake owere farinua weisaro nono moi oroumae adinaro we bou uisa mima idua farinua weisa. ⁹Eno weibisaro Erodima nauike ma nuna ukaada eno wei, Dioninu nodo nama umane kuurebairo nono ainama i ari eno buna ukakuro naukakune wei? Eno weike Yesu efine yodia uke ani.

Yesuma i fai dausini orou uruna marie wake

¹⁰Yesunu afasoro orouma owekake aare Yesubairo fakake emenu goi goiro ukeibisa ibai yaisina weisa. I wake we me sikaro Yesuma Danu afasoro orou we murieke Besaida goiro waure anirie. ¹¹I fare ku siane ibisa orouma Danu anifine wei wake nauisake Danu umuro yowere anisa. Ane fakaro Yesuma emuabake arie wake weike Godinu irau yawokaku orofa wake emuabairo weike i arama uke ibisa orou ma wiromirie.

¹²Dumudumu sineibibaie Danu iwoka ukeka orouma Dawabairo fakake eno weisa, wearo i fare ku siane yaure ibinisa orou goiro anifisa weisake nono weisa, uruna aboro mune ifeisa awaya anifisa wea weisa. Yewadake goini sidowaini meya weisa. ¹³Eno weisaro Yesuma emuabake ma owerike eno wei, i orou uruna mayakawero ifisa wei. Yesuma eno weiro emuama weisa, iyabairo buredi faini (5) adua abu kai raaranakuyai mane ibinua eno weisa. Anifeke i oroubake uruna oima make mufene ibake weaku weisa? ^14-15I orou keuwerero nono emeakabai mane fai dausini (5000) iro ibisaba nono Yesuma Danu iwoka ukeka oroubake eno wei, i orou fifidi (50) fifidi (50) weawero kuku uke yaure anifisa wei. Enaenari weisaro yaure ibisa. ¹⁶Danu wei enaenari uke yaure ibisaro Yesuma i buredi faini (5) adua abu kaiyaini munike Godibairo we ma irauaiai ukaada guriguri uike ma birabira yarike Danu iwoka ukeka oroubairo mariero i kuku uke ibisa oroubairo naka naka uisa. ¹⁷Naka naka uisaro mune isaro boana urie. Ise me sikaro iuwabai mukake bosearo youisa. Bosearo youisaro bosea duero (12) wake faka.

Fidama Yesubake wei wake

¹⁸Moi odonaku Yesu Danu mane ibaada guriguri ukeibi. Guriguri ukeibiro Danu iwoka ukeka orou mane Dawa ubiubinaku yaure ibisa. Yesuma guriguri uke me sinike Danu oroubairo eno wei, emema Nabake ainadei weaisa wei? ¹⁹Eno weiro ma owekake eno weisa, moi oroumae Abake Dioni babadaido miya weaisaro nono moi orouma Ae Iraidaya weaisaro nono moi orouma Ae moi adinaro we bou ukeka miro fearikema nono uyarinuke farinua eno weaisaya weisa. ²⁰Eno weisaro Yesuma emuabake ma owerike eno wei, nono yadeie, Nabake aneaneme weaisa wei? Eno weiro Fidama wei, Ae Godinu Kerisoya wei.

Yesu Danu oferi waufekuke feafeku wei wake

^21-22Fidama eno weiro Yesuma wei, i wenu wakeye baya weike wei, i Ba Eme Sini Mima oferi daiwere waufekuro i Du dai orouini ofereni ode sibore sianeka orouini i Mosesinu darawadu we ma iwoka ukaisa orouini emuama Danu wake da naufeisaro Dawa ma fafeisaro odo buuba me sifekuro Dawa nono uyafekua wei.

²³Yesuma i ku siane ibisa orou yaisinabake eno wei, ainama Nanu umuro aafine ufekuie danu arara ukeka yaisina medifike Nanu arara ukeka mane korosi ari munaada Nanu umuro aafie wei. ²⁴Yesuma eno weike nono wei, moi mima danu ararae yewa orofaro mane me ibifine ufekuie idua me sara feafekuke fanisi ufekua wei. Nono ainama Nabake feafekuie dawa idua wirofekuke me ibene ibene ibeifekua wei. ²⁵Ainama yewa orofa akakaro eraerabusa yaisina mufekuke danu imuka ino da wirofekuke feafekuke i merama orofaro anefekuie ba meya wei. ²⁶Nono ainama Naini Nanu wakebake maru ufekuie i Ba Eme Sini Mini Danu buna aneruini emuama Danu arakekaini Godinu dai edororo fafekuie i mibake moko maru ufeku wei. ²⁷Nanu ba wake wemauro nauawe wei, moi me ibinisa orou da feafeisake Godinu yawokaku ibai efeisakema nono dubuenaro feafeisaya wei.

Yesunu iboo naisa imusu sini wake

²⁸Yesuma i wake we me sinike nono odo eida (8) me siniro Yesuma Fidaini Dionini Deimisini murieke emua we guriguri ufine oraararo amuke anisa. ²⁹Iro amuke ane fakake guriguri ukeibibaie Danu iboo naisaini wauini inanakeowere sinike edoro ari ui. ^30-31Eno uiie eme una raarayai me ari uke fakike Yesubairo wake weisi. Mosesini Iraidaini emuama Godinu arakekaro fakike Godinu arara Yesu Derusaremu goiro feafeku ena wake Dawabairo weisi. ³²Fidaini i miyaima nauka kunawere aine ibaada nauke dauisakema nono uyakake Yesunu arakekaini nono Yesuini demuiro enare ibisi miyai erieka. ³³Mosesini Iraidaini emuama Yesu meisike aneibisibaie Fidama Yesubake eno wei, Dai Waria Mi, iyanu yewado ibekae irauaiaiba okoa uwarananaku kai buuba ma enafeisiie weike nono wei, moiye Anu, moiye Mosesinu, Moiye Iraidanu eno ma enafeisia wei. Danu imukekae gienabu me ibake eno wei. ³⁴Fidama eno weibaie ouma farike emua ma yaariero ia sirie. ³⁵Ou ubarenaroma wake isare aarike eno wei, yewae Nanu Amara ubi, Nama Dawa we mune odea Danu wake naukeibiawe wei. ³⁶I wake eno weiro ekabaie Yesu Danu mane enare ibiro eka. Ibake i odoro emebairo i wakeini i ekabaini we dauisa.

Yesuma seidaninu moi merama imumu bobo amaranaku ma wiroi wake

³⁷Moi odo i oraararoma isare aakaro nono i odoro eme keuwere Yesu fou uka. ³⁸Moi mima i ku siane ibisa kuroma daiwere eno wei, Sisa mi, nanu amara ubiro moibai mero dawa manea imukari ukenewaa ua wei. ³⁹Moi odo odoro seidaninu merama imumuma nanu amaranu imuka ubarenaro isarakuro arua weakua wei. I seidaninu merama imumuma nanu amara ma birubiru ukakuro bebekuro begiri farakuro nono i seidaninu merama imumuma dawa mede dakakuke uraakua wei. ⁴⁰Eno ukakuba ibake Anu iwoka ukeka oroubairo i seidaninu merama imumu we yowefisane eenu wenero emuama i seidaninu merama imumu we yowere dakisaya wei. ⁴¹I mima eno weiro Yesuma wei, ya Godi imuke dakaada meomao ukaisa orou. Yabairo odo abea ibimauro imufoisa wei? Yesuma eno weike wei, anu amara waure aara wei. ⁴²Eno weiro i amaranaku waure aariro i seidaninu merama imumuma ma birubiru uke mune sianiro i amaranaku isare uri. Yesuma i seidaninu merama imumubake buna wake weike i amaranaku ma wiroike danu babaebairo mai. ⁴³Yesuma eno uiro i orouma ekake Godinu bunabake imuka foria uisa.

Yesu Danu feafeku wake nono wei

⁴⁴I orouma imuka foria uisaro Yesuma Danu iwoka ukeka oroubake eno wei, Nanu wake naukenewaa uawe wei. Godima da we kuufekuro Na moi orounu wanaro mame odifokaisaya wei. ⁴⁵Yesuma eno weiro Danu wei wake ma nuna uisa. Emua iwoka unao ufeisaba ibake Godima emenu imukeka daaba dadau ui. Ibake i orouma ia sinaada i wakenu ubi adaada we nauke ere dauisa.

Ainama daiwere arie wei wake

⁴⁶Yesunu iwoka ukeka orouma bebekuma wake we makanada eno weisa, iyabairo abo mima daiwere? ^47-48Yesuma emenu weibisa ibai iwoka uike moi amaranaku munike Danu aroro ma yaure odike emuabairo eno wei, ainama yewa amaranaku ari Nanu ibiro mufekuie Naini iini mufarakua wei. Nono ainama Na we mufarakuie Na we odaikara Godini we mufekua wei. Ainama yabairo okoanaku sifekuie dawa daiwereya wei.

Ainama yaini wasai uke dakakuie dawae yaini demuiro enarakua wei wake

⁴⁹Dionima Yesubake eno wei, Dai Waria Mi, moi mima Anu ibiro seidaninu merama imumu we yowereibiro ekikema nono dawae Anu iwoka ukeka mi meba ibake i ukeibibai media weisia wei. ⁵⁰Eno weiro Yesuma wei, mediawe da weawe wei. Ainama yaini wasai uke dakakuie ya unu korakunea wei.

Moi Samaria goi orou emua arara me Yesu we muneka ibake wei wake

⁵¹Yesunu urero amuke aneka odo fafine uiba ibake Yesuma Derusaremu goiro gienabu anifine ui. ⁵²Yesuma moi Samaria goiro Danu aineka koru uke bou ufisa orou we odairiero anisa. ⁵³Ane fakabaie i Samaria orouma Yesu emenu goiro Dawa ainekabai emua arara da sirie. Yesuma Derusaremu goiro anifine ui ibake emua arara me Dawa fareroma emenu goiro aineka. ⁵⁴Yesunu iwoka ukeka miyai Deimisini, Dionini emuama i wake nauisike Yesubairo eno weisi, Dai Waria Mi, i wake wefuro ureroma inaa isare aafekuke emua yare me sifiakua eno wefukuba me weisi? ^55-56Eno weisiro Yesuma emuabake bunawereroma wake eno wei, i weaisibai mediawa wei. Eno weiro i goi mesiake moi goiro anisa.

Godi imuke mero me imukama Yesunu umuro anifisane weaisa orounu wake

⁵⁷I daabaro aneibisabaie moi mima Yesubake eno wei, A aboro aboro anifakuie naini Anu umuro aamaua wei. ⁵⁸Eno weiro Yesuma wei, i nauwa abu emuae emenu uwara boboro nono i gasira emua emenu mowa boboro nono i Ba Eme Sini Mi, Danu aineka orofae meya wei. ⁵⁹Yesuma eno weike moi mibake nono wei, ae Nanu umuro aara weiro nono i mima eno wei, Dai Waria Mi, nanu babae feafekuro ooru uke odimaukema nono dubuenaroma Anu umuro aamaua eno wei. ⁶⁰Eno weibaie Yesuma wei, eno meya awoena Nanu umuro aara wei. Nanu umuro aare dakaisa orouma Nanu umuro aare mero me sara fearaisa orou ooru uke odifiakane weakunea wei. ⁶¹Yesuma eno weike i mibake nono wei, ae aniake Godinu yawokaku irau wake we enereibia wei. Nono moi mima Yesubake eno wei, nanu uwararo ibinisa orou yaisinaba ibake arie wake wemauke emua medimiauke Anu umuro aamaua wei.

⁶²Eno weiro Yesuma ma owerike eno wei, ainama Nanu waiya munakuke nono danu awararo arara ukeka imukada Nanu waiya medakuie owerakuke i mi dawae irauaiai mi meba ibake Godima dawa yawoke dakakua wei.

Yesuma sewenidi (70) oroubake waiya marie wake

¹Moi odo Yesuma sewenidi (70) eme emuako we odaifiaro anifisaro nono Dawa dubuenaro Godinu wake we anifine ibake emua we mune odirie. Emua una raara raara Danu anifine wei goi goiroma Danu anifine wei oroorofaro we odaifiane ibake we mune odirieke emua we odairie. ²Emua we mune odirieke i Godinu wake weeka oroue keu meya we imukada ibake yewa wake emuabake eno wei, i daunaisa urunama keuwerero nono i daunaisa oroue keu meya i waiya ubi mibairo guriguri uawero eme moi emua unu kofiakaro we odaifiaro anifisa Yesuma eno wei. ³I buna me mamoe weaisa abu ari emuama i waawere nauwa kuabairo anaisa i ari Nama ya aboro aboro we odaimiaro aniawe wei. ⁴Aniaweke fausini yoakeini moi sadoroini da wauaweke eme moi daabaro fou ufiakaisaie arie weada wake yafawere da weawe wei. ⁵Anifoisake moi uwara ubarenaro amufoisaie i oroubairo kawama wake eno weawe, Godima ya yaisinabairo aine wai ure ibeifi eno weawe wei. ⁶Eno wefoisaro i uwararo irau mi ibifekuie yanu we ma irauaiai ukeka dawabairo ibifi nono mebaie yanu we ma irauaiai ukeka nono owefike yabairo ibifi wei. ⁷Yae Godinu waiya orouba abo uwara ubarenaro amufoisaie i uwara onarounu urunaini aduaini me ifoisaya moi uwara uwararo da aniawe wei. ⁸Abo goiro anifoisaie i goi orouma ya mufiakaisake aneme uruna mafiakaisaie iawe wei. ⁹I goiro arama uke ibifeisa orou ma wiroaweke Godima eme yawokakune dubuena kai odo idua fafine ukinua eno weawe wei. ^10-11Nono moi goiro anifoisaro i goi orouma ya medifiakaisaie daabaro anaada eno weawe, yanu goi doo iyanu umuro ma isurada medifeisiro efoisaie Godima eme yawokakune dubuena kai odo idua fafine ukinua eno weawe wei. ¹²Yesuma eno weike nono wei, Godinu kodo ufine odo idua fafekuro Godima i Sodomu goi meramawere ukeibisa orou ya fanisi dai menaku mafiakuke nono i arie eno ya uke yafiakaisa orou emua fanisi daiwere mafiakua Yesuma eno wei.

Moi goi orou emua emenu imuka yaisina Yesubairo make dauisa wake

¹³Yesuma bunawere wakeroma eno wei, ya Korasani goi orouini Besaida goi orouini ya eforo weakune wei! Godinu buna ukeka keuwere ya ereibaisaba i Daira goi orouini Saidoni goi orouini emuama ibai efisaronae meramawere wauma barufisake uka iiri okoro kafisake emenu ba me merama ukeka medifisane wei. ¹⁴Godinu kodo ureka odo fafekuro Godima i Daira goi orouini Saidoni goi orouini emua fanisi dai menaku mafiakuke nono ya Korasani goi orouini nono ya Besaida goi orouini yae yanu merama ukeka mede dakaisaba fanisi daiwere mafiakua wei.

¹⁵Yesuma eno weike nono wei, ya Kafenamu goi orou yabake aneaneme wemau? Urero amuke anifone weaisa? Yae urero da waure amuke anifiakuke ya mune siafiakuro i feare dakaku inaaro anifoisaya wei. ¹⁶Yesuma weike Danu iwoka ukeka oroubake eno wei, Aina ainama yanu wake naufeisaie Nanu wake naufeisaya wei. Nono aina ainama ya medifiakaisaie Na we odaikara Godi medifeisaya Yesuma eno wei.

I sewenidi (70) orouma owere faka wake

¹⁷Nono dubuenaro i sewenidi (70) orouma owekake rooro bobo Yesubairo fakake eno weisa, Dai Waria Mi, Anu ibiro weisiro i seidaninu merama imumuma iyanu wake nauisake anisaya weisa. ¹⁸Eno weisaro Yesuma emuabake eno wei, i ukeibisaie bida mamaku i arie seidanima ureroma isare uriro erea wei. ¹⁹Yesuma eno weike nono wei, yabake weakune ibake buna ufoisake waruini auwa ari rabunu duboro amune adiadi yare anifoke yaini wasai ukaku minu buna ma bereforo anemema ya da ma merama ufiaku wei. ²⁰I seidaninu merama imumuma yanu wake naukaisa. Yewabake rooro da uaweke yanu ibi urero owaowa yanake odiro ibinua rooro uawe wei.

Yesu rooro ui wake

²¹I odoro Godinu Imumu Irauma Yesunu imuka ubarenaro wake fariro rooro uike guriguri ukaada eno wei, Babae, Ae ureini dooini yawokaku. Ae yewa orounu ukeka yaisina i orofa akakaro iwoka daiwere oroubairo ma fe yarakuke nono yewa amarananaku ari orou emuabairo ma boroo yarakuro ibake we ma irauaiai ukakune. Ie Anu irau imukeka ibake eno ukaku. ²²Nanu Babaema Danu imukeka yaisina makakunararo enaenari ukakune. Enoroma i orouma Nanu Babaenu Amara ma nuna ukaisaro Godi Danu mane Dawa iwoka ukaku. Enaenari Godi ma nuna ukaisaro Godinu Amarama Godi iwoka ukakuke ainabairo ma boroo yarakuie emua idua Godi iwoka ukaisaya wei.

²³Yesuma Danu iwoka ukeka orou owere eraada emua manebake weada eno wei, yae aneaneme ukeibisarabai ereibisaba yae irau oroua wei. ²⁴Nanu wake wemaro nauawe Yesuma eno weike wei, Godinu moi we bou urie orouini moi dai yawokeka orouini emuama yanu aneme aneme eraisa ibai efisane weisakema nono ere dauisa. Yanu naukaisa wake naufisane uisakema nono nauke dauisaya wei.

Yesuma i irau Samaria goi mibairo dubo waure wei wake

²⁵Moi odoro Mosesinu darawadu we ma iwoka ukeibi mima uyarike Yesu uke iruke efine ukaada eno wei, Sisa mi, aneaneme umauke me ibene ibene ibeka mumau wei? ²⁶Eno weiro Yesuma wei, Mosesinu darawaduma ibai aneaneme weaku. Ibaide a iwokaba me wei? ²⁷Eno weiro i mima eno wei, Mosesinu darawaduma eno weaku, yanu imuka yaisinaini imumu yaisinaini buna yaisinaini awara yaisinaini ima Godi imukari ukenewaa ukeibiaweke yanu onaroubake imukari ukaisari i ari enaenari yanu naiyemukubake imukari ukeibiawe weakua wei. ²⁸Eno weiro Yesuma wei, ba weakua enaenari ufakuie me ibene ibene ibifakua wei. ²⁹Eno weiro i mima danu onami ma irauaiai ufine ukaada eno wei, nanu naiyeye aina wei? ³⁰Eno weiro Yesuma wei, moi Du mima Derusaremu goiroma Deriko goiro isare ani. Isare aneibibaie moi waira ukeka orouma fakake danu wauini oini yaisina mukake usima ureebe oisaro yanake kuurike aine ibi. ³¹Aine ibiro moi ofereni ode sibore sianeka mima i daabaro isare aneebe eribaie i mi dawa yanake kuurike aine ibiro erike moi ena daaba udiro umane kaike ani. ³²Nono moi Du orounu bisara ukeka mi Riwai weaisa mima isare aneebe erike enaenari ui. Dawae i mi aine ibiro erike daaba moi enaro umane kaike isare ani. ³³Nono moi miye imusu goi mi dawae Samaria goi mima daabaro isare aneebe fare eribaie imukari ui. ³⁴Imukari uike i mibairo ane ifoma kodudu yanaike iraa i minu bouro odike badesima waiyare odi. Eno uike i mi mune danu doniki abu duboro ma yaure odike waure ani. Anike awawa orou fareka uwararo farike i mi yawokenewaa uke aini. ³⁵Yawoke ainiro wai uriro uyarike i awawa orou fareka uwara yawokeibi mi du kina (K2.00) maike eno wei, i mi yawokenewaa ukeibiaro owemake famaro oi moi dawabake siafakuie anu oi moko mamauanea wei. ³⁶Yesuma i wake eno weike i Mosesinu darawadu Sisa mibake eno wei, i eme una buubama i waira ukeka orouma uka mi ekade abo mima danu naiye wei? ³⁷Eno weiro Yesubake ma owerike eno wei, i imukari ui miya wei. Eno weibaie Yesuma i mibake eno wei, aniake i minu ukeka enaenari ua wei.

Yesuma Madaini Meribairo awaawa ani wake

³⁸Yesuini Danu iwoka ukeka orouini aneebe moi goiro fakabaie moi aweka danu ibiye Mada dawama we kuuri. ³⁹I aruma danu dakaeye Meri. Merima Yesunu umu udiro yaure ibaada Yesu we ma iwoka ukeibibai naukeibi. ⁴⁰Madae okea oukada imukeka imusu imusu imuike Yesubairo farike eno wei, Dai Mi, nanu kakae na medinararo okea nanu mane oukakunea Ama ibai imukakuba me weike nono wei, wearo na unu kofari wei. ⁴¹Eno weiro Yesuma wei, Mada ae aneaneme imukada imuka merama imukaku wei. ⁴²Anu imuka demui mane imufakuie irauaiai ufaku. Merima Nanu wake naukenewaa ukakuie irauaiai ukakuba ie da mareke mumaua wei.

Yesuma guriguri we ma iwoka ui wake

¹Moi odoro Yesuma guriguri ui. Guriguri uke me siniro Danu moi iwoka ukeka mima eno wei, Dai Wari Mi, Dionima danu iwoka ukeka orou guriguri we ma iwoka urie, enaenari iya we ma iwoka ua wei. ²Eno weiro Yesuma emuabake ma owerike eno wei, guriguri ukaadae eno weawe, Babae Anu ibi we ma irauaiai ukaisi. Anu yawokaku odo fafine weaisi. ³Awoenae iyanu aine wai ure makeibaku uruna maa. ⁴Iyanu naiyemukunu ba me ukeka iyabairo ukaisa ibaie imuke medaisi enaenari iyanu ba me ukeka imuke media. I merama uke ereka eraerabusa iyabairo da waure aarake i merama ukekabairoma iya imusu waure ania. ^5-6Eno weike nono wei, ainama danu naiyebairo dumu abanaro anifekuke eno wefeku, nanu naiye eneebe dumuro farinuro nabairo uruna meya kau kai buuba maina eno wefekua wei. ⁷Eno wefekuro nono i aine ibifeku mima eno wefeku, wake goro mediake ania. Nae nanu aweka amarakuini nauka aine ibinisiba da uyamauke uruna da mamauanea wefekua wei. ⁸Nanu wake nauawe. I mi dawae nanu naiye weroma uyare da ufekua wei. I mima aisamero enare ibaada areare weifekuro nauka aifine uke awafekuke uyafekuke uruna mafekua wei. ⁹I ari enoya we nauke eawero mafiro muawe. Yodia uaweke fou uawe. Aisamero goi goi ukaada yaure ibinu weawero ko ma ro yafi wei. ¹⁰Ainama we nauke efekuie mafekuro mufeku. Nono ainama yodia ufekuie fou ufeku. Nono ainama aisamero goi goi ukaada yaure ibinu wefekuie ko ma ro yafeku wei. ^11-12Moi amaranakuma adua abubake we nauke efekuie danu babaema waru mafeku? Me eno da ufekua weike nono wei, O kokoroko urimibake we nauke efekuro aua mafeku? Me eno da ufekua wei. ¹³Ya merama oroue yanu amarakubake irau uruna makakunekaba aina ainama we nauke efeisaie iyanu urero ibinu Babaema Danu Imumu Irau emuabake makenewaa ufiakua wei.

Yesuini Biesabobake wei wake

¹⁴Moi odoro seidaninu merama imumuma moi minu imuka ubarenaro ibiba ibake i mi dawa wake we dakeibi. Yesuma i merama imumu we berairo fare aniro i mi wake wei. Yesuma eno uiro ibai eka orouma imuka foria uisa. ¹⁵Moi orouma eno weisa, Dawabairo Biesabo ibinu. Biesabo dawae i dai merama imumu enoba i merama imumunu bunaroma i seidaninu merama imumu we berakakua weisa. ¹⁶Nono moi orouma Yesu uke iruke efisane ukaada eno weisa, Godinu buna uaro ureroma fafiro efe weisa. ¹⁷Eno weibisaro Yesuma emenu imukeka iwoka uike emuabake eno wei, gaemini orou emenu emenu uranada ku raarayai ufeisaie emenu yawokeka daaba idua merama sifekua wei. Enaenari moi uwara demui orou emenu emenu uranada abanaro ma boroo yareroma imusu imusu enafeisake urafeisaie emenu ibeka idua merama sifekua wei. ¹⁸Nono seidaninu orou emenu emenu urafeisa ide aneaneme yewa orofa yawofeisa? Yae meo weaisa, Biesaboma Na buna makarabake i seidaninu merama imumu we berakakune eno meo weaisaba ibake yewa wake yabairo eno weakunea wei. ¹⁹Eno ukakune ide yanu orouma i seidaninu merama imumu ainanu ibiro we berakaisa? Enoroma i orouma ya kodo ufeisake yae meo weaisaya wefeisa wei. ²⁰Nono Godinu Imumu Iraunu bunaroma seidaninu merama imumu we berakuneie Godima eme idua yawokaku ibai yabairo iduama boroo yarakunea wei.

²¹Moi aurini goreini fidini i eraerabusa bobo mi dawae danu uwara yawokakuba ibake danu uwaraini eraerabusaini yaisina irauaiai ibaakua wei. ²²Nono moi buna daiwere mima fafekuie urafisisike i minu biraini uraneka eraerabusa mufekuke danu eraerabusa mune anifekuke naka naka ufeku wei. ²³Ainama Na unu kore dakakunarake Naini wasai wake weaku. Enaenari ainama eme mune Naini ku uke dakakuie i eme Nabairoma we yowerakunea Yesuma eno wei.

I seidaninu merama imumu owere farekabake wei wake

²⁴Seidaninu moi merama imuma moi mi medakuie yao nauwaro ko yafine yodia uke anaku. Yodia ukeebe ko yareka orofa mebake ko yare dakakuke eno weaku, nanu medineke aane uwararo nono owere animaua weaku. ^25-26I seidaninu merama imumuma ane farakuke erakubaie i mi dawae danu imuka yawewe uraisari moi imumu iro ibe dakakubake i seidaninu merama imumuma anakuke seidaninu moi merama imumu seweni (7) dawa ari eno me, emuae dai meramawere we waure anaku. Anakuro faraisake i minu imuka ubarenaro amukaisake idua ibaisa. Ibake i minu adina ibeka meramae dai menakuro nono awoena i seidaninu merama imumu keuwere fare ibaisa ibake danu ibekae dai meramawereya Yesuma eno wei.

Ba irau rooro ukekabake wei wake

²⁷Yesuma eno weiro i ku siane ibisa orounu kuro enare ibi moi aweka unama eno wei, Ae Anu amaema A doiyaike ama iduda maiyaiba Godima Anu amae we ma irauaiai ukakua wei. ²⁸Eno weiro Yesuma ma owerike eno wei, ba weakuroma nono aina ainama Godinu wake nauke imuke ukaisaie Godima emua ma irauaiai ukenewaa ukakunea wei.

Yesunu buna ukeka efisane weibisa wake

²⁹Eme keuwere Yesubairo fareibisabaie Yesuma uyarike eno wei, yewa awoena ibinisa oroue meramawere. Aine wai ure Nama buna umaro efisane yodia ukaada ibaisa. Dionanu buna ukeka ma boroo yariro ekaba yabairo moi imusu buna ukeka da ma boroo yafekua wei. ³⁰Dionama Ninewe goiro Godinu wake weiro naukake Godima dawa we odairo fari eno iwoka uisa. Enaenari I Ba Eme Sini Mi ya awoena ibinisa orouma efoisake Dawae Godima we odairo farinua iwoka sifoisaya eno wei. ³¹Godinu kodo odo fafekuro Siba orofa yawokeibi aweka, emenu kuinima uyafekuke yewa orou wayai wefekuke emua aya mafiaku. Adinami nauwaro i aweka dawama yafawereroma Soromoninu iwoka daiwere wake naufine ibake Soromonibairo aare fari. Nono Soromoni dawae dai mi me. Nono awoena moi mi Dawae Dai Miwere yabairo ibinuro Dawa medaisaba ibake i odoro i awekama yabake wayai wefekua wei. ³²I kodo odoro i Ninewe goi orouma uyafeisake yewa orou wayai wefeisake aya mafiakaisa. Dionama wake weibiba ibake emenu merama merama ukeka imuke meisa. Nono awoenae moi Mi Dawae daiwerero nono Dionae okoanaku. I dai mi Dawae yabairo ibinuro ere medaisaba ibake I Ninewe goi orouma wayai wefeisaya Yesuma eno wei.

I ofe ubunu edorobake wei wake

³³Ainama ramefa biafekuie fe da odifekuke aiso odeka orofaro odifekuro i fafeisa orou yaisina i edoro efeisa. ³⁴Yanu naisae yanu ofe ubunu edoro. Enoba yanu naisama irau erabusa eraisake irauaiai imukaisa. Ie yanu ofe ubu ubarenaro edorowere ibinu. Yanu naisama merama erabusa eraisake merama imukaisa. Ie yanu ofe ubu ubarenaro dumuwere ibinu. ^35-36Enoba erenewaa uforo yanu edoro dumu sinao ufekuba. Yanu imuka ubarenaro edoro daiwere ufekuro dumu me ie yanu ofe edoro ari ufeku, ramefanu edoro ariya Yesuma eno wei. Yesuma iyanu imukeka imusu imusu ibake dubu waure wei wake eno wei.

Yesuma i darawadu we ma iwoka ukeibisa orouini i Ferosi orouini emua wayai wei wake

³⁷Yesuma eno we me siniro moi Ferosi mima eno wei, nanu uwararo aarake uruna ia wei. Eno weiba ibake Yesuma ane uwara ubarenaro amuike uruna ifine yauri. ³⁸I Ferosi mima eribaie Yesuma wana uroke dauiro i Ferosi orou emenu bisaraba Dawama eno wana uroke dauiro ibake i Ferosi mi imuka foria ui. ³⁹Yesuma dawabake eno wei, ya Fesosi orouma i faniginini naberoini urokenewaa ukaisakema nono yanu imuka ubarenaro imukeka meramawere, moi orounu eraerabusa mufone imukama imukaisaya wei. ⁴⁰Yae ba awara me. Godima emenu dubo ofeini imuka ubareroini yaisina ubu uiba me wei? ⁴¹I faniginini naberoro ibinu uruna i eraerabusa me oroubake naka naka ufoisaie yanu imuka amearubu ufekuro me irauaiai ibifoisaya wei. ⁴²Ya Fesosi orou ya erenewaa uforo wei. Yae waiyaro eraerabusa yaisinaini moi okoa eraerabusaini i yaisina naka naka ukaada i demuinaku daisi weisa nakanaku Godibake odenewaa uke odaisakema nono moi oroubake irauaiai uke dakaisake Godi imuke dakaisake imukari uke dakaisaya wei. Yanu daisi weaisa nakanaku odekaini Godi imukekaini imukari ukekaini i yaisina ukenewaa uawe wei. ⁴³Ya Ferosi orou erenewaa uforo! Yae dai oroua wefisane ibake i Du orounu sosi uwara ubarenaro i irau yaureka orofa yodia ukenewaa ukaisake yauraisa enaenari yanu ararae i makediro enaisa orouma yabake iifa ukaada arie wefisane ibake iro anaisa. Eno ukaisake rooro ukaisaya wei. ⁴⁴Erenewaa uforo! Yae yewa ari! Emema ooru ukeka orofa ere dakaisaie iifa uke dakaada amune adire anaisaro ima emua ma merama ukaisa. Yae i fe yare ibeka ooru odeka orofa ari, yae eme ma merama ukaisaie emua iwoka meya wei.

⁴⁵Yesuma eno weiro moi Mosesinu darawadu Sisa mima ma owerike eno wei, Sisa, eno weakuie iyabake wake merama weakua wei. ⁴⁶Eno weiro Yesuma ma owerike dawabake eno wei, ya darawadu we ma iwoka ukaisa orouini erenewaa uforo! Yae arawere darawadu wake emema mufisane weaisa. Yanu we ma iwoka ukaisa wakeye inimuwere edo aribake emema yodia daiwere ukaisaro yae wana demuima emua unu kore dakakuneka. Emenu mane wauraisaya wei. ⁴⁷Erenewaa uforo wei. Yanu babaemukuma i we bou urieka orou ma fearieka yae enaenari imukaisake i ooru ukeka orofa ma irauaiai ukaada iro irauaiai oma odaisaya wei. ⁴⁸Yanu babaemukuma i we bou urieka orou ma fearieka ibai irau weada ibake i we bou urieka orounu ooruro werei werei uke odaisaya wei. ⁴⁹Yesuma eno weike nono wei, ibake Godima irauaiai imukada yabake eno wei, Nanu we bou uya orouini Nanu afasoro orouini emua we odaimiaro anifeisaro moibai ma feafiakaisake moibai ma merama ufiakaisaya Godima eno weia wei. ⁵⁰Yesuma i wake eno weike wei, Godinu we bou urie orou ma fearieka. I dawako odoroma i feaka orou yaisina yewa ibinisa orounu merama. Ibake Godima ya kodo ufiakua wei. ⁵¹Eiboronu ma feaka odoroma Sakarayasi, dawae i ofereni odeka orofa dai sosi uwara ubarenaro ma feaka, i furoma i orou yaisinabake Godima ya fanisi mafiakua wei. ⁵²Ya Mosesinu darawadu we ma iwoka ukaisa orou ya erenewaa uforo! Yae Godinu irau imukeka emebairo ma fe yaraisa. Godinu irau imukekae uwara ari. Yae i ki ma fe yaraisake ubarenaro amuke dakaisake emenu amukeka daaba dadau ukaisaya eno wei.

⁵³Yesu iroma aneibibaie i Mosesinu darawadu we ma iwoka ukeibisa orouini Ferosi orouini emuama dino daiwere ukaada we nauke ereka keuwere weisake merama wake weisa. ⁵⁴Emenu ararae Yesunu moko wake wefiro naufisake Dawa kodo ufisane ibake wake daiwere weibisa.

I meomao weeka orou erenewaa uforo wei wake

¹I odoro eme keuwere fare ku siakake daba daba ure makane ibisaro Yesuma Danu iwoka ukeka orou emenu imusu we iifa ukaada eno wei, i Ferosi orounu ure wawareka iraa yisidi eforo wei. Ie meo ukekaya emuama eno weaisakema nono imusu dei ukaisaya wei. ²Emenu oba ukeka eraerabusa yaisina ma woromifekuke emenu imukaro i fema imukaisa eraerabusa yaisinae i oba ukeka erabusa ariba i yaisina ma boroo yafekuro efeisaya wei. ³Enoba yanu dumuro weaisa wakeye ewekaro naufeisa. Anemerabubake uwara ubarenaro mumuuroma weaisaie akaka naisaroma daiwere wefeisaya eno wei.

Godi mane ia sifene wei wake

⁴Adara, Nanu wake wemaro nauawe. I ma feareka oroubake ia da iyaawe. I orouma yanu ofe mane ma feafeisake nono yanu imumu da ma feafeisaya wei. ⁵Ainabake ia iyafoisa? We iifa umaro naukenewaa uawe wei. Ainama yanu ofe ma feafekuke nono yanu imumu i feare dakaku inaaro siafeku Godi Dawa mane ia siawe wei. ⁶Emema sisimuri ada fai (5) oima make mukake korofeni kai raarayai sianaisaba Godima i gasirananaku imuke mede dakakune. ⁷Godima ya imukada yanu fouma idi yaisina iini kakuria ibake ia da siawe. Godima i gasirananaku imukakuke nono yabakeye daiwere imukenewaa ukakua Yesuma eno wei.

Emebairo Yesu Kerisonu ibi we ma daiwere ukekaba ba we ma okoanaku ufeisi arie wei wake

⁸Yesuma moi wake eno wei, ainama eme moibairo nae Yesu imukakunea wefekuie enaenari Na i Ba Eme Sine Mima Godinu anerubairo Nae dawa iwoka ukakune wemaua wei. ⁹Nono ainama eme moibairo nae Yesu iwoka meya wefekuie enaenari Godinu anerubairo Nae dawa iwoka meya wemaua wei.

¹⁰Ainama i Ba Eme Sini Mibake wake merama wefekuie Godima danu merama wake naufekuke imuke medifeku. Nono ainama Godinu Imumu Iraubake wake meramawere wefekuie danu merama ukeka da mune imuke medifekuro idua i mi dawabairo ibeifekua wei. ^11-12Moi odoro ya umu wana naama uwafiakaisake Du orounu sosi uwara ubarenaro waure fare odifiakaisa. Du orou yawokakuneka dai orouini gaemani yawokakuneka dai orouini emuabairo waure ane odifiakaisaie ia da iyaweke yanu moko weeka wake aneme aneme wefoisa i arie eno da imuforo wei, Godinu Imumu Irauma i odoro Danu imukeka mafiakuro enaenari wefoisaya Yesuma eno wei.

I awara buna me eraerabusa keuwere bobo mibake dubo waure wei wake

¹³Moi ku siane ibisa ku ubarenaroma moi mima uyarike Yesubairo eno wei, Sisa, nanu kakabairo wearo kakama babaenu eraerabusa moi naka ufike na moibai mafari wei. ¹⁴Eno weiro Yesuma wei, naiye, ainama Nae anu kodo yawokeka mi odikara wei? Ainama Nae anu eraerabusa naka naka ukeka mi odikara wei? ¹⁵Eforo! Moi minu eraerabusa naisa ure owere ma owere daufao! Yanu ibekae eraerabusa mane me. Aina mima danu ararae eraerabusa mane mufine ufekuie danu ibekae ba meya wei. ¹⁶Eno weike dubo waure wake weike eno wei, moi eraerabusa keuwere irau doo bobo mi dawa idua yaure ibi. ^17-19I mima uyarada eno we imui, nanu waiyaro uruna keuwere ibinuro moi uruna odeka uwara meba aboro odimau ariya we imuike wei, eno umaua wei. Nanu uruna odeka uwara yaisina ma doroo yamauke awoena uruna odeka uwara daiwere ma enamauke iro nanu konouraini nanu eraerabusa yaisina iro odimauke nanu onamibake eno wemau, o naiye, nabairo eraerabusa keuwere ibinuba urunaini aduaini areare isaada rooro ukeimau eno wemaua wei.

²⁰Dawae eno weiroma nono Godima dawabake eno wei, ae awara me miya wei. Eweira dumuro ae feafakuro nono ainama i eraerabusa mufeku Godima eno wei. ²¹Yesuma i wake eno weike nono wei, enaenari ainama eraerabusa keuwere munaada eno mane weibakuie Godinu ibooro i eraerabusae urero ibinisa eraerabusa ari meba dawae i awara me mi ari enoya Yesuma eno wei.

Godibairo yanu imuka yaisina odiawe wei wake

²²Yesuma Danu iwoka ukeka oroubake eno wei, yanu ibinisa ofebake da imuawe wei. Yanu wirokekae i urunabairoma da wirofoisa. Nono yanu ofeye runeka wauma da ma wirofiakua weike nono wei i urunaini runeka wauini i mane da imuawe wei. ²³Yanu ibekae uruna mane iseroma ibe dakaisa. Yanu ofeye runeka erabusama runeroma ibe dakaisa. ²⁴Enoya i owagoro ada imuke eawe. I ada emuae ana kai yo wawe dakaisake fira uke dakaisaro emuabairo uruna odeka uwara mero nono Godima emua uruna makakunea wei. Godima i ada imukakuneke nono iyae ba daiwere imukenewaa ukakunia wei. ²⁵Enobairo nono anemebake aine wai ure yanu ibekabake imukaisa? Ainama danu ibekabake imukebe imukebema nono danu odo ma yafa da ufekua wei. ²⁶Iduaya yewa dai me waiya da ufoisade nono anemebake i imusu eraerabusa imukaisa wei? ²⁷I isoni imuke eawe. I isoni emuae waiya uke mero emua emenu onarou rune dakaisaya wei. Soromoni weaisa mima arake ibeka wau runiro danu waue irauaiai mero nono i isoninu runie irauaiaiya wei.

²⁸Godima i koe ma warakakuke runi fare odakuro nono waidei odoro ena koeye inaama yaraisa. Godima eno ukakuie ya Godi dai menaku imukaisa orouini ya wau rune odifiakua wei. ²⁹Enoya yanu urunaini aduabake da yodia ukenewaa ukeibiaweke da imukenewaa ukeibiawe wei. ³⁰I orofa akaka Godinu wake nauke dakaisa orou yaisinae i urunaini adua yodia ukenewaa ukaisaro nono yanu urero ibinu Babaema yanu ibeka Dawa iwoka ukaku. ³¹Ibake weroma yodia ukenewaa da ufoke nono Godinu irau yawokekama yodia ukenewaa uforo yanu urunaini i yaisina mafia wei.

Urero ibinisa eraerabusabake wei wake

³²Ya okoa mamoenanaku ari orou ia da iyawe wei. Godima Danu arara ukaada rooro bobo ya Danu yawokeibaku orofaro odia wei. ³³Yanu eraerabusa oima make muaweke i eraerabusa me oroubairo i oi mayakawe wei. Eno ufoisaie yanu eraerabusa urero ibene ibene ibifekua wei. Iroe waira orou me. Iroe ranema eraerabusa ma merama da ufeku wei. ³⁴Yanu eraerabusa aboro ibinisaie yanu imuka yaisinae iro ibinuba ibake wei.

Nauka aine mero waiya ukaisa oroubake wei wake

^35-36Yanu wauini ramefaini mune ode bou uawe. Wau ruaweke ramefa biaweke yanu Dai Waria Mi yawoawe. Yanu Dai Waria Mi aweka muneka banauroma fafekuke yaure ibinisa wefekuie ko sabu woromiawe wei.

³⁷I dai mi fafekuke danu waiya orouma nauka aine dafeisake me ibifeisaro efiakuie emua we ma irauaiai ufiakua wei. Yabake ba wake wemaro nauawe wei. Eno ufekuie danu waiya ukeka orou ma yaufiakuke waiya ukeka wau rufekuke danu mane emuabairo uruna nabero mafiakua wei. ³⁸Dumu abanaro o wai awaro fafekuke emua eno uke yafiakuke we ma irauaiai ufiakua eno wei.

³⁹Ibai imuke eawe! I uwara onami mima i waira ukeka minu fareka odo iwoka ufironae danu uwara yawokenewaa ufineba danu uwara da fare ma merama ufine wei. ⁴⁰Enaenari yawokenewaa uforo wei. I Ba Eme Sini Miye fema fafekuba ibake yawokenewaa uforo ibake weakunea wei.

I waiyama imusu ari mini nono korokoma imusu ari mini emenu wake

⁴¹Fidama eno wei, Dai Waria Mi, i dubo waure weaku wake iya manebake weakuba ba eme yaisinabake weaku wei? ⁴²Eno weiro Yesuma Danu iwoka ukeka oroubairo we nauke eraada eno wei, abodei mima ba irauaiai waiya derena fururu yare busi kai ukeka mi weike Danu mane nono i moko wake eno wei, i busi kai irauaiai waiya ukakuke nono oima make muneka odoroe uruna mune i moi waiya ukeibaisa orou makeibakunero iseibaisa i mi dawae irauaiai waiya ukeka miba Godima dawa yawokeka dai mi we odifekuro Godinu orou yawokeifiakua wei. ⁴³Eno weike nono wei. I dai yawokeka mima fafekuie danu waiya ukeifeku mi eno irauaiai ufekuro efekuke we ma irauaiai ufekua eno wei.

^44-46I dai mima danu eraerabusa yaisina yawofine odifekua wei. Nono i koroko waiya ukeka mima eno we imufeku, nanu dai miye sabu da fafekua eno we imufekuke i goiro waiya ukeifeisa eme awekaini emua usima ureifiakuke uruna daiwere iseifekuke ara adua isaada awara arama ufekuie danu dai mi idua fema fafekuke i mi fanisi mafekuke i Godinu wake nauke me orounu orofaro odifekua wei. ⁴⁷Nono moi waiya ukeka miye danu dai minu imukeka iwoka ufekuke enaenari da ufekuie i dai mima i mi usima daiwere ufekua wei. ⁴⁸Nono moi waiya ukeka miye danu dai minu imukeka iwoka meba ibake usima dai menaku ufeku wei. Godima ainabake iwoka daiwere mafekuke nono i ama enaenari daiwere ua wefeku. Ainama daiwere mufekuie enaenari daiwere ufekua eno wei.

Yesuma eme yanake kuure ku mama mama uke odirie wake

⁴⁹Yesuma eno wei, inaa dooro mawamane farea weike nono wei, Nanu ararae i inaama yewa doo yare me sifine weakune wei. ⁵⁰Moi ara babadaido ukeka mumau inu ubiye oferi daiwere waumauba ibake awoenae imuka merama daiwere ukakune ie me sifekuro irauaiai ibimaua wei. ⁵¹Aneme we imukaisa? Nae ya yewa orofa akaka oroubake me irauaiai ibeka mamiane farea eno we imukaisa? Nae ibake fare dauneke moi uwararo ibinisa orou ma fiake ku raarayai umiane farea eno wei. ⁵²Awoenae moi eme fai (5) moi uwararo ibaisaie una raara emuae emenu imusu yaure ibaada imukaisiro, nono moi una buubae emenu imusu yaure ibaada imukaisaya eno wei. ⁵³Moi uwararo babaeini danu amaraini emenu imusu imusu ibifisisi. Amaeini danu arumaini emenu imusu imusu ibifisisi. Dakamaeini nainauini emenu imusu imusu ibifisisi. Emenu emenu Nabake wake we makanada ibake urane rarane ufeisake fiake imusu imusu ibifeisaya wei.

I fafeku odo iwoka ukeka wake

⁵⁴Yesuma i fare ku siane ibisa oroubake eno wei, eweka isaraku enaro duba ou eraisake eno weaisa, awoenae obi mafekua weaisaro enaenari isaraku. ⁵⁵Eka ena ewa enaroma oyau farakuie idua kowaa enaraku eno eno weaisaro enaenari kowaa sinakua wei.

⁵⁶Ya meomao weaisa orou! I ureini dooini eraerabusa erenewaa ukaadae iwoka ukaisake nono Godinu buna ukeka erenewaa ukaadae nono ma nuna ukaisaya Yesuma eno wei.

Abake meramawere ufine ukeifeku mini wake ma giena uawe wei wake

⁵⁷Anemebake i ba ukeka ma nuna ukaisake yanu mane ba me ukeka ma giena uke dakaisa wei? ⁵⁸Moi mima ya moi kodo yawokeka oroubairo kodo ure yafiane wayai wefekuke waure anifiane ukeifekuie dawabake sabu naiye weada i wake yanu mane ma giena uawa wei. Eno da ufoisaie i kodo uraku dai mima yae furisimaninu wana daaro mune odifiakuro i furisimanima ya ana eboro odifiakua wei.

⁵⁹Yabake ba wake wemaro nauawe, ya ana eboro odifiakuie iro ibifoisake i faini oi yaisina mafoisaro ya idua i ana ebaroma odaifiakuro owere aweawero fafoisaya eno wei.

Yanu meramawere ukekaroma owere dafoisaie feafoisaya wei wake

¹I odoro moi orouma Gareri orounu ofereni odeibisa wake eno weisa, i Gareri orouma Derusaremu goiro Godibairo emenu ofereni odeibisabaie Fairadinu orouma emua ma feareibiriekaya eno weisa. ²Eno weisaro Yesuma eno wei, imuke eawe, moi Gareri orou emuae meramawere orou ibake feaka, nono moi Gareri orou emua meramawere meba ibake feare dauisaya eno we imukaisaya wei. ³Ie ba me. Ya yaisina yanu merama merama ukeka imuke mede mero me sara feafoisake i inaa yaraaku orofaro anifoisaya eno wei. ⁴I Sairomu orounu feaka wake nauisa? Eme eidini (18) yeku yafa uwarawere omama ma enareibisaro doroo yarike i orou isare ure bauriero feakaya wei. I feaka oroue meramawere orou nono i moi Derusaremu goiro ibeibisa orou emuae merama orou meya eno we imukaisa? ⁵Ie ba meya weakune. Ya yaisina yanu merama merama ukeka imuke mede mero me sara feafoisake i inaa yaraaku orofaro anifoisaya eno wei.

I kai uwane dakaku anabake dubo waure wei wake

⁶Yesuma yewa wake dubo waure emuabairo eno wei, moi mima boruba ana yobai waiyaro wawiro waiya ubi mima medike moi orofaro ani. Aniro nono dubuenaro ena boruba kaibai mufine odo keuwere fare eribaie boruba kaibai me. ⁷Kaibai meba ibake danu waiya yawokeibi mibake eno wei, oya buuba na fare ane aare ukaada erakunebaie kaibai uwane mero me ibinua uyama umaa wei. Anemebake nanu waiyaro me sara enare ibifeku wei. ⁸Eno weiro i waiya ukeka mima ma owerike eno wei, dai mi, media, moi oya ibifiro ie yawokenewaa umauke danu iinibai udiro oorunaku daumauke boromakaunu ye waure aare odimaua wei. ⁹Eno umauke emauro kaibai uwafekuie da umamauro me ibifekua wei. Nono kaibai da uwafekuie ideima umamau weia Yesuma eno wei.

Sabadi odoro Yesuma moi gienabu enare mero afua umane eneiareibi aweka ma wiroi wake

¹⁰Moi sabadi odoro Yesuma Du orounu moi sosi uwara ubarenaro we ma iwoka ukeibi. ¹¹Yesuma we ma iwoka ukaada eribaie seidaninu merama imumuma moi aweka ma merama uiro oya eidini (18) ure giena uke enare dakeibike afua umane eneibiro Yesuma eri. ^12-13I aweka erike weiro Yesubairo fari. Yesubairo fariro Yesuma eno wei, yewa aweka, anu oferi waureka me sininuro ae wirokinua weada i aweka wanama ure buriro ure giena uke enarike Godinu ibi we ma irauaiai ui. ¹⁴Eno uiba ibake i Du orounu sosi yawokeka mima dino uike eno wei, waiya ukeka odo sikisi (6) ibooro ibinuro anemebake sabadi i odoro ma wirokinu wei? ¹⁵Eno weiro Yesuma dawabake ma owerike eno wei, ya meomao orou! Yae sabadi i odo odoro waiya ukaisa. Yae yanu boromakauini donikini uruna makakuneka. ¹⁶Yae eno ukaisaba yewa awekae Eibaramunu sisia arumaro seidanima dawa oya eidini (18) ma merama ukeibiba ibake dawae sabadi odoro wirokinu ide irauba me wei? ¹⁷Eno weiro Dawaini wasai uisa orouma maru uisaro i moi orouwere emuae Yesunu buna ukekabake rooro uisa.

I masida ananu kaibake dubo waure wei wake

¹⁸Yesuma Godinu yawokaku orofa irau wake we ma iwoka ukaada eno wei, Godinu yawokekae aneme ari? Anemerabu ari wemau? ¹⁹Godinu yawokekae okoa masida ana kai yo ari. I yo kainaku moi mima munike danu waiyaro wawiro waraike dai anawere sini. Daiwere siniro i gasirama emenu mowa i ananu iwararo ubu uisaya wei.

I ure wawareka iraa yisidibake dubo waure wei wake

²⁰Eno weike nono wei, Godinu yawokaku orofade aneme ari? ²¹Danu yawokekae yewa ari, moi awekama moi wawareka iraa yisidinaku munike i farauwa ubarenaro odiro yisidima i farauwa yaisina ma wawaria Yesuma eno wei.

I dai me aisamebake wei wake

²²Yesuma Derusaremu goiro ani. Amuke anaada i dai goini okoa goinanakuro we ma iwoka uke amuke aneibi. ^23-24Eno uke amuke aneibiro moi mima eno wei, Dai Mi, eme keu menaku mane wirofeisaya wei? Eno weiro Yesuma wei, Godinu dai me aisamero anenewaa uaweke eawe wei. Awoenae eme keuwere i aisame yodia ukaisake ane dakaisaya wei. ²⁵I uwara ubi mi dawako uyafekuke aisame yodia ufekuro yae dubuenaro enare ibaada Dawabake yaure ibinu wefoisake eno wefoisa, Dai Waria Mi, aisame woromiaro amufe wefoisaro dawama eno wefeku, ya orou Na iwoka mero yade aboroma farisa eno wefekua wei. ²⁶Eno wefekuro yama wefoisa, abairo urunaini aduaini iseibisiro iyanu goiro we ma iwoka ukeibia eno wefoisaya wei. ²⁷Eno wefoisaro dawama eno wefeku, yae Na iwoka meya weada, yae sara merama ukaisa oroua Nabairoma imusu aniawe wefekua eno wei. ²⁸Eibaramuini Aisikini Deikafuini Godinu we bou ukeibirie orouini emuama Godinu yawokaku orofaro ibifeisaro efoisakema nono ya aneka daaba dadau ufekuba iro da anifoisake nio ake fagigi yafoisake ii wefoisaya eno wei. ²⁹Eme keuwere eweka amukaku enaroma eweka isaraku enaroma eka ena ewa enaroma aboro aboroma fafeisake Godinu yawokaku orofaro Danu banau uruna ifisane fafeisaya wei. ³⁰Imuke eawe. Yewa dooro moi okoanaku orouma iroe dai orou sifeisaro nono yewa dooro moi daiwere orouma iroe okoanaku orou sifeisaya Yesuma eno wei.

Yesuma Derusaremu goibake imukari ui wake

³¹I odoro moi Ferosi orouma Yesubairo fakake eno weisa, yewadoma imusu ania. Erodima A ma feamine ukakua weisa. ³²Eno weisaro Yesuma emuabake eno wei, aniaweke yeka nauwa kua ari we irukeka mibairo eno weawe, ea, Nama i seidaninu merama imumu we berakakuneke eme ma wirokakunia. Eweiraini wairoini yainaini eno mane umauke nanu waiya uke me simaua wei. ³³Godinu we bou urie orouma Derusaremu goiro mane feareibaisaba Naini iini we bou ukeka miba eweiraini wairoini yainaini Nanu waiya ukeimaua, eno ane weawe wei. ³⁴Eno weike nono wei, O Derusaremu goi orou, Derusaremu goi orou, yewae Godinu we bou ukakune orou ma fearakunekake i Godinu we odaisakune orou omama urakuneka. Aweka kokorokoma danu nakubai babama oba ukakune, enaenari Nanu ararae ya Derusaremu orou yawokakuniaro nono yama Nanu yawokeka arara meya wei. ³⁵Eawe! Godima yanu Derusaremu goi medakuba Na da ereifokoisake nono eno wefoisa, Godinu ibiro farinu mi Dawae irauaiaiya wefoisaie nono Na efokoisaya Yesuma eno wei.

Yesuma moi arama mi sabadi odoro ma wiroi wake

^1-2Moi sabadi odoro Yesuma moi Ferosi yawokeka dai minu uwararo uruna ifine ani. Ane faribaie moi umu wana wawari mi dawa idua yaure ibiro i ku siane ibisa orouma Yesu eraada i miye yewa sabadi odoro ma wirofekuba me ariya weada Yesu erenewaa ukeibisa. ³Yesuma i Mosesinu darawadu we ma iwoka ukeibisa orouini Ferosi orouini emuabake eno wei, Mosesinu darawaduma aneme weaku wei? Sabadi odoro ma wirokekae irauba me wei? Aneme weaku wei? ⁴Eno weiro i orouma wake we dauisake wake muu uisa. Wake muu uisaro Yesuma i mi mune ma wiroike we odairo ani. ⁵Yesuma emuabake nono wei, yanu moi abu sabadi odoro yafa doo ebaro isafeisaie ma youfoisaro amufeisaba me wei? ⁶Yesuma eno weiba ibake emuama Dawabairo moko wake we dauisa.

Eme we kuurekaini emenu onarou ma okoanaku ukekabake wei wake

^7-9I uruna iseibisa orouma i irau orofaro yaufisane ukeibisaro Yesuma emua erieke emuabake eno wei, moi mima danu aweka muneka banauro aaraweke uruna iawe wefekuie i dawako irau orofa mufone da yodia uforo ukeebe moi dai miwere fafekuro i banau onami mima yanu orofa i mibake mafekuro yama dooro yaufoisake maru unao ufoisaya wei. ¹⁰Moi minu banau ifone anifoisie eu diiriro yauawero banau ubi mima fafike eno wefi, naiye, yeka irau orofaro ane yaua wefekuie i uruna ifisa orouma yae we ma daiwere ufiakaisaya wei. ¹¹Ainama danu onami ma daiwere ufekuie Godima dawa ma okoanaku ufeku. Nono ainama danu onami ma okoanaku ufekuie Godima dawa we ma daiwere ufekua wei.

¹²Yesuma i banau ubi mibake eno wei, banau ufakuie anu goi orouini eraerabusa daiwere orouini emua mane wayo da koyana. Emua mane wayo kofiakuie enaenari emuama abake moko wayo komekaisake ama emuabake ufaku ari enaenari moko ufeisaba eno da ufao wei. ¹³Banau ufakuie eraerabusa me orouini umu wana merama orouini umu beobeo bobo orouini naisa kikori bobo orouini emua wayo koyana wei. ¹⁴Eno ufakuro i orouma ibake moko eno uke dafeisaie Godima a ma irauaiai umekuke i Godi imukaisa orou ma uyareka odoro abake moko eno ufiakua Yesuma eno wei.

I dai banaubake dubo waure wei wake

¹⁵Yesuma eno weiro moi uruna ifine yaure ibi mima eno wei, ainama uruna Godinu orofaro ifekuie Godima dawa we ma irauaiai ufekua wei. ¹⁶Eno weiro Yesuma moi dubo waure wake weike dawabake ma owerike eno wei, moi odoro moi mima dai banauwere ufine ukaada eme keuwere wayo korie. ¹⁷I banau iseka odo fariro i banau ubi mima danu waiya ukeka mi we odai. I orou wayo kofiaro fafisake danu banau ifisane ibake we odairo emuabairo ani. ¹⁸I mi dawa anike weibaie i orou emua arara dauisa danu uruna aare iseka. Ibake emua arara dauisake moi mima eno wei, nae doo awoena oima make muneba iro animauke ere bou umauba i banauro da aamaua eno wei. ^19-20Nono moi mi dawae danu imukeka wake eno wei, nae boromakau deni (10) oima make muneba iro animauke ere bou umauba i banauro da aamaua eno wei. Dawae eno weiro nono moi mima eno wei, nae aweka awoena muneba i banauro da aamaua eno wei. ²¹I orouma eno mane weibisaba ibake i wayo ani mi medike danu dai mibairo owere ane farike i weisa wake enaenari yaisina dawabairo wei. Eno weiro i uwara ubi mima dino uike danu waiya ukeka mibake nono wei, i ba goiroma uwara kai deidemuroma iroma sabu aniake i eraerabusa me orouini umu wana merama orouini naisa kikori bobo orouini umu beobeo orouini emua waure aayana wei. ²²Eno weiba ibake i mima sabu owere anike danu wei wake enaenari uike danu dai mibairo farike eno wei, dai mi, anu wenu enaenari unero nono orofa keuwere me ibinua wei. ²³Eno weiro i banau ubi mima nono wei, nauwaroini waiyaroini aniake eme fou ufiakuie emenu wanaro muyanake waure aarayanaro nanu uwararo yaufisaro wake fafi wei. ²⁴I dawako wene oroue nanu banau da ifisane ibake weakunea wei.

Iya imukenewaa ufekema dubuenaroma Yesunu umuro anifene wei wake

^25-26Yesuma daabaro ani. Daabaro aneibibaie eme keuwere Danu umuro anisa. Anisaro Yesuma emuabake eno wei, ainama Nanu iwoka ukeka mi sifine ufekuie danu amae babaeini danu aweka amarakuini danu kaka nabueini dawa danu ararae emuaba ibake emua derena da mafiakuie dawae Nanu iwoka ukeka mi da sifekua eno wei. ²⁷Ainama danu arara da medifekuke irau ukeka korosi ari da waufekuie dawae irau mi meba ibake Nanu iwoka ukeka mi da sifekua eno wei. ²⁸Ainama uwara ma enafine imukakuie ane yaurakuke danu oi kakufekua wei. Danu oi iduaba me ariya we imukaku. Mebaie uwara fosi mane siafekuro enaenari da sifekuke oi me sifekuba i uwara idua medifekua wei. ^29-30Enoba emema i uwara ubi mi we irukada eno wefeisa, i miye uwara ma enarebe oi me sininuba medinua eno dawa we irukada wefeisaya eno wei.

³¹Imuke eawe! Moi yawokeka dai kini mima moi kini mini urafisine ufekuie kawama yaufekuke danu meremere orou kakufiaku. Kakufiakuke efekuro danu meremere oroue deni dausiniro (1000) nono i moi kini minu meremere oroue keuwere duenidi dausini (2000) ibake imukenewaa ufeku. ³²Ie enaenari sifekuba me ari we imufeku. We imufekuro enaenari da sifekua eno we imufekuie danu fo weeka mi we odaifekuke aniake eno wea wefeku, aini dawaini demuiro yawofuane wenua ane wea wefekua wei. ³³Yesuma eno weike nono wei, ainama i eraerabusa yaisina derena da mafekukema nono Nanu umuro aafine ufekuro enaenari da sifekuke Nanu iwoka ukeka mi da sifekua Yesuma eno wei.

I imuna me damenabake wei wake

³⁴I damenae irauaiai. I damenanu imuna me sifekuie danu imuna aneaneme i imuna ma owere odifeku? Me! ³⁵Imuna meba i damenae irauaiai mero meramawere ibake emema mune sianaisa. Enaenarie yama irauaiai da ukeifoisaie emema yanu wefoisa wake da naukeifeisaba ibake yae i imuna me damena ari. Aina aina ya ome bobo oroue naukenewaa uawe Yesuma eno wei.

I fe yari mamoe abubake dubo waure wei wake

¹Yesuma we ma iwoka ukeibibaie i dakesi oi muneka orouini merama ukeka orouini emuama danu wake naufisane faka. ²I Ferosi orouini i Mosesinu darawadu we ma iwoka ukeibisa orouini emuama wake mumuuroma eno weisa, yewa mima i merama orouini demuiro yaure ibaada uruna isakua eno weisa.

^3-4Eno weisaro Yesuma emuabairo dubo waure weeka wakeroma eno wei, yabairo moi mima mamoe abu yaisina wani aderedi (100) yawokeifekuro una demuinaku fe yafekuie moi nainidi naini (99) eme ibe me orofaro medifiakuke i fe yafeku mamoe una yodia ukeebe fou ufeku. Eno ufekuba me wei. ⁵Eno weike nono wei, euwa eno ufekua wei. Dawae yodia ukeebe fou ufekuke mune owairo waurada rooro ufekuke anifeku wei. ⁶Goiro ane fafekuke wefekuro danu goi orouini danu naiyemukuini fafeisaro eno wefeku, nanu fe yarinu mamoe fou unea naini rooro uke yakowe wefekua wei. ⁷Enaenarie eme una demuima danu merama ukeka imuke medifekuie i urero ibinisa aneruma rooro daiwere ufeisake i nainidi naini (99) orou emuae irauaiai orou ibake rooro dai menaku ufeisaya wei.

I fe yari oibake wei wake

⁸Yesuma eno weike nono moi dubo waure wake weada eno wei, moi aweka una danu oi kaibai deniro (10) nono kai demuinaku fe yafekuie ramefa biafekuke yawewe ufekuke yodia ukenewaa ukeebe fou ufeku. Dawa eno ufekuba me? ⁹Euwa, dawae eno ufekuke wefekuro danu naiyemukaini moi uwara uwararo ibifeisa orouini fafeisaro eno wefeku, nanu fe yarinu oi kainaku fou unea naini rooro uke yakowe wefekua eno wei. ¹⁰Enaenarie moi mima danu merama ukeka imuke medifekuie Godinu aneruma rooro ufeisaya Yesuma eno wei.

Moi fe yari mibake dubo waure wei wake

¹¹Yesuma moi wake dubo waure weike nono eno wei, moi mima amara una raarayai dorie. ¹²I dubuena dori amarama eno wei, babae, anu eraerabusa yaisina ma fiake nanubai mainaro muma wei. Danu amarama eno weiba ibake danu babaema danu amara wei enaenari ui. ¹³Nono moi odoro i dubuena dori amarama danu eraerabusa fira ukaada munike moi orofaro ani. Dawae yafawere anike i imusu orofaro me sara ukeebe danu oi yaisina siane me sini. ¹⁴I oi me siniro i orofaro arumu daiwere yauri. ¹⁵Enoba uyarike moi mibairo waiya ufine ani. Ane farike weiro moi mima eno wei, aniake nanu borosiri yawokeibia wei. Eno weiba ena mi idua ani. ¹⁶Aniro nono dawae desini daiwere uriba i boronu rau ifine imuiroma nono i orouma dawa i boronu rau make dauisa. ¹⁷Enoba i mima ane yaurike imukebe eno we imui, nanu babaenu waiya oroue keuwere ibinisake uruna daiwere isaada ibinisiro uruna moibai keuwere ibinuro nono nae desinima feamane ukakune ariya we imui. ¹⁸Awoenae uyamauke nanu babaebairo animauke eno wemaua we imui, babae, Godini aini yabairo meramawere uke yareibiaya wemaua wei. ¹⁹Nanu ukeka sinekae meramawerea anu waiya ukeka mi we odaina wemaua eno we imui. ²⁰Eno we imuike uyarike danu babaebairo idua ani. Uyarike daabaro aneibiro danu babaema dawa daabaro erike imukari uiba durame ane yabaike oo ui. ²¹I mima eno wei, babae, Godini aini yabairo meramawere uke yareibiaya. Enoba nanu ukeka sinekae meramawereya nae anu amaraya eno da wea wei. ^22-24Eno weiro danu babaema eno wei, nanu amarae fearefaisa ukinuke ibeebe farinua irau wauma rune odiaweke wana raragaro sia wawe odiaweke umu ofe baruke odiaweke awoena keweama imusu ari boromakau uaweke banau uawero isaada rooro ufe weiro enaenari uisa.

²⁵Nono danu bokai dori amara waiyaro anike waiya ukeebe owerike faribaie uwararo buma uraada yaura ureibisaro naui. ²⁶Nauike moi waiya ukeka mibairo we nauke erike eno wei, anemebake eno ukaisa wei? ²⁷Eno weibaie i waiya ukeka mima ma owerike eno wei, anu nabue farinuro anu babaema i awoena keweama imusu ari boromakau urinuro isaada rooro ukaisaya eno wei. ²⁸Eno weiro i mi dawae dino daiwere uike i uwararo ane daui. Dawae uwararo ane dauiba ibake danu babaema dawabairo ane farike eenu weada uwara ubarenaro aara wei. ²⁹Eno weiro i bokai amarama dino wakeroma eno wei, oya keuwere anu waiya ukaada anu weaku wake yaisina munakuneke ukakunero anemebake awoena boromakau make dakakuniro nanu naiyemukuini naini iya iseroma rooro uke dakaisi wei. ³⁰Anu amarama anu oi fukeruwere arumabake me sara siane me sininuke owere farinuro dawabake wenuke irau awoena boromakau urinuke isaada rooro ukakua eno wei. ³¹Eno weiro danu babaema wei, nanu amara aini naini uwae demuiro ibinisuba nanu aneaneme eraerabusa yaisinae anua wei. ³²Nono anu nabueye fearefaisa ukinuke ibeebe farinuro fou uneke ibake rooro ukaisia wei. Yesuma i wake emuabake eno dubo waure wei.

I waiya yawokeka mibake dubo waure wei wake

¹Yesuma Danu iwoka ukeka oroubake moi wake dubo waure weada eno wei, moi mima danu dai minu eraerabusaini oini yaisina yawokeibi. Enaenari yawokeibibaie moi orouma danu dai mibairo fakake eno weisa, anu yawokeka mima anu eraerabusaini oini me sarawere yowokakua weisa. ²Eno weisaro i dai mima danu eraerabusa yowokeibi mi weiro dawabairo ane fariro eno wei, a aneme ukakuro weisaro naune wei. Ie ba ba me wei? Anu waiyae idua me sininua aniake anu sidowa buka waure aare maina weiro ibake ani. ³Anike eno we imui, aneme umau ari we imui? Nae buna meba kare waiya da umaua eno wei. Na arara me eenu weeka. ⁴Na imukakuneie eno umauke danu waiya medimauro nanu naiyemukuma na yawofokaisaya we imui. ⁵Enoroma danu dai minu oi moko mafeisa orou una deidemubake eno wei. I bokai mibake eno wei, nanu dai mi anemerabu moko mafaku wei? ⁶Eno weibai wani aderedi (100) kerosini daramu ariya wei. Eno weiro i yawokeka mima wei, anu fefa muake mokoe fifidiya (50) eno owaowa uke odia wei. ⁷Eno weike nono moi mibake wei, nanu dai mibake anemerabu mafaku wei? Eno weibaie ibudi urimi fuse ari yaisina wani aderediya (100) wei. Eno weiro i yawokeka mima ma owerike dawabake eno wei, anu fefa sabu muake anu mokoe eidiya (80) eno owaowa uke odia wei. ⁸Eno uiba ibake danu dai yawokeka mima we imui, i uke gagao ukeka miye awara bunawereya we imui! I orofa akaka Godinu wake nauke dakaisa orou emuae i meomao ukekaroe emua iwokama imusu ariba ibake yewa dooro ibaada i Godinu edororo ibaisa orou emuae ibai iwoka dai menakuba emua ma berekakunekaya wei. ⁹Yesuma nono wei, Nanu wake wemaro nauawe wei, ibai imukada yanu yewa orofa akakaro oi irauaiai yawoaweke eme moibairo oi keuwere mayakawero yabake naiye wefisa wei. Nono dubuenaroe i oi me sifekuro feafoisaie Godima yae i me ibene ibene ibinu ure uwararo unu kofiakua wei.

¹⁰Yesuma eno weike nono wei, ainama eraerabusa keu menaku moi mibairo makakuro yawokenewaa ukakuie eraerabusa keuwere dawabairo makakuro yawokenewaa ukakua eno wei. Nono ainama i eraerabusa keu menaku yawoke dakaada waira ukakuie i dawabairo keuwere makaku eraerabusaini iini yawoke dakaada waira ukakua wei. ¹¹Yewa orofa akakaro oi yawokenewaa dakaisade nono aneme aneme i urero ba eraerabusa yawofoisa wei. ¹²Moi minu eraerabusa yawokenewaa dakaisade nono ainama yanu onarounu eraerabusa mafiakuro yawofoisa wei. ¹³Moi waiya ukeka mima dai miyainu waiya da ufeku. Eno ufekuie dai miye una demui maneba dino ufekuro danu imukae moi dai mibairo ibifeku. I dai mi una demuinu waiya mane ukenewaa ufekuke i moi minu waiya me sarawere ufekua wei. I ari enoba Godinu waiyaini oi waiyaini demuiro da ufoisaya Yesuma eno wei.

Darawadu wakeini Godinu yawokaku orofa wake

¹⁴I Ferosi orou emenu ararae oi ibake i orouma Yesunu wake naukada Yesubake wake merama weisa. ¹⁵Yesuma emuabake eno wei, yae eme moibairo yanu onarou mane we ma irauaiai ukaisaro nono Godima yanu imuka ubarenaro ibinu imukeka iwoka ukakua wei. Eme emenu ararae emenu onarou mane we ma irauaiaiya ukekabake ie irauaiaiya eno we imukaisaroma nono Godi Dawae ibai erakuke arara me i ari eno ukekabai.

¹⁶Adinaroma Dioninu doka odoro emema Mosesinu darawadu wakeini i we bou urieka orounu wakeini enaenari weibisa. Eno weada we ma iwoka ukeibiriekaro nono i Dioni doka odoroma Godinu yawokaku irau orofa wake we ma iwoka ukeibaisiya wei. Eno we ma iwoka ukeibaisi ibake eme keuwere Godinu yawokaku irau orofaro anifisane bunama imusu ari ukaisake anaisa. ¹⁷Ureini dooini me sifekuie ara mero nono Godinu darawadu kai deidemunaku mane me sifeku i deima dawae arawereya Yesuma eno weike nono wei, Nanu wakeye da me sifekua wei.

¹⁸Ainama danu aweka medakuke moi aweka munakuie dawae i awoena munaku awekaini demuiro dodoo ukeibakua weike eno wei. Nono ainama moi eme medaku aweka munakuie dawae i awekaini demuiro dodoo ukeibakua Yesuma eno wei.

I eraerabusa keuwere bobo mini Rasorosini emenu wake

¹⁹Yesuma moi wake eno wei, moi eraerabusa keuwere irau wau bobo mima ibeibi. Dawae aine wai ure irau uruna mane iseibike irauaiai ibeibi. ^20-21Dawa eno uke aine wai ure eno mane ukeibiro nono i ba me bou biobao bobo mima danu uwara aisame udiro ainada i eraerabusa keuwere bobo minu uruna ifurubai ifine ukeibi. Eno ukaada aineibiro kuasirima danu bou yabuneibisa. ²²Eno ukeebe moi odoro i bou biobao bobo mi dawa feariro Godinu aneruma dawa waure amuke anisake Eibaramubairo ane oisa. Nono i eraerabusa keuwere bobo mi dawaini dubuena feariro ooru uisa. ^23-24Nono i eraerabusa keuwere bobo minu imumuma inaa yareibaku orofaro ani. I mima i inaa yareibaku orofaro oferi daiwere waurada naisa foraike eribaie Eibaramuini Rasorosini emua demuiro yaure ibisiro erieke daiwereroma eno wei, babae Eibaramu, nabake imukari uake Rasorosi we odaiaro wana raragama aduaro ma iyafike nanu meanaro odifiro nanu meana ure koboa ufi wei. Yewa inaaro oferi daiwere waurakunea wei. ²⁵Eno weiro Eibaramuma ma owerike eno wei, nanu amara, anu adinaro ibeibi ibai imua wei. I furo ae irauaiai eraerabusa keuwere muneibiro Rasorosi dawae meramawere uke ibeibia eno wei. Nono awoenae Rasorosi dawa irauaiai ibinuro nono ae iro oferi daiwere waurakua eno wei. ²⁶Nono iyanu ibinisi orofaroma anu ibinu orofae kafuru daiwereba yewadoma abairo aneaneme aafeisi eno wei? Nono abairoma iyabairo da aafeisaya wei. ^27-28Eno weiro i mima wei, babae Eibaramu, Rasorosi yewaro da aafekua eno we imufakubaie nanu babaenu uwararo we odaiaro anifike nanu kaka nabue fai (5) we iifa ufiaro yewa oferi waureka orofaro da aafisa wei. ²⁹Eno weiro Eibaramuma ma owerike eno wei, Mosesinu darawadu bukaini Godinu we bou urie orounu bukaini emuabairo ibinuba i bukaro kakufeisaya wei. ³⁰Eno weibaie i mima wei, babae Eibaramu, i buka da kakufeisaya imusu moi feafeku mima uyafekuke emuabairo anifekuke emua we iifa ufiakuro danu wake naufeisake emenu ba me merama ukeka mune imusu odifeisaya eno wei. ³¹Eno weiro Eibaramuma wei, Mosesinu darawadu bukaini Godinu we bou urie orounu bukaini da kakufeisade moi feafekuke nono uyare emuabairo anifekuke wefekude danu wakeini iini da naufeisaya weia Yesuma eno wei.

Meramawere ukekanu wake

¹Yesuma Danu iwoka ukeka oroubake eno wei, ba me uke ereka idua yabairo fafekua wei. Nono moi mima moi mi ba me uke iruke efekuro nono i mima Godi medifekuie Godima i irukeka mi fanisi daiwere mafekua eno wei. ²Moi mima Nanu wake naukeifeku mibairo ba me ufekuro i mima meramawere ufekuke Godi medifekuie dawa meramawereya wei. Eno ufekuro meramawere unao ufekua i ba me we ma iwoka ufiakua we imufisake i minu nodoro dai omawerema doifisake kunaro siafisaro isafike imu ifironae ie irauaiaiya weada yabake we iifa ukakunea wei. ³Nono yanu kaka nabuema meramawere ufeisaie enaenari we iifa uyakawe. wei. Eno ufoisaie danu ba me ukeka mune imusu odifekua yama danu ba me ukeka imuke mediawe wei. ⁴Dawae moi odoro i meramawere yaisina seweni (7) ukeifekuke nono i odoro danu merama yaisina mune derena enaro odeifekuke danu merama ukekabake arie weifekuie danu ba me ukeka mune imuke medeibiawe eno wei.

Godi imukekabake wei wake

⁵I afasoro orouma Yesubake eno weisa, Dai Waria Mi, iyanu Godi imukeka imuka ma buna ua weisa. ⁶Eno weisaro Yesuma emuabake ma owerike eno wei, yanu Godi imukekae moi okoa masida ana yo kainaku ariroma nono yeka dai anabake uyake kuna ubarenaro ane isaa wefoisaie enaenari ufekua eno wei.

Waiya ukeka minu ukekabake wei wake

⁷Yesuma eno wei, yabake weakune wei, waiya ukeka mima ewekaro waiyaro waiya ukeebe dumu sinakuro uwararo farakuro danu dai mima uruna ifeisia aarake yaua eno we dakaku. ⁸Dawakoe danu dai minu uruna oukakuke makakuro danu dai mi isakuroma ai yaurakukema danu uruna ai isakua wei. ⁹Danu dai minu wake naukada enaenari ukaku i dawae danu waiya ibake danu dai mima dawa we ma irauaiai uke dakaku. ¹⁰Enaenari Godinu weaku wake yaisina enaenari ufoisaie yae irauaiai orou meya yae yanu waiya mane ukaisia eno weawe Yesuma eno wei.

Yesuma beko mamirie orou deni (10) ma wiromirie wake

¹¹Yesuma Derusaremu goiro anike Gareri orofaini Samaria orofa eka ena ewa enaro ibisiro abanaro ode kuure fare ani. ^12-13Anike moi goiro ane faribaie moi beko mamirie orou yaisina deni (10) emuama Dawa ekake ekararowere enare ibaada iroma u daiwere weada eno weisa, Yesu, Dai Mi, iya imukari ua weisa. ¹⁴Eno weisaro Yesuma emua eraada emuabake eno wei, aniaweke yanu mane i ofereni ode sibore sianaisa oroubairo yanu iboo naisa ma iwoka uyakawero efisa wei. Eno weiro anisaie idua wiroisa. ¹⁵Moi i bou irau siniro wiroi mima danu ofe irauaiai siniro iwoka uike owerike anaadae Godi daiwere we ma irauaiai uike ani. ¹⁶Eno uisa ibake i mima Yesubairo farike Yesunu umu udiro ifoma kodudu yanakada Yesu we ma irauaiai ui. I mi dawae Samaria orofa mi. ¹⁷I mima eno uiro Yesuma wei, i orou deni (10) wirokisaba me wei? I moi orou naini (9) aboro anisa wei? ¹⁸Anemebake yewa imusu mi mane owerinuke Godinu ibi we ma daiwere ukaku wei? ¹⁹Eno weike i mibake nono wei, uyaa, ama Na imukakunara ibaima a ma wironea wei.

I Godinu yawokaku orofanu fareka odobake wei wake

²⁰Moi Ferosi orouma Yesubake eno weisa, Godinu yawokaku odo abonodo fafeku weisa? Eno weisaro Yesuma wei, Godinu yawokaku odoe moi ereka ubu ari eno da uke fafekuro da efoisaya eno wei. ²¹Awoenae yewaro Godima yawokakua da weawe, awoenae iro Godima yawakakua eno da weawe. Godinu yawokekae yanu imuka ubarenaro idua ibinua imukenewaa uawe wei.

²²Yesuma Danu iwoka ukeka oroubake nono wei, moi furo i Ba Eme Sini Mi odo demuinaku efone wefoisakema nono Na da efoisaya wei. ²³Moi orouma meo wefeisake yabake eno wefeisa, Dawae yewadoya, Dawae iroya eawe eno wefeisaie emenu wake da nauaweke emuabairo Na da yodia uke aniawe wei. ²⁴Bidama ure eka ena ewa enaro mamaada edoro ukeibakuro eme yaisina eraisa enaenari i Ba Eme Sini Minu farekae enaenari ufekuro eme yaisina efoisaya eno wei. ²⁵Yesuma eno weike nono wei, kawamae Dawa oferi daiwere waufekuro yewa orofa akakaro ibinisa orouma Dawae medifeisaya eno wei. ²⁶Adinaro Noanu ibi furo emema aneaneme ukeibisa i arie i Ba Eme Sini Minu fareifeku odoro enaenari ufeisaya eno wei. ²⁷Noanu ibi furo emema urunaini adua isaada eme aweka munane makaneibisaro Noa dawae danu boudiro amuiro obi oku daiwere fariro i boudiro amuke dauisa orou yaisina emua imu ise feare me sika. ^28-29Nono Rodinu ibeibi odoro enaenari ukeibisa. I furo emema urunaini adua iseibisake oima eraerabusa makane muneibisake waiya waweibisake uwara ma enareibisabaie Rodima Sodomu goi mediro i odoro Godima inaaini barai yari omaini ureroma odairo isare aarike i orou yaisina yare me sirie. ³⁰Enaenarie emema emenu urunaini adua ifeisake emenu emenu arara waiya ukeifeisaro i Ba Eme Sini Mi idua fafekua wei. ³¹I odoroe i seboro yaure ibifeisa orouma uwara ubarenaro eraerabusa mufisane da anifeisaya eno wei. I enaenari i waiyaro waiya ukeifeisa orouma emenu wau mufisane uwararo da owere aafeisaya eno wei. ³²Rodinu aweka imuke eawe wei. Godima Rodini danu awekaini emua i Sodomu goi medifisike oraararo amuke anifisine weiro anaada Rodinu awekama i Sodomu goi imukari uiro ma owere eraada damena ari dai omawere sini. ³³Ainama danu arara mane yewa orofaro me ibeifine ufekuie idua feafekua wei. Nono aina ainama emua arara me yewa orofaro ibekaie emua me ibene ibene ibifeisaya wei. I wake yabake ba wemaro nauawe wei. ³⁴I dumuro eme una raara demuiro nauka aine ibifisisiie nono moi mi waure anifekuro nono moi mi mane aine ibifekua wei. ³⁵Moi awekayai demuiro okea oukeifisisie moi una waure anifekuro nono moi una mane ibifekua wei. ³⁶Eme una raarayai demuiro waiyaro waiya ukeifisisiie moi mi fare mune waure anifekuro nono moi mi mane ibifekua wei. ³⁷Yesuma eno weiro Danu iwoka ukeka orouma ma owekake eno weisa, Dai Waria Mi, i ari enoe abo orofaro eno ufeku weisa? Eno weisaro Yesuma emuabake dubu waure weadama ibake eno wei, emenu ofe bou aboro ibifekuie iro udu adama ifisane anifeisaro yama i orofa iwoka ufoisaya wei.

I kodo yawokeka mini wabu awekabake dubo waure wei wake

^1-2Yesuma eme guriguri ukeifisake da medifisane ibake yewa wake dubo waure wakeroma emuabake eno wei, moi goiro kodo yawokeka dai mi dawae Godini emeini emuabake ia iyare dakeibike ibeibi. ³Ibeibiro nono I goiro moi wabu awekama ibaada i kodo yawokeka mibairo fareibike eno weibi, Naini wasai ukaku mi wearo i ukakubai sabu medifi weibi. ⁴Dawae eno mane aine wai ure weibiro i kodo yawokeibi mi dawa arara daui. Dawae arara mero i awekama dawabairo areare faraada eno weibiro nauke awakebe we imui, nae Godini emeini emuabake ia sine dakakunebairo nono dawama nabairo areare faraada eno weakua wei. ⁵Nono yewa wabu awekama nabairo areare fare weakuba danu weaku enaenari umaua wei. Eno da umauie dawa nabairo areare fareifekuba nanu ibeka meramawere sifekua eno we imuia wei. ⁶Yesuma eno weike nono wei, i meramawere kodo yawokeka dai minu wake nauawe wei. ⁷Dawa eno ukakuie Godinu wake naukaisa orouma Godibairo areare weaisaro emenu weaisa wake Godima naukenewaa ukakuba me wei? ⁸Euwa, emenu weaisa wake enaenari sabu sabu ukakua wei. Iduaroma i Ba Eme Sini Mima dooro nono owefekuke fafekuie emema Godinu wake ba adaadake naufeisa orou ma owere efiakuba me ariya wei?

I dakesi oi muneka mini i Ferosi mini emuabake dubo waure wei wake

^9-10Moi orouma emenu onaroubake eno we imuisa, iyae irauaiairo nono moi orou emua irauaiai meya eno we imuisaba ibake Yesuma yewa wake dubo waure wakeroma emuabake eno wei, moi miyaima dai sosi uwara ubarenaro guriguri ufisine anisi. Moi mi dawae Ferosi miro nono moi mi dawae dakesi oi muneka mi. ¹¹I Ferosi mima uyarike danu onami mane imuke guriguri ukaada eno wei, Babae Godi, nae moi orou ari eno meba ibake A we ma irauaiai ukakunea wei. Nae waira mi me. Nae merama ukeka mi me. Nae moi orounu aruma aweka enare odeka mi me. Nae yewa dakesi muneka mi ari eno meya wei. ¹²Moi fura yaisinaro odo raarayai uruna ise dakuneke nanu eraerabusa yaisina i daisi ofereni Abairo makakunea eno wei. ¹³Nono i dakesi oi muneka mima maru uike ekararo enarike guriguri ukaada danu oro uraada eno wei, Babae Godi, nae meramawere miya imukari uina weia wei. ¹⁴Yesuma i wake eno weike emuabake nono wei, Nanu wake nauawe, Godima i dakesi oi muneka minu ba me ukeka munike imuke medike i mi ma gienabu uiro dawae danu uwararo isare ania wei. Godima i Ferosi minu ba me ukeka mune imuke mede dauia wei. Ainama danu onami ma daiwere ufekuie Godima i mi dawa ma okoanaku ufekua eno wei. Nono ainama danu onami ma okoanaku ufekuie Godima i mi dawa ma daiwere ufekua Yesuma eno wei.

Yesuma okoa amarananaku we ma irauaiai urie wake

¹⁵Moi orouma emenu amarananaku Yesubairo waure anifisaro Yesuma emua ure burifiane waure farieka. Eno uisaro Yesunu iwoka ukeka orouma ekake dino wake weisa. ¹⁶Eno weisaro Yesuma i amarananaku u weike Danu iwoka ukeka oroubake bunawereroma eno wei, i amarananaku Nabairo aafisane weakunea eno wei. Emenu aareka daaba dadau dauawe wei. Aina ainama i amarananakunu imukeka ari imufeisake emenu onarou we ma daiwere da ufeisaie Godinu yawokaku orofae i ari eno orou emenua wei. ¹⁷Yabake ba wake wemaro nauawe wei. Ainama Godinu yawokaku amaranakunu ure ribuku ukaisa enaenari da ufekuie Godinu yawokaku orofaro da anifekua Yesuma eno wei.

I eraerabusa keuwere bobo mibake wei wake

¹⁸Moi yawokeka mima Yesubake eno wei, irau sisa mi, aneaneme umauke me ibene ibene ibimau wei? ¹⁹Eno weiro Yesuma ma owerike dawabake eno wei, anemebake Nae irauaiai weaku? Godi Danu mane irauaiaiya moi mima irauaiai meya eno wei. ²⁰Eno weike nono wei, Godinu darawadue a iwoka ukaku. I darawadue eno, moi minu aruma aweka da enare odia, eme da ma feaa, waira daua, wayai weadae meo da wea, anu amae babaenu wefisisi enaenari ukenewaa ua. I darawadue i ari enoya Yesuma eno wei. ²¹Eno weiro i mima wei, i darawadu yaisina nanu okoanakuroma eno ukeibakunea wei. ²²Eno weiro Yesuma naukada ma owerike nono wei, demuinaku uke dakakua wei. I ie eno, anu eraerabusa yaisina make oi mufakuke i eraerabusa me oroubairo i oi mayanake Nanu umuro aara wei. Eno ufakuie abake urero eraerabusa mamekuro i eraerabusae urero ibifekua wei. ²³Yesuma eno weiro i mima nauike danu eraerabusae keuwere ibake iboo naisa imusu odaada imuka merama ui. ²⁴Yesuma i imuka merama bobo mi eraada eno wei, i eraerabusa keuwere bobo mima Godinu yawokaku daabaro anaadae ara daiwere ukeifekuro anifekua eno wei. ²⁵Moi abu danu ibiye kemo dawama mara bobo ebaro fare anifekuie girisi da ufekua weike wei, nono i eraerabusa keuwere bobo mi dawae Godima yawokaku daabaro anaadae ara daiwere ufekua wei. ²⁶Eno weiro i wake naukeibisa orouma eno weisa, enoba ainama wirofeku weisa? ²⁷Eno weisaro Yesuma emuabake ma owerike eno wei, emema eno da ufeisaie Godima i wenebai i yaisina Danu mane ma wirofiakua wei. ²⁸Eno weiro Fidama Yesubake ma owerike eno wei, iyae iyanu uwara meisike Anu umuro aaraisia ea wei. ^29-30Eno weiro Yesuma emuabake nono wei, nanu ba wake wemaro nauawe wei, ainama danu uwaraini awekaini kakae nabueini danu amae babaeini amarakuini Godima dawa yawofine ibake i yaisina medinuba awoenae Godima dawabake keuwere moko mafekuro nono dubuenaroe me ibene ibene ibifekua, Yesuma eno wei.

Yesu Danu feafeku wake nono wei

³¹Yesuma Danu iwoka ukeka orou duero (12) mune imusu odirieke emuabake eno wei, Derusaremu goiro anaisia eawe wei. Iro ane fafeisiie i Godinu we bou urie orouma i Ba Eme Sini Mibake adinaro aneme weibisaie enaenari ufekua wei. ³²Iro Dawae i imusu orounu wana duboro mame odifeisaro emuama mufeisake Dawa uke irukada meramawere uke yafeisake Danu iboo naisaro wisiomu uke yafeisaya eno wei. ³³Eno uke yafeisake mobuma ufeisake ma feafeisaro odo buuba me sifekuro nono uyafekua wei. ³⁴Yesuma eno weiro Danu wakeye dubo waure wenu ariya we imukada ma nuna daiwere uisa.

Yesuma moi naisa kikori boboro eenu weeka mi ma wiroi wake

³⁵Yesuma Deriko goiro fafine amuke aneibibaie moi naisa kikori bobo mima daaba udiro yaure ibaada eenu weibi. ³⁶Eno ukaada i fareibisa orounu wake goro nauike eno wei, emuade aneme ukaada weaisa wei? ³⁷Eno weibaie i orouma ma owekake eno weisa, Yesu, Nasaredi goi mi idua fare anakua weisa. ³⁸Eno weisaro i naisa kikori bobo mima daiwere eno wei, Yesu, Deiwidinu sisia mi nabake imukari ua wei. ³⁹Eno weiro i moi orouwerema mediake eno da wea weisaro dawama nono daiwereroma weada wei, Yesu, Deiwidinu sisia mi nabake imukari ua wei. ⁴⁰Eno weiro Yesuma enarike eno wei, i mi waure aarawe weiro enaenari uisa. ⁴¹I mi Yesubairo waure fakaro Yesuma dawabake eno wei, anu ararae aneme umane weaku wei? Eno we nauke eriro i mima wei, Dai Waria Mi, nanu ararae nanu naisa forake emane weakunea wei. ^42-43Eno weibaie Yesuma wei, anu Na imukeka imukae daiwere ibake wirokinua anu naisama ea weibaie i mi idua naisa foraike erike Yesunu umuro anaada Godinu ibi we ma daiwere ui. I ku siane ibisa orouma ibai ekake Godi we ma irauaiai uisa.

Yesuini Sakiyasini emenu wake

^1-2Yesuma Deriko goi fare fisii yare aneibi. Fare aneibiro moi mi danu ibiye Sakiyasi dawae adinaroma i goiro ibeibi. Sakiyasi dawae dai dakesi oi muneka miro nono dawae oini eraerabusa keuwere bobo mi. ³Yesuma fare aneibibaie Sakiyasima Yesu efine aneibiro eme keuwere fare ku siakaro dawae fu miba Yesu ere daui. ⁴Enoba iduama medike durame ane sikamu ana daaro amuke ane yauri. ⁵Amuke ane yaure ibiro Yesuma i orofaro fare anaada eku eribaie i mi idua yaure ibiba Yesuma eno wei, Sakiyasi, anu uwararo anakunea sabu isare aara wei. ⁶Eno weiba ibake i mima sabu isarike daiwere rooro ukaada Sakiyasima danu uwararo Yesu waure ani. ⁷I fare ku siane ibisa orouma ibai ekake wake mumuuroma eno weisa, Yesuma yeka meramawere minu uwararo ibinua eno weisa.

⁸Sakiyasima Yesunu ibooro enare ibaada eno wei, Dai Waria Mi, ea. Nanu eraerabusa moibai nanu mumauke moibaiye i eraerabusa me oroubairo mamiaua wei. Eno weike nono wei, moi minu eraerabusa waira uebaini iini nono moi foini (4) i mibake ma owere mamaua eno wei. ⁹Eno weiro Yesuma wei, awoenae Godinu wirokeka yewa uwararo farinua wei. Yewa mi dawaini Eibaramunu sisia miya Yesuma eno wei. ¹⁰I Ba Eme Sini mima yewa mini i Godibairoma fe yaraisa orouini emua yaisina yodia ufiake ma wirofiane ibake faria Yesuma eno wei.

I gorudi oibake dubo waure weaku wake

^11-12Yesuma anike Derusaremu goiro fafine ui. Ane fafine uibaie i Danu umuro aneibisa orouma Godinu yawokaku odo sabu fafekua eno we imukeibisaba ibake Yesuma yewa wake emuabake moi dubo waure weeka wakeroma eno wei, moi dai mima danu adaadake yawokeka waiya ukeka wake moi orofaro anifike naufine ui. ¹³Anifine ukaada danu waiya ukeka orou deni (10) weiro dawabairo ane faka. Dawabairo ane fakaro emua demui demuibake duenidi kina (K20.00) marieke wei, yewa oi yawokenewaa uaweke i oima oi muneka waiya ukeibiawero na owere famake emia wei.

¹⁴Eno weike danu orofa orou emua arara me danu yawokeka ibake moi orou we odairiekaro anisake dawabake eno weisa, iyae arara me anu yawokeka ibake iyae ama da yawomisia eno weisa. ¹⁵Dubuenaro i mima danu adaadake yawokeka wake nauike owere goiro aare fari. Goiro owere aare farike danu oi marie orou emuae i oi muneka waiya aneaneme ukeibisa ibai dawa iwoka sifine ibake emua weiro dawabairo aare faka. ¹⁶Dawabairo aare fakake i bokai mima eno wei, dai mi, anu makara duenidi kina (K20.00) duboro moi du aderedi kina (K200.00) odinea mua wei. ¹⁷Eno weiro danu dai mima eno wei, ae gienabu irauaiai waiya ukeka mi. Abake okoanaku manero irauaiai yawokinuba goi yaisina deni (10) mamauanero yawofiakua wei. ¹⁸Nono moi abana mima farike eno wei, dai mi, anu makara duenidi kina (K20.00) duboro moi wani aderedi kina (K100.00) odinea mua wei. ¹⁹Eno weiro danu dai mima eno wei, ae goi yaisina fai (5) mamauanero yawofiakua wei. ^20-21Nono moi mima farike eno wei, dai mi, anu makara duenidi kinae yewadoya ea wei. Eno weike nono wei, ae arawere yawokada waiya wawe mero uruna munakuie ama moibai ode dakakuke yaisina munakua wei. Enoba nae anubai iwoka sinaada abake ia sineke anu makara duenidi kina (K20.00) wauma oba ueke fe odeke a farinuroma ai munea wei. ^22-23Eno weiro i danu dai mima eno wei, ae meramawere mi! Ibake nanu imukeka iwoka sinaada nanu we enaenari uke dakinuba ae fanisi mamauanea wei. A iwoka, nae arawere yawokakuneke waiya wawe dakakukema nono urunae me munaada moibai ode dakakunebairoma me munakunea wei. Ie a iwoka sinakukema nono anemebake nanu oi banika uwararo odifaro dubo oi odifisaro fare mune daune wei? ²⁴Eno weike i fare ku siane ibisa oroubake eno wei, i minu duenidi kina (K20.00) mareke muaweke yeka du aderedi kina (K200.00) bobo mibairo maewe wei. ²⁵Eno weiro emuama eno weisa, dawabairo du aderedi kina (K200.00) ibinudeie weisa! ²⁶Eno weisaro i dai mima emuabake eno wei, nanu wake nauawe wei, i keuwere bobo mibairo moibai duboro mafekua wei. Nono i keu menaku ibifekubainakue yaisina mareke mufekua wei. ²⁷Eno weike wei, nanu yawokakunia moi oroue wasai orou ari nanu yawokekae emua arara meya emua waure aayakaweke nanu ibooro emua uyakawero feafisa wei. Yesuma i dubo waure wakeroma i oroubake eno wei.

Yesuma Derusaremu goiro Kini mi ari uke ani wake

²⁸Yesuma i wake we me sinike Dawako Derusaremu goiro amuke aneibiro Danu iwoka ukeka orouma Danu umuro amuke anisa. ^29-30Amuke aneebe Bedifeidini Bedini goiyairo fafisane uisa. I goiyaie oriwa oraara udiroba iro amuke ane fafisane uisaro Yesuma weiro Danu iwoka ukeka miyai Dawabairo ane fakiro eno wei, yeka moi goiro aniawake i goiro fafuaisiie i goi araweko uwara kubune kukubu kairo moi okoa doniki weaisa abu doise oisaro ibinuba efuaisiie ma woromiawake waure aarawa eno wei. I okoa donikinu duburoe moi mima yaure meya wei. ³¹Eno weike nono wei, i okoa doniki anemebake naa ma woromaisi wefeisaie emuabairo eno weawa wei, uwanu Dai Waria Mima mufike iro yaure anifine wenuba munaisua weawa wei. ^32-33Eno weike we odairiero ane fakike Danu wei wake enaenari uke ibiro eki. I okoa doniki ekike ane naa ma woromeibisibaie i doniki ubi orouma eno weisa, anemebake i doniki naa ma woromaisi weisa? ³⁴Eno weisaro emuama ma owekike eno weisi, uwanu Dai Waria Mima mufike iro yaure anifine wenuba munaisua eno weisi. ³⁵I miyaima i okoa doniki waure fare oisi. Waure fare oisiro Danu iwoka ukeka orouma wau i doniki duboro yaweke oisake weisaro Yesu i doniki duboro yauri. Yesuma i doniki duboro yaurike ani. ^36-38Yesuma i doniki duboro yaurike aneibiro emema emenu wau daabaro yaweke ode aneibisaro i dubo duboro ani. Anike Oriwa oraara udiro fareibibaie Danu wake naukeibisa orou keuwere Danu buna ukeka keuwere ekaba ibake rooro daiwere uisake ousana weada Godinu ibi we ma daiwere ukaada daiwere eno weisa, iyanu yawokeka Dai Mi Godinu ibiro idua farinua weibisa. Godima Dawa ma irauaiai ufekua weibisa. Urero irauaiai ibinu Godinu ibi we ma daiwere ukaisia eno weibisa. ³⁹Eno weibisaro moi Ferosi orouma Yesubake eno weisa, Sisa Mi, Anu iwoka ukeka orou wearo i weaisabai medifisa eno weisa. ⁴⁰Eno weisaro Yesuma wei, yabake wemaro nauawe wei, yewa orouma wake da wefeisake medifeisaie i oma yaisina wake daiwere wefeisaya Yesuma eno wei.

Yesuma Derusaremu goibake ii wei wake

^41-42Yesuma i Derusaremu goi ubiubi faraada i goi orou erieke ii weada eno wei, awoenae Godinu me makekabai ma nuna ukakuba Godima Danu me ibeka abairoma ma feyarakuro ere dakaisaya wei. ^43-44Eno weike nono wei, moi odo fafiro wasai ufeisa orouma fafeisake yewaro gibudi daunada kara uke gibudi anu marao kararo siafisake kara ufisake a ma doroo yaraada anu orou yaisina ma feafiakasaya wei. Nono moi omama moi omanu duboro da ibifeku. Yae Godinu me makekae ya arara meba ibake i ari eno ufeisaya Yesuma eno wei.

Yesuma i dai sosi uwara ubarenaro ani wake

^45-46Yesuma i dai sosi uwara ubarenaro ane amui. Ane amuike i eraerabusa make oi muneibisa orouini i uwara ubarenaroma we yowerada emuabake eno wei, Godinu bukaroma eno weaku, Nanu uwarae emenu guriguri ukeka uwaraya wei. Nono yama Nanu guriguri ukeka uwarae waira ukeka orounu uwara ubu ukaisaya eno weakua wei.

^47-48Yesuma aine wai ure i dai sosi uwara ubarenaro we ma iwoka ukeibirie. Eno ukeibiriebaie i dai ofereni ode sibore sianeka orouini i Du orou emenu yawokeibirieka orouini emuama Yesu ma feafisane daaba yodia ukeibisabaie i orou yaisina Danu wake naukenewaa uisaba ibake Dawa ma feareka daaba fou ure dauisa.

Yesunu bunabake we nauke eka wake

¹Moi odoro Yesuma we ma iwoka ukaada Godinu irau wake weibibaie i dai ofereni ode sibore sianeka orouini i darawadu we ma iwoka ukeibisa orouini dai bisara orouini emuama Yesubairo ane faka. ²Emuama Yesubairo ane fakake eno weisa, i ari enoe Anu bunaro eno ukaku? Ainama Abairo i ari eno buna makakuyainuro eno ukaku? Wearo naufe weisa. ^3-4Eno weisaro Yesuma emuabake ma owerike eno wei, Nanu we nauke erekako bokai wemaro yanu moko wake weawero Na nauma weike nono wei, Dioninu babadaido ukeka ie ureroma isare fariba ba emebairoma fari wei? ⁵Eno weibaie i orou emenu emenu wake we makanada emenu mane eno weisa, aneme aneme wefeisi arie weisa? Ureroma isare faria wefeisiie Dioni anemebake imuke dakaisa wefekua eno weisa. ⁶Nono emebairoma faria wefeisiie yewa ku siane ibinisa orou yaisina Dioni dawae Godinu we bou ukeka miya eno we imukaisaba iyae omama umisaisaya eno weisa. ⁷Emenu mane eno we makakake Yesubairo fakake eno weisa, iyae iwoka meya weisa. ⁸Eno weisa ibake Yesuma emuabairo nono wei, iduaba Nanu ainama buna makakunararo ukakune ibai yabairo da wemaua eno wei.

I gureifi waiya yawokeibisa meramawere oroubake dubo waure wei wake

⁹Yesuma i orou yaisinabake yewa wake dubo waure wakeroma eno wei, moi mima gureifi yobai waiyaro wawe odike moi orouma yawokeifisane marieke dawae moi orofaro ani. Anike iro manabe kai keuwere ibeibi. ¹⁰Ane iro ibeebe ayo ureka oya fariro danu waiya ukeka moi mi i moi gureifi kaibai mufine we odairo ani. Ane fariro i waiya yawokeibisa orouma emua arara me i gureifi makeka ibake i mi yabaisake usima ureebe gureifi kaibai make dauisake me ma owere odaisaro ani. ¹¹I dai mima nono moi mi we odairo ane fariro enaenari yabaisake usima ureebe meramawere uke yakake gureifi kaibai make dauisake me ma owere odaisaro ani. ¹²Nono i dai mima moi mi we odairo ani. Ane fariro enaenari yabaisake usima ureebe bou bedako badako uke oisake dawa we yowekaro ani. ¹³Eno mane ukeibiriekaba ibake i waiya ubi mima eno we imui, aneaneme umau arie we imui? Nanu amara ubima we odaimauro dawabake wefeisake iifa ufeisaya we imui. ¹⁴Eno we imuike danu amara ubi we odairo ani. Ane fariro emenu emenu we makakake eno weisa, yewae danu amara ubiba dawa ma feafeisike danu waiya iyama mufeisia eno weisa. ¹⁵Eno weisake i mi munaadae waiya oro dubuenaro siakake dawa ma feakaya Yesuma wei. Eno weike emuabake nono wei, i waiya onami mi emuabake aneme ufeku wei? ¹⁶Eno weike nono wei, Dawae anifekuke i waiya yawokeifeisa orou ma feafiakuke danu waiya mune imusu oroubairo mafiakua eno wei. Eno weiro nauisake eno weisa, yewa mi! I ari eno daufekua weisa. ¹⁷Eno weisaro Yesuma emua eraada eno wei, ya aneme weaisa? Godinu bukaroma eno weaku, i uwara ma enareka orounu mune siaka omae i bokai kora kukubu kai ari sinia eno wei, Godinu bukaroma anemebake eno weaku wei? ¹⁸Ainama i omaro ure akuaku ufekuie danu onami ure birabira yafekua weaku. Nono i oma isafekuke aina minu duboro isare ufekuie i miye gibudi ari sifekua Yesuma eno wei.

I dakesi oi makekabake we nauke ereka wake

¹⁹Yesuma i wake emuabake dubo waure wakeroma weike eno weiro i wake emuabake weibibai emua iwoka uisa ibake i darawadu we ma iwoka ukeibisa orouini dai ofereni ode we sibore sianeka dai orouini emuama Yesunu umu wana naama uwafisane uisakema nono i ku siane ibisa oroubake ia iyakake meisa. ²⁰Meisake imukenewaa uisakema moi orou Yesubairo we odairiekaro anisa. I orouma uke iruke enaada Yesu ukeibi sineibibai ere nauke ufisane anisa. Eno uke ere nauke ufisake Yesu mune i dai gaemani orounu wanaro mame odifisane ibake Danu ukeibi sineibibai ere naukenewaa uisa. ²¹I orouma Yesubake eno weisa, sisa mi, Ae eme yaisinabairo weakuro enaenari sinakuie enaenari ukakua weisa. ²²Moi orou emua daiwerero nono moi oroue okoanakua eno we imuke dakakuke ba adaadake we ma iwoka ukakuneke meomao uke dakakuke ba Godinu wake mane weakua eno weisa. ²³Eno weisake nono weisa, i Romani gaemani mi Kisabairo dakesi oi mafeisi ide irauba me weisa? ²⁴Eno weisaro Yesuma i orou emenu imuisake we irukeibisabai iwoka sinike eno wei, i oi kaibai makowero ema wei. Eno weiro maisaro eraada eno wei, yewa ainanu iboo naisaini owaowaini yewado ibinu ariya eawe wei? Eno weibaie emuama eno weisa, ie Kisanu iboo naisaya weisa. ²⁵Eno weisaro Yesuma nono wei, iduaya Kisanu aneme aneme yaisina Kisabairo maeweke nono Godinu aneme aneme yaisina Godibairo maewe wei. ²⁶Eno weiro nauisake i ku siane ibisa orounu ibooro Yesu uke iruke dauisake Danu wei wakebake imuka foria uisake wake muu uisa.

I fearekaroma nono uyarekabake we nauke ereka wake

²⁷Nono dubuenaro moi Sadusi weaisa orouma Yesubairo aare faka. I Sadusi orouma eme feafeisake iroma nono da uyafeisaya eno weada we ma iwoka ukeibisa. ²⁸I orouma Yesubairo fakake eno weisa, Mosesinu darawaduma eno weaku, moi mima aweka mufekuke amara aruma dore mero me ibeebe feafekuie danu nabuema danu aweka wabu mufekuke i feafeku mibake amara aruma dofeku eno weakua weisa. ²⁹Eno weisake nono weisa, demui aidakaku yaisina seweni (7) ibeibisaya weisa. Ibeebe i bokai mima aweka munike amara aruma dore mero me ibeebe feari. ^30-31Feariro danu umuro isari mima danu kakanu aweka wabu munike amara aruma dore mero me ibeebe feari. ³²Nono abanaro isari mima i aweka wabu nono muniro eno mane emua yaisina mukakema nono moi amara aruma dore mero me ibeebe feare me sikaro i aweka wabu dawae dubuenama fearia eno weisa. ³³I demui aidakaku yaisina seweni emua i demui aweka una mukakema feakaba nono dubuenaro i feaka iroma uyafeisa i odoro abo mima i aweka wabu mufeku weisa? ³⁴Eno weisaro Yesuma emuabake ma owerike eno wei, yewado awoena ibinisa orouma ayakaku mune makanaisaya wei. ³⁵Nono i Godima iraua weaku orou emua i feaka iroma uyafeisake me ibene ibene ibifeisa i orouma ayakaku da uke makafeisaya wei. ³⁶I ibifeisa orofaroe Godinu aneruini emuaini emuae demui ari sifeisa. I orou emuae Godinu amaraku sifeisaba ibake iro da feafeisaya eno wei. Godima emua i feafeisa iroma ma uyafiakuke me ibene ibene ibeka emuabairo mafiakuba ibake emuae nono da feafeisaya eno wei. ³⁷Yesuma eno weike nono wei, Mosesima eno weia wei, Godima i fearaisa orou ma uyarakunea weia wei. Mosesima i feare mero yareibaku ananaku eraada eno wei, Godiye iyanu sisia sirorari orou Eibaramuini Aisikini Deikafuini emenu Godiya eno wei. ³⁸Yesuma eno weike nono wei, Godi Dawae i me ibeka orounu Godiba ibake i feaka orou emuae awoena yaisina me ibinisa. Godi Dawae i feakake me sika orounu Godi me ibake Godima eno weaku, Nae i me ibinisa orounu Godi weakua Yesuma eno wei. ^39-40Yesuma eno weiba ibake i darawadu we ma iwoka ukeibisa moi orouma wake moi weekabai emua arara da sirieba ibake eno mane weisa, sisa mi, ba weakua eno weisa.

I Godinu ma wiroke mune aneka mibake we nauke ereka wake

⁴¹I orouma eno we nauke ekaro Yesuma ma owerike eno wei, i darawadu we ma iwoka ukeibisa orouma i Keriso Deiwidinu sisia mi anemebake eno weaisa? ^42-43Deiwidima i Samusi bukaro i Mesaiabake eno weaku, Godima nanu Dai Waria Mibake eno wei, Nanu baena wana enaro yauaro aini wasai ukaisa orou yaisina Nama buna umake Anu eu umu wowonaro odimia eno weia weakua wei. ⁴⁴Yesuma eno weike nono wei, Deiwidima i Kerisobake weada Dawae nanu Dai Waria Miya weibairoma nono aneaneme Yesu Dawae Deiwidinu sisia mi sini arie Yesuma eno wei.

I darawadunu we ma iwoka ukeibisa oroubake Yesuma eme we iifa urie wake

^45-46Yesuma eno weike i orou yaisina emenu ibooro Danu iwoka ukeka oroubake eno wei, i darawadu we ma iwoka ukaisa orou erenewaa uforo wei! I orou emenu ararae yafawere wau fayaroma rune siafisaro fare isafiro i makediro enaisa orounu arie wake naufisake i Du orounu sosi ubarena irau orofaro emuako ane yaufisake banauro emuako i orounu ibooro irau orofaro ane yaufisane ukaisa oroua eno wei. ⁴⁷I orouma i wabu awekabonu eraerabusa yaisina fema waira ukaisake nono meo guriguri yafawere emema emua efisake naufisane ibake eno ukaisaya wei. Emuae eno ukaisaba Godima emua fanisi daiwere mafiakua Yesuma eno wei.

I wabu awekanakunu ofereni odeibi wake

¹Moi odoro Yesuma dai sosi uwara ubarenaro ane enare ibaada eribaie moi orou keuwere emenu ofereni makeka bogesiro oi fare sianeibisa. Sianeibisaro i eraerabusa keuwere orouma oi daiwere fare sianeibisa. ^2-3Sianeibisaro nono moi i eraerabusa me wabu awekama farike toea kai raaranakuyai fare sianiro Yesuma erike eno wei, Nanu ba wake wemaro nauawe wei. Yewa wabu awekama oi daiwere fare sianinuro i orou yaisina dai menaku fare sianisake anisaya wei. ⁴I orou emuabairo oi keuwere ibinubairoma emuae dai menaku fare sianisaya wei. Nono yewa wabu awekae danu uruna make muneka oi yaisina idua fare sianinuba ibake dawae oi daiwere fare sianinua Yesuma eno wei.

Yesuma i dai sosi uwara ma merama ufeisa wake

⁵Moi orouma i dai sosi uwara ekake eno weisa, i dai omawerewereini nono i dai sosi uwara ubarenaro i weree wereeini Godibairo we makeka eraerabusaini eawe weada iro ereibisa. ⁶Eno uke eraada weibisaro Yesuma nauike eno wei, yanu i awoena ibinuro eraisa ie moi odoro i oma yaisina ma ubere ubere yafeisaro moi omanakuma moi oma duboro da ibifeisaya eno wei.

Do munekaini oferi daiwere waurekabake wei wake

⁷Yesuma eno weiro Dawabake ma owekake eno weisa, abonodo i ari eno ufeku weisa? Aneme ufekuro efeisiroma eno ufeku weisa? ⁸Eno weisaro Yesuma emuabake ma owerike eno wei, moi orouma ya we irufiakaisaba erenewaa uforo wei. Eme keuwere we irufisane Nanu ibiro fafeisake eno wefeisa, nae i Kerisoya wefeisake i odo idua farinua eno wefeisaie emenu wake da naufoke emenu umuro da aniforo wei! ⁹I daiwere urane rarane ukeifeisa i wake naukeroma ia sineroma da aniforo wei. I ari eno ufekuroma i dubuena kai odo idua fafekua wei.

^10-11Yesuma eno weike nono emuabake eno wei, moi orofa gaemanini moi orofa gaemanini urafeisaro nono moi orofa akaka orou emenu imusu imusu urafeisaro i dooini amani amani ufekuro nono i orofa keuwerero arumu daiwere fafeku. Nono i oroorofaro arama daiwere ukaada oferi daiwere waufeisa. Urero ubu imusu imusu ufekuro efeisake ia daiwere iyafeisake nono urero moi buna ereka keuwere ufekuro efeisaya eno wei. ^12-13Yesuma eno weike nono wei, dawakoe emema ya ma merama eno uke yafiakaisa, yae i Du orounu sosi yawokaisa orounu wanaro mame odifiakaisake ana ebaro odifiakaisake i dai kini orouini gaemani yawokaisa dai orouini emuabairo Nanu ibibake yae waure ane emuabairo odifiakaisaya eno wei. Emua eno ufeisaie i furo Nanu wake idua emuabairo wefoisaya wei. ^14-15I orounu wayai weifeisa wakebake yama moko wake aneaneme wefeisiarie eno da wefoke ibaibake imukenewaa da uforo i yaisina yabake Nama wemauke buna imukeka mamiauro emenu moko wake wefoisaro i yaini wasai ukeifeisa orouma moko wake moi da wefeisaya eno wei. ¹⁶Yanu amae babaeini yanu kaka nabueini yayae wawaeini yanu goi demui orouini emuama ya umu wana naama uwafiakaisake ya wayai wefeisaro ya ufiakaisaro moibai yae feafoisaya wei. ¹⁷Eme yaisina yae Nanu ibi munaisaba ibake imuka ka ufiakaisaroma Godima ya unu kofiakuba irauaiai ibifoisaro yanu fouma idi deidemunakuma me sara da isafekua eno wei. ^18-19I meramawere uke yareifiakaisa ibaibake iura da maifoisake enare ara ukaada nono buna ufoisake enare arabi ufoisa i deima me ibene ibene ibifoisaya Yesuma eno wei.

Yesuma Derusaremu goi ma merama ufeisa ena wake wei

²⁰Yesuma ibai weike nono wei, i moi meremere orouma Derusaremu goiro enare kara ufeisaro efoisaie i Derusaremu goi ma merama ukeka odo idua fafekua eno wei. ²¹I odo idua fafekuro i Diudia orouma oraararo sabu amuke anifeisaro i Derusaremu goiro ibifeisa orouma i goiroma sabu anifeisaro nono i waiyaro waiya kuneifeisa orouma Derusaremu goiro owere fareroma ane dafeisaya eno wei. ²²Godinu we bou ukeibirie orounu weibisa wake i odoro Godima i Derusaremu goi orou enaenari fanisi mafiakua eno wei. ²³I odoro boana bobo awekaboini ama iseifeisa amaraku bobo awekaboini emenu anifeisa daabae dai meramawereya eno wei. Yewa orofa moi orouma imuka merama ufeisake i oroubake imuka ka daiwere ufiakaisaya wei. ²⁴Imuka ka daiwere uke yafiakaisake eme keuwere dai bauma faya kuufiakaisaro feafeisaro nono moi orou keuwere emenu umu wana naama uwafiakaisake moi oroorofaroma iro aboro aboro waure anifiakaisaya wei. I imusu orouma Derusaremu goiro uwara uwara ma doroo yafeisake amune adiadi yare aneebe emenu ibai medeka odo idua fafekuro medifeisaya Yesuma eno wei.

I Ba Eme Sini Minu farekabake wei wake

²⁵Yesuma emuabake nono wei, urero manabeini ewekaini muinaini ubu imusu imusu ufeisaro efoisaya wei. Yewa orofaro dawara ufe daiwere uyafekuke yama wefekuro emema ia daiwere iyafeisake ibai ma nuna ufeisaya eno wei. ²⁶Urero i eraerabusa yaisina amani amani ufeisaie emema iini i fafeisa eraerabusaini yaisina efeisake imuka merama imufeisake fearaisari ufeisake birufeisaya eno wei. ²⁷Nanu weakune i yaisina enaenari ufekuie i Ba Eme Sini Mima ou ubarenaro Danu bunaini Danu edorowereini idua fafekuro ya efoisaya wei. ²⁸I yaisina ukeifekuie yanu ma wirokeka mi idua fafekua gienabu enaeweke urero eku ereibiawe Yesuma eno wei.

I boruba anabake we ma iwoka ukeka wake

²⁹Yesuma emuabake dubo waure weike eno wei, i boruba anaini moi imusu ana eyakaweke iwoka siawe eno wei. ³⁰Awoena ana omuru yanakakuie i arumu idua farinua eno we imukaisa. ³¹I ari enoe Nanu wene wake enaenari awoena ufekuro efoisake Godinu yawokaku odo idua fafine ukinua eno wefoisaya wei. ³²Yabake ba wake wemaro nauawe wei. Yewa awoena ibinisa orou yaisinawere da feare soafeisaro i wenebai ufekuro efeisaya wei. ³³Ureini dooini me sifekuro nono Nanu wakeye da me sifekua eno wei.

Iyanu iyanu ukeka sineka yawokenewaa ufene wei wake

^34-35Erenewaa uforo! Me sarawere da ibifoke gogore adua da ifoke yewa orofaro eraerabusa mane da imufoke i afa sianaisaro adama meya weakuke fare anakuro fema munaku i ari i odo yabairo fema fanao ufekuba ibake wei. I odoe yewa orofa akakaro ibinisa orou yaisinabairo fafekua eno wei. ³⁶Erenewaa uforo! Ya buna mufoke guriguri uforo i meramawere fafekuke ufeku ima ya da ma merama ufinea i Ba Eme Sini Minu ibooro me irauaiai enaewe wei.

³⁷Yesuma aine wai ure dai sosi uwara ubarenaro we ma iwoka ukeibirie. I eweka furo we ma iwoka ukeibirieke dumuroe Oriwa oraararo amuke ane aineibi. ³⁸Eno ukeibiro i orouma wai awanakuro Dawabairo Danu wake naufisane i dai sosi uwararo fareibisa.

Dai orouma Yesu ma feafisane we kuureibisa wake

¹Godima i Isaraera orounu Idifiroma waure aneka banau odo idua fafine ui. I banaue i ure wawareka iraa yisidi me buredi ifisane uisa banau. ²I odoro i dai ofereni ode sibore sianeka orouini i darawadu we ma iwoka ukeibisa orouini emuama Yesu ma feafisane daaba yodia ukeebe i moi orouwerebake ia iyakake i daaba fou ure dauisa.

Diudiasima Yesu do mafine wei wake

³I odoro seidanima Diudiasi Ikariadanu imuka ubarenaro isari. Diudiasi dawae Yesunu moi duero (12) iwoka ukeka mi. ⁴Diudiasima i dai ofereni ode sibore sianeka oroubairo Yesu do mafine ane wei. ⁵Eno ane weiro i orouma rooro uisake Diudiasibake oi mafisane weisa. ⁶Weisaro ibake Diudiasima Yesu do mafine daaba yodia ukeibi. Dawa arara me eme keuwere ibai iwoka ukeka ibake yodia ukeebe i daaba fou uri.

Yesuma i Idifiroma waure aneka banau ifine uke bou ui wake

⁷Godima i Isaraera orounu Idifiroma waure aneka banau odo idua fari. I furoe ure wawareka iraa yisidi ode me buredi iseibisake i banaunu mamoe abunaku una deidemu kuaiyama ureibisa. ⁸Enoba Yesuma Fidaini Dionibake eno wei, aniawake i banau uke bou ukeibiawaro iya aafero ife wei. ⁹Yesuma eno weiro emuama Dawabake eno weisi, aboro ane uke bou ufuku weisi? ¹⁰Eno weisiro Yesuma nono wei, i goiro aniawake moi adua kore aneifeku mi efuaisiie danu umuro aniawa wei. ¹¹Ane danu uwara ubarenaro amufuaisiie i uwara ubi mibairo eno weawa, uwanu Sisa mima wenua, anu awaawa orou faraisake yauraisa dubodei ooru we siboaro iro Naini Nanu iwoka ukeka orouini iyama iro ibaada i banau uruna ife eno wenua, weawa wei. ¹²Eno weawaro yabake moi dai ooruini uruna iseka sebo ma iwoka ufiaro iro ibaada iyanu uruna uke bou ukeibiawa wei. ¹³Eno weiro anisike Danu wei enaenari ekike i uruna uke bou ukeibisi.

Iwa iseka odobake wei wake

¹⁴I banau uruna iseka odo idua fariro Yesuini Danu afasoro orouini emua i uruna ifisane yauka. ¹⁵Yaukake Yesuma emuabake eno wei, Nanu oferi waureka odo idua fafine ukakuba ibake yaini yewa uruna isenewaa umane weakunea eno wei. ¹⁶Yabake Nanu ba wake wemaro nauawe wei. Yewa isakuneie feamauke nono yewa banau uruna da ise ibeimauro Godinu yawokaku odo fafekuie ai nono imaua wei. ¹⁷Yesuma eno weike nono waini fanigini munike Godibairo we ma irauaiai uike emuabake wei, yewa fanigini muaweke ya yaisina iawe wei. ¹⁸Yabake Nanu ba wake wemaro nauawe wei, Nae i naadidi kai iduda nono da ise ibeimauro Godinu yawokaku odo fafekuie yaini idua nono ifeisia eno wei. ¹⁹Yesuma eno weike i buredi munike Godibairo we ma irauaiai uike ma birabira yarike emuabairo makaada eno wei, yewae Nanu oferoma nono yabake ma birabira yarakunea isaada Na imukeibiawe eno wei. ²⁰Uruna ise me sikaro Yesuma i fanigini munike eno wei, yewa faniginie Nanu awoena arararo uke makaneka iwa, enoba ie yabake isafekua eno wei.

²¹Yesuma eno weike nono wei, Na we sibofaraku mini yewa seboro demuiro yaure ibinisua eawe wei. ²²I Ba Eme Sini Mima feafekua Godima eno weakuba ibake enaenari feafekua wei. Nono Na we sibofaraku miye Godima fanisi daiwere mafekua eno wei. ²³Yesuma eno weiro Danu iwoka ukeka orouma emenu emenu we makanada eno weisa, ainama i ari eno ufeku weibisa?

Yesunu iwoka ukeka orouma daiwere sifisane emenu emenu we makaneibisa wake

²⁴Yesunu iwoka ukeka orouma bebekuma wake we makanada eno weibisa, iyanu ibinisi kuro aina mima daiwere sifeku weibisa? ²⁵Eno weibisaro Yesuma emuabake ma owerike eno wei, i imusu yawokeka dai orouma emenu waiya ukeka orou arawere yawokakunekaroma nono emenu waiya ukeka orouma emuabakeye iyanu irauaiai yawokaisa oroua wefisane ibake eno uke yawokaisa. ²⁶Nono yabairoe eno me. Yabairo yanu dai miye okoanaku ari sinakuke nono dawae yanu waiya ukakua wei. ²⁷I sebo ubiubinaku yaure ibaada uruna isaku mi dawae daiwerero nono i urunabake waiya ukaku mi dawae okoanaku. Nono yabairo Nae yanu waiya ukakunea Yesuma eno wei.

^28-29Yesuma emuabake nono wei, Nabairo awe waa fareibaku odo odoro yama Nabairo ibeibaisaba ibake Nanu Babaema Nabake yawokeka orofa makara enaenari yabake makakuniaya wei. ³⁰Yama Nanu yawokeimau oroforo Nanu seboro yaure ibaada Naini urunaini aduaini ifoisake nono i Isaraera orounu naiyemuku dueronu (12) orou yaisina yama yawokeifoisaya eno wei.

Fida Dawa Yesu na iwoka meya eno meo wefeku wake Yesuma i wake eno we bou ui

^31-32Yesuma Fidabake eno wei, Saimoni, emema uidi kaibai saboroma kore sianaisaro oyauma ifuru afuru ure fufuke sianaku enaenarie seidanima danu ararae ya orou yanu imuka ma nuna ufiaro yanu irau imukeka me sifine ukakuba ibake Godibairo abake guriguri une. Nono dubuenaro anu imukeka Godibairo ma owefakuie anu naiyemukunu imukeka ma ara ua wei. ³³Eno weiro Fidama wei, Dai Waria Mi, Aini ana ebaro animaua wei. Aini fearenewaa umaua wei. ³⁴Eno weiro ibake Yesuma wei, Fida Nanu wake naua wei. Kokoroko yama we dauke ibifekuro ako Nanu ibi buuba we ma fe yaraada Dawa na iwoka meya eno meo wefakua Yesuma eno wei.

I fauisini yoakeini bauini i yaisinabake wei wake

³⁵Yesuma Danu iwoka ukeka oroubake eno wei, adinaro ya we odaiyero fausini yoakeini moi umu fogowoini mune dauisake anisa. Yanu anisaie irauba me? Eno we nauke eriebaie iyanu anekae irauaiaiya eno weisa. ³⁶Eno weisaro Yesuma eno wei, awoenae i fausini yoake bobo orou ya i erabusaini waure aniaweke ba bau me orou emenu dubo barukeka make oi muaweke ba bau oima make muawe eno wei. ³⁷Eno weike nono wei, Godinu bukaroma Nabake eno weaku, Dawaini i meramawere orouini emuae demuiya eno weaisaya weakua wei. Idua Godinu bukaroma Nabake eno owaowa uke oisaro ibinuba enaenari ufekua eno wei. ³⁸Yesuma eno weiro emuama eno weisa, Dai Waria Mi, ba bau feka raara yewadoya ea weisabaie iduaya mediawe Yesuma eno wei.

Yesuma i Gesemani waiyaro guriguri ukeibi wake

³⁹Yesu i uwara ubarenaro isarike Danu adinaro Oriwa oraararo amuke aneibi enaenari amuke aniro Danu iwoka ukeka orouma Danu umuro amuke anisa. ⁴⁰Iro amuke ane fakaro Yesuma emuabake eno wei, guriguri uawe ukeebe meramawere munao ufoisake meramawere unao ufoisaya eno wei. ^41-42Yesuma eno weike emua medirieke yafawere me ekanaku eka ani. Anike ifoma kodudu yanaike guriguri ukaada eno wei, yewa merama ure yanakewere wadada adua ari, Nabairoma mufane wefakuie mua wei. Eno weike nono wei, Nanu arararo da uake Anu ararama ua wei. ⁴³(Ureroma aneru Yesubairo me ari uke isare aarike Yesu ma arabi ui. ⁴⁴Ma arabi uiro Yesuma imuka oferi daiwere waurike guriguri ukenewaa uiba ibake Danu wadada iwa arie dooro isari.)

⁴⁵Yesuma guriguri ukeebe medike uyarike Danu iwoka ukeka oroubairo owere ane farike eribaie emua imuka merama uisake nauka aine ibisaro fare erie. ⁴⁶Emua fare erieke eno wei, anemebake nauka aine ibinisa wei? Uyaeweke guriguri uawe ukeebe meramawere uke ereka yabairo fanao ufekuro meramawere unao ufoisaya eno wei.

Yesu yabaisake umu wana naama uwaka wake

^47-48Yesuma eno weibibaie eme keuwere dawabairo aare faka. Diudiasi moi duero (12) iwoka ukeka mi dawako fariro nono i orou yaisina danu umuro aare faka. Fakaro Diudiasima Yesubairo farike Yesu yabaike oo uiro Yesuma dawabake eno wei, Diudiasi, i Ba Eme Sini Mibairo oo ukakuie i uraneka orou Dawa mufisane waure faraada ibake i ubu i ari eno ukakua wei? ⁴⁹Danu iwoka ukeka orouma i orounu imukeka iwoka uisake Yesubake eno weisa, i orouini urafeisia weisa? Iyanu ba bau yewadoya ea weisa. ⁵⁰Eno weisake moi iwoka ukeka mima ba bau munike i dai ofereni ode sibore sianeka minu waiya ukeka moi minu baena ome kaka umane kasiniro dooro isari. ⁵¹Eno uiro Yesuma eno daua weike i waiya ukeka minu ome dooro munike ma dabame odike ma wiroi.

⁵²Eno uike Yesuma i dai ofereni ode sibore sianeka orouini dai sosi uwara furisi kafudenini i Du dai orouini, Dawa mufisane faka oroubake eno wei, Nae waira ukeka mi mebairo anemebake ba bauini goreini waure faraisa wei? ⁵³Eno weike nono wei, i dai sosi uwararo yabairo ibeibisara i furo Na mune naama umu wana uwane dayakakema nono awoenae yanu odo farinuro ibake eno ukaisaya weike nono wei, awoenae seidaninu bunaroba ibake eno ukaisaya wei.

Fidama Yesunu ibi we ma fe yari wake

⁵⁴I orouma Yesunu wanaro mukake anisa. I dai ofereni ode sibore sianeka orounu uwararo waure ane oisa. Emuako anisaro Fida dawae yafawereroma eroke eroke emenu umuro ani. ⁵⁵I orouma goiro anisake i goi naisaro inaa mawaisake inaa udiro yaure ibisaro Fida dawaini inaa udiro fare yauri. ⁵⁶Inaa edororo yaure ibeebe waiya ukeka moi aruma unama Fida erike ereebe eno wei, yewa mi dawae Yesuini demuiro ibisia wei. ⁵⁷Eno weibaie Fidama wei, yewa aruma, nae i Mi Dawa iwoka meya wei. ⁵⁸Yaure ibeebe nono moi mima wei, yewa mi dawae Yesunu moi iwoka ukeka miya wei. Eno weiro Fidama nono wei, yewa mi na iwoka meya wei. ⁵⁹Yaure ibeebe nono moi mima nono wei, yewa mi dawae Gareri miba Yesuini demuiro ibeibisia wei. ⁶⁰Eno weiro Fidama wei, yewa mi na iwoka meya weike anu weaku wake na iwoka meya weibibaie kawama kokoroko idua yama wei. ^61-62Kokoroko yama weiro Yesuma owerike Fida eribaie Fidama Yesunu kawama kokoroko yama weifekuro ako Nanu ibi buuba we ma fe yaraada meo wefakua eno wei wake imuike aweawero anike ii wei.

Yesu we irukada ure yanake uisa wake

⁶³Yesu yabaisake mune anisa orouma Yesu uke iruke ma iruke ukaada usima uka. ⁶⁴Emuama Yesunu naisa wauma dadau uisake wanama uraada eno weisa, ainama A uiyainu weibisa? We foraaro naufe weibisa. ⁶⁵Eno weada moi meramawere wake keuwere weada Dawabake meramawere uke yaka.

Yesu i dai kanisoro orounu ibooro enare ibi wake

⁶⁶Wai uriro Du orounu dai kanisoro orouma midini uisa. I dai ofereni ode sibore sianeka orouini i darawadu we ma iwoka ukeibisa orouini dai orouini emua yaisina kanisoro midini ufisane uisake Yesu mune emenu ibooro ma enare oisa. ^67-68Ane fakake Yesubake eno weisa, Ae i ba Kerisobaie wearo naufe weisa. Eno weisaro Yesuma emuabake ma owerike eno wei, ie wemauroma Nanu wake naukeroma imuke giena dafoisake Nanu we nauke emiau wake moko da wefoisaya wei. ⁶⁹Eno weike nono wei, Awoenae i Ba Eme Sini Mima i bunama imusu ari Godinu baena wana enaro yaufekuro efoisaya eno wei. ^70-71Eno weiro emuama eno weisa, Ae Godinu Amaraya weaku weisa? Eno weisake nono weisa, Danu wenu wake naukisiba moi weforakeka wake da naufeisia eno weisa.

Yesu Faeradinu ibooro enare ibi wake

¹I kanisoro orou yaisina uyakake Yesu mukake Faeradibairo waure anisa. ²Waure ane fakake wayai eno weisa, yewa miye Du orou yaisina we irukakuneke dakesi oi Romani gaemani oroubairo da mayakawe weakuke Nae Kerisoya, yanu dai yawokeka Kini miya weakua eno wayai weisa. ³Eno weisaba Faeradima Yesubake eno wei, Ae i ba Du orounu dai yawokeka kini miba me wei? Eno weibaie Yesuma a ba weakua eno wei. ⁴Eno weiro Faeradima i dai ofereni ode sibore sianeka orouini i fare ku siane ibisa oroubake eno wei, i mibairo merama ufibai fou ure daunea wei. ⁵Eno weiba i orouma daiwere eno weisa, i Diudia orofa orouini Gareriroma ewa enaro ibeibisa i orou yaisina i Romani gaemani orouini urafisane eno meo we ma iwoka ukakunea eno meo weisa.

Yesu Erodinu ibooro enare ibi wake

⁶Eno meo weisaro Faeradima nauike eno wei, i mi dawae Gareri miba me wei? ⁷Eno weibaie euwa weisaba ibake Faeradi danu ararae i orouma Yesu Erodibairo waure anifisane wei. Erodima Gareri orofa yawokada i furo Derusaremu goiro ibeibiba Yesu dawabairo waure anifisane wei. Eno weiro danu wei enaenari waure anisa. ⁸Erodima Yesu efine ukeibiro dawabairo waure fakaro Yesu erike rooro ui. Erodima Yesunu buna ukeibi wake nauike danu ararae moi buna ukeka efine imui. ⁹Enoba Erodima Yesu moi buna ukeka ufiro efine keuwere we nauke ereibiroma Yesuma moko wake we daui. ¹⁰Erodima eno weibibaie i dai ofereni ode sibore sianeka orouini i darawadu we ma iwoka ukeibisa orouini emuama meo wayai daiwere weisa. ¹¹Eno weisaro Erodini danu ame orouini emuama Yesu meramawere uke yaraada uke iruisake irau wau baruke oisake Yesu ma owekake Faeradibairo nono waure anisa. ¹²Adinaroe Erodini Faeradini emuae moko moko emenu emenu wasai uke makaneibisikema nono i odoro awaawa uke makaki.

Yesu feafekua weisa wake

^13-14Faeradima weiro i dai ofereni ode sibore sianeka orouini i darawadu we ma iwoka ukeibisa orouini i orou yaisina dawabairo ane fakaro emuabake eno wei, yewa miye nabairo waure aare oisake Dawae i Du orou yaisinabairo merama ukakua weisaba ibake Dawabairo we nauke erenewaa uneke Dawabairo merama fou ure daunea eno wei. ¹⁵Enaenari Erodini dawae Dawabairo merama fou ure dakinuba Dawa nabairo ma owere odaisinua wei. Eno weike nono wei, Dawabairo merama meba Dawa da ma feamaua wei. ¹⁶Merama meba wemauro usima Dawa daiwere ufeisake odaifeisaro anifekua wei. ¹⁷(I Du orounu bisarae eno, moi oya fareibakuie ana ebaro ibaisa orou una demuinaku ma woromeibakunekaro aneibaisa.) ¹⁸Enoba Faeradima weibaie i orou yaisinama daiwere eno weisa, i mi dawa ma feake Barabasi naa ma woromiake iyabairo waure aare odia weisa. ¹⁹(Barabasi dawae Du orouini Romani gaemani orouini urafisane weike eme ma feariba ibake ana ebaro oisaro ibi.) ^20-21Faeradima Yesu medifiro anifine uike i orou yaisinabairo weibaie i orouma daiwere eno weisa, korosiro ikokama ure odia, korosiro ikokama ure odia eno mane weibisa. ²²Faeradima dei raara weike nono wei, dawae aneme merama ukinu wei? Dawabairo merama meba da ma feamauke wemauro usima ureebe odaifeisaro anifekua eno wei. ^23-24Faeradima eno weibaie Dawae korosiro ikokama ure odia eno daiwere weisaba ibake Faeradima Yesu feafekua wake idua wei. ²⁵Fearadima Yesu feafekua wake idua weike Barabasi i urane rarane uke eme ma feareka mi ana ebaroma ma worome odairo i orouma Yesu emenu arara aneme ufisane ufeisa ibake Faeradima Yesu emenu wanaro marie.

Yesu korosiro ikokoma ure dabame oisa wake

²⁶I orouma Yesu mune anisa. Waure aneibisabaie Sairina orofa moi mi Saimoni dawae waiyaroma aare fariro ekake eno weisa, ama Yesunu korosi waua weisa. Eno weisaro Yesunu korosi mune wauriro anisa. Anisaro i mi dawae Yesunu umuro ani. ^27-28Eme keuwere emenu umuro anisa. Awekabo moima sorara ukaada aneibisaro Yesuma ma owerike i awekabo erieke emuabake eno wei, ya Derusaremu goi awekabo, Nabake ii da weaweke yanu onarouini yanu amarakubake ii weawe wei. ^29-30Moi merama odo yabairo fafekuro emema wefeisa, i amara aruma me awekabo rooro ufeisaya eno wefeisake nono wefeisa, i dai oraaraini okoa oraaraini boaweke iya ode kariawero feafe wefeisaya eno wei. ³¹Nae i awoena au ibaaku ana ari eno ukeibakuneba yae i sibi uraku ana ari ibake merama daiwere uke yafiakaisaya Yesuma eno wei.

³²Moi merama uisike ana ebaro ibisi miyaini Dawaini demuiro ma feafiakane emua waure anirieka. ³³Emua waure aniriekake bokai kaibai mane weaisa orofaro faka. Fakake Dawae korosiro ikokoma ure dabame oisa. Nono moi ana ebaro ibi mi moi ena anaro ikokoma ure dabame oisake nono moi mi moi ena anaro ikokoma ure dabame oisake Yesu Dawa ubarero ikokoma moi anaro ure dabame oisa. ³⁴Eno uke odiriekaro Yesuma eno wei, Babae, emenu ukaisa ibai emua iwoka meba ibake eno ukaisaya emenu ba me ukeka mune imuke media wei. I orouma eno uke oisake Danu wau ainama mufeku ariya weisake kasi dodoo uisa. ³⁵I ku siane ibisa orouma enare ibaada ereibisabaie i Du orou emua yawokeibirieka orouma we irukada eno weibisa, Dawama eno i ari weia weibisa, Nae Godinu ma wiroke mune aneka Miya, Godinu Kerisoe Naya eno weibike moi orou ma wirokeibirie enaenari Anu onami ma wiroa eno weibisa. ^36-37I ame orouma Dawa uke irukada arawere ana kai idudabai Dawa ifine maisake eno weisa, Ae i ba Du orou emenu dai yawokeka Mibaie Anu onami ma wiroa weisa. ³⁸Moi wake eno owaowa uke oisa, yewae i Du oronu dai yawokeka kini mi eno owaowa uisake Danu iiri oko korosiro ure dabame oisaro ibi.

³⁹Moi ana ebaro ibeibi mi dawae moi ena korosiro ibaada Yesubake eno wei, Ae Godinu Kerisoba me? Anu onamini uwaini ma wiroa wei. ⁴⁰Eno weiro nono i moi ena korosiro ibi mima dawa we iifa ukaada wei, eno da wea wei. Ae Godibake ia iyarakuba me wei? ⁴¹Eno weike wei, aini naini uwae ba meramawere uisuba ibake aido fearaisua wei. Nono yewa miye moi meramawere uke dauia wei. ⁴²Eno weike nono wei, Dai Waria Mi, Anu yawokeifaku odo fafekuie na imukenewaa ufario wei. ⁴³I mima eno weiro Yesuma dawabake moko eno wei, awoenae aini Naini demuiro i irauaiai Faradaisi weaisa oroforo ane ibifukua Yesuma eno wei.

Yesunu fearekabake wei wake

^44-45Eweka amuke aare okoro farike edoro dauike dumu sine ibiro eweka ma owerike ane abanaro fariro idua nono edoro ui. I dai sosi uwara ubarenaro ooru raarayai enare kuure oisa ena dai burudu wau abanaroma gagane isare aare ubiro fari. ⁴⁶I yaisina eno uiro Yesuma daiwereroma eno wei, Babae, Nanu imumu Anu wana duboro odakunea weadae idua feari. ⁴⁷Eno uiro ame kafudeni mima erike Godinu ibi we ma daiwere uike eno wei, yewa mibairo merama meya wei, Dawae irauaiai miya eno wei. ⁴⁸Ibai efisane fare ku siane ibisa orouma ibai ekake Yesu feariba ibake imuka merama daiwere ukaada emenu goi goiro fiake anisa. ⁴⁹I Gareriroma faka awekaboini Yesunu naiyemukuini emuae ekararowere bi mame ibaada iroma ibai ereibisa.

Yesu ooru uke oisa wake

^50-51Moi Arimadia goi mi Diosefu dawae moi kanisoro mi, dawae Godinu wake naukeibi. Dawae irauaiai mi. Dawae Godinu yawokaku odo yawokeibi. Adinaro i moi kanisoro orouma Yesu ma feafisane weisaro nono dawae arara me Yesu ma feareka. ^52-53Enoba i mima Faeradibairo anike Yesunu ofe mufine eenu weike Yesunu ofe korosiroma munike inanakeo wauma oba ui. Oba uke me sinike awoena oma eraboro ane odi. Iro moi feareibisa orou ode dakeibirieka, dawama Yesu i oma eraboro ane odi. ⁵⁴Iro waure ane odiro i sabadi odobake uke bou ukeka odo idua me sifine uiro i sabadi odo idua fafine ui. ⁵⁵I Gareriroma Yesunu umuro aaka awekaboma Diosefunu umuro anisake i Yesunu ofe ane odi orofa eka. ⁵⁶Ane ekabaie Yesunu ofe idua oisaro ibiro eka. Ekake owekake emenu uwararo anisa. Owere ane fakake Danu ooru ukeka irauaiai urumuma imusu ari fauduini aduaini mune bou uisa. Eno ukeibisabaie sabadi odo fariba ie Godinu darawadu odoba meisake ko yaka.

Yesu fearike iroma uyari wake

¹Sabadi odo me siniro wai awanakuro i awekaboma uke bou uisa eraerabusa mukake i ooru ukeka orofaro waure anisa. ²Ane fakake ekabaie i aisame dadau uke oisa oma ubere aine ibiro eka. ³I dadau uke oisa oma ubere aine ibiba ibake i oma eraboro isakake ekabaie Yesunu ofe iro me! ⁴I awekaboma Danu ofe aboro waure anisa ariya weisake idua enare ibaada imukeibisabaie moi inanakeo wau ruki miyai emua udiro enare ibisi. ⁵Idua enare ibisiba ibake i awekaboma ia siriero ifoma kodudu yanake ibisaro I miyaima eno weisi, i feare mero me ibeka orou anemebake i fearaisaro aare odakuneka orofaro yodia ukaisa weisi? ^6-7Eno weisike Dawae ewado ibe meya weisi. Dawae uyarike me ibinua weisi. Ya yaisina Gareriro ibisa furo Dawama yabairo eno weia weisi, i Ba Eme Sini Mie i meramawere orounu wanaro mame odifeisaro Dawa ma feafeisaro odo buuba me sifekuro nono uyafekua eno weia weisike nono weisi, ya ibai imukaisaba me weisi? ^8-9Eno weisiro Danu wei wake i awekaboma imuisake i eme ara meisake owere anisa. Anisake i iwoka ukeka orou irewenini (11) moi orouini emua yaisinabairo ibai yaisina weisa. ^10-11I awekabonu ibi ibiye Meri Megidarini Doanaini Deimisinu amae Merini moi awekaboini emuama i afasoro oroubairo i wake weisaro nauisakema emuabairo i wakeye baya we imuke dauisa. ¹²Nono Fida dawae danu mane i orofa ubi ure efine ibake i ooru uke oisa orofa efine durame ani. Ane farike eu afua umane i oma erabo eribaie i ane oisa orofaro Dawa oba uisa wau mane ibiro erike owerike ibai yaisina imukaro imukada sabu owerike uwararo ani.

Yesu Danu iwoka ukeka miyaini Emeiasi goiro aneibisa daaboro aneibisi wake

¹³I dai fura odoro Godinu wake naukeibisi miyaima Derusaremu goiroma Emeiasi goiro isare aneibisi. ¹⁴I daabaro isare anaada Yesu me sini wake we makane isare aneibisi. ¹⁵Eno we makane isare aneibisiro Yesuma emua fare fou uriero emuaini demuiro isare anisa. ¹⁶Eno uke demuiro anaadama nono Godima i miyai Yesu iwoka ukekabai dadau uiro ibake Yesu ma nuna uisi. ^17-18Yesuma emuabairo eno wei, aneme wake weada anaisi wei? Eno weiro i miyaima imuka merama daiwere uisike moi mi iboo imusu nauwaro odiro nono moi mi danu ibiye Kiriofasi, dawama Yesubake eno wei, i Derusaremu goi orou yaisina i yaina odo uisa ibai emua yaisina iwoka sinaisaro nono ade aneaneme ibai a iwoka me wei? ¹⁹Eno weiro Yesuma emuabake ma owerike eno wei, aneme uisabaie wei? Eno weiro emuama eno weisi, Yesu Nasaredi goi mibake weaisua weisi. Dawae Godinu bunawere we bou ui miya weisi. Danu buna ukeka keuwere ukeibiro Godinu emeini Dawae irauaiai Sisa miya eno we imukeibisaya eno weisi. ²⁰Iyanu dai ofereni ode sibore sianeka orouini i Du orounu yawokeka orouini emuama Dawa feafine weisake Romani gaemani orounu wanaro mame odiriekaro emuama korosiro ikokama ure dabame oisa. ²¹Eno uisaro iyama we imuisi, Dawae Isaraera orounu ma wirokeka miya eno we imuisi. Nono Dawa feariro odo buuba me sininua eno weisi. ^22-23Iyanu moi Godinu wake naukaisa awekaboma eweira wai awaro i eme araro anisake iroma owere farisake eno weisa, Danu ofe iro ibe meya weisa. Nono kubekuberoma erisibaie aneru unu raarayaima iyabairo eno weisi, Dawae uyarinuke me ibinua weisia i awekaboma iyabairo eno weisa. ²⁴I awekaboma eno weisaba ibake moi orou emuae i orofa efisane durame anisake erisabaie i awekabonu erisake weisa enaenari mane erisaya eno weisi.

²⁵I miyaima eno weibisiro Yesuma emuabake eno wei, ya awara me miyai! Godinu we bou ukeibirie orouma Godinu bukaro wake keuwere owaowa yanake odeibisade anemebake ibai erenewaa dauisi wei? ^26-27Godinu we bou urie orouma eno weisa, Godinu Kerisoma imuka oferi waufekuke feafekuke nono iroma uyafekuke Danu irauaiai arakekawere orofaro amuke anifekua weisaya eno wei, Yesuma eno weike nono wei, Mosesini Godinu we bou urieka orouini emenu bukaro ibinu wake Dawabake wake emuabairo weada i wakenu ubi wenewaa ukaada eno ui. ^28-29Yesuma eno we aneibiro aneebe goiro fafisane uisa. Goiro fafisane ukaada Yesuma emua ma berefiane uibaie Dawa we kuurada eno weisi, dumu sinao ufekuba uwaini demuiro ibifeisia weisi. Eno weisiro Yesuini emuaini emenu uwararo anisa. ³⁰Uwararo ane fakake uruna ifisane yaukaro Yesuma Godibairo guriguri uike uruna munike ma birabira yarike naka naka ui. ³¹Eno uiro i miyai emenu naisa idua foranao uiro ekike Dawa idua iwoka siki. ³²Iwoka sikiro Dawa emuabairoma me ari ui. Eno uiro i miyai emenu emenu eno we makanada weisi, daabaro aaradae Godinu bukaro wake wenuro naukisuke uwanu imuka irauaiai ukinua eno weisi. ^33-34Enoroma nono i miyaima emenu uwara meisike iroma Derusaremu goiro amuke anisi. Derusaremu goiro ane fakiro i iwoka ukeka orou ireweni (11) Yesunu umuro eneiareibisa orouini emuama i miyaibairo ma owekake eno weisa, iyanu Dai Waria Miye uyarinua weisa. Dawae uyarinuke Fidabairo farinua eno weisa. ³⁵Emuama eno weisaro i miyaima daabaro fou uki wake wake weisike Yesuma uruna ma birabira yarinuro erisuke Dawa iwoka sinisua eno weisi.

Yesuma Danu iwoka ukeka oroubairo Danu iboo naisa fare ma iwoka urie wake

³⁶I miyaima eno weibisibaie Yesu Danu mane me ari uke emuabairo farike enare ibaada arie wake wei. ³⁷Eno uiro i orouma yewae imumu erisia weisake ia daiwere sika. ³⁸Eno uisaro Yesuma emuabake eno wei, anemebake ia sinaada Na ma nuna ukakuneka wei? ³⁹Nanu umuini wanaini eawe. Ie ba Naya wei. Yanu wanama Na ure burise eaweke iwoka siawe wei. Imumu emuae damaini kaini me. Nono nae damaini kai boboya eawe wei. ⁴⁰Eno weike Danu umu wanaro uka ena iwidi awidi emua efisane ma iwoka urie. ⁴¹Yesuma eno uiro i orouma rooro daiwere ukaada ma nuna uisake ibai imuisaroma nono Yesuma emuabairo nono wei, yabairo uruna ibinuba me wei? ^42-43Eno weiro Dawabake aisa yaka aduaro abu maisaro munike emenu ibooro iseibiro eka.

⁴⁴Yesuma emuabake eno wei, imuke eawe! Adinaroe yabairo ibaada Mosesini i we bou urieka orouini emenu Samusi bukaro Nabake weibisa wake enaenari ufekua weibisara. ^45-46Ie enaenari idua ukinua weike Godinu bukaro wake we ma boroo yaraada eno wei, adinami nauwaro emema eno owaowa uke oisa, Godinu Kerisoma imuka oferi waufekuke feafekuro odo buuba me sifekuro nono uyafekua eno weisa. ⁴⁷Godinu wirokeka wake i orofa akaka orou yaisinabairo we eneifeisa. We eneifeisaro ainama danu merama ukeka imuke medifekuie Godima danu ba me ukeka mufekuke imuke medifekua eno wei. I wake Derusaremu goiroma aboro aboro yaisina iro we eneifeisaya eno owaowa yanake oisaya wei. ⁴⁸Emenu owaowa yanake oisa enaenari ukinuro yae ibai eraisaya eno wei. ⁴⁹Godinu we bou ui enaenari Danu Imumu Irau yabairo we odaimauro isare aafekua eno wei. Yewa goiro ibiawero Dawa isare aafike Godinu buna yabairo makenewaa ufia Yesuma eno wei.

Godima Yesu urero waure amuke ani wake

^50-51Yesuma emuabairo eno weike Derusaremu goiroma Bedeni goiro aniro Danu iwoka ukeka orouini imusu orouini eno Danu umuro anisa. Dubuenaro Yesuma Danu wana ei mamaada i orou yaisina we ma irauaiai uriero Godima Dawa urero waure amuke ani. ⁵²I orouma owekake daabaro aarada rooro daiwere ukeuke Derusaremu goiro anisa. ⁵³Ane fakake aine wai ure i dai sosi uwara ubarenaro aneibisake Godinu ibi we ma daiwere ukeibisa.