1 Dimodi

DIMODIBAIRO BOKAI OWAOWA

¹Na Forue Yesu Kerisonu afasoro mi ibake nama yewa owaowa yanake odakune. Iyanu ma wirokeka Godi Danu Amara Yesu Keriso Dawama i ma wirokeka waiya uke me sifekua iyama eno we imukaisi. Godini Yesu Kerisoini emuama na afasoro mi we mune odiakiba ibake yewa wake abairo weakune.

²Dimodi, ama yewa owaowa kakure ea. Adinaro nanu we wake nauiba ibake ae Yesu Kerisonu wake naukeka mi siniro ibake ae nanu amara ubi ari sini. Iyanu Babae Godini iyanu Dai Waria Mi Yesu Kerisoini emuama a irauaiai unu kofisike imukari ufisike emenu irauaiai wirokeka abairo mafisiro me irauaiai ibifane ibake weakune.

Iyanu meomao weeka wake medifene wei wake

^3-4Na adinaro Masadonia orofaro animane ukaada ae Efesa goiro ibia weke nono awoena abake enaenari weakune. Efesa goiro ibaada i imusu we ma iwoka ukeka, ie Godinu we ma iwoka ukeka meya i oroubairo medifisa eno ane wearo naufisa. I orouma emenu akaemukunu ibi ibiro weada dadaa wake aine wai ure weibaisaya emuabake ibai medifisa eno ane wea. I orouma eno weaisa ibake moi orouma Godinu ba imukeka imuke dakaisake me sara imuka imukaisa ibake emenu imuka yaisina Godibairo ode dakaisa.

⁵I Efesa goiro Godinu wake naukenewaa ukaisa orouma imukari ufisake imukama irauaiai ufisake Godi imukenewaa ufisane ibake yewa wake weakune. ⁶I moi sisa orouma nanu wake ma nuna ukaisake urane rarane ukaisake me sara wake weaisa. ⁷I moi sisa orouma Mosesinu darawadu we ma iwoka ufiakane ukaada nono i darawadunu ubi ma nuna ukaisa. ⁸I darawadubake Godima wei wake enaenari we ma iwoka ukaada enaenari ufeisaie i darawadue irauaiai. ^9-11Nono Godima iya ma wiro’iba ibake i darawadue iyanu darawadu me, ie i meramawere ukaisa orounu darawadu. I meramawere ukaisa orou emuae i ari eno ukaisa. Moi orouma moi darawadu medaisa, moi orouma dai orounu wake nauke dakaisa, moi orouma Godi imuke dakaisa, moi orouma ba me merama ukaisa, moi orouma Godinu wake nauke dakaisa, moi orouma wake merama weaisa, moi orouma emeini awekaini ma fearakuneka, moi orouma moi minu aruma aweka enare odaisa, moi orouma Sodomu goi orounu merama ukeka enaenari eme unayaima aiyaka ari ukaisa, moi orouma eme mame munaada emenu orouma oi mafiakane meo weaisa, moi orouma meo wayai wake weaisa, i orouma eno ukaisaba ibake Godima Danu darawadu i oroubairo marie. Nono nama iyanu arakekawere Godinu irau wake i mane weakune. Nono moi orouma i we ma iwoka ukeka wake abanaro ma merama ukaisake imusu imusu meramawere ukaisa. Ibake Godima i darawadu Mosesibairo mai ibake naini iini Godinu irau wake emuabairo weakune.

Godima Forubake imukari uiro Foruma Godibake we ma irauaiai ui wake

¹²Iyanu Dai Waria Mi Yesu Kerisoma nae Danu wake wemane we mune odikarake Dawa da medimane na unu korakunaraba ibake Dawa we ma irauaiai ukakune. ¹³Adinaroe nama Dawabairo meramawere ukeibisara. Danu ibi we ma merama ukaada Danu wake naukeibisa orou ma merama ukaada Dawabairo wake meramawere weibisara. I furoe nanu awara irau me. Ibake nae irauke iwoka me enoba Godima na fanisi make dakarakema nono nanu ba me merama ukeka imuke medi. ¹⁴Iyanu Dai Waria Miye irauaiai. Nae Danu ofero dakaa uke ibine ibake Dawama na imukari ukaada we ma iwoka ukakunara ibake nanu imuka yaisina Dawabairo odeke Danu imukari ukeka ari nama enaenari emebairo imukari ukeibakuniaya weakune.

¹⁵Yesu Kerisoma i merama ukaisa orounu imuka ma wirofiane ibake yewa dooro fari. Ie meo mero ie ba. Eme yaisina i wake naufisane ibake weakune. Dawae na i dawako ba me merama ukeka mi, na ma wirokara. ¹⁶Godima nabake imukari uiba ibake Yesu Kerisoma na i dawako meramawere ukeka mi, na ma wirokarake emema Danu owainanaku ukeibi ibai ukeka efisake Dawabairo wirofisake me ibene ibene ibifisane ibake eno ui. ¹⁷Iyanu Godi Dawae i erawa naukawa i yaisina iwoka sinaku. Dawae iyanu me ibene ibene ibeka Godi. Iyae Dawa ere dakaisi. Dawae da feafeku. Godi demui Dawa manero nono Godi moi ibe me. Ibake Danu ibi we ma daiwere ufeke Dawabake aine wai ure we ma irauaiai ukeifene ibake weakune.

Dimodi buna uake i wasai ukaisa orou ma bereyana wei wake

¹⁸Nanu amara Dimodi, nanu buna wake wemaro a naua. Godinu we bou urie orouma abake adinaro we bou uyakaya emenu weisa wake enaenari uake uraneka orou ari siake iyanu Dai Waria Minu waiya bunake ua. ¹⁹Yesu imukenewaa uake irauaiai uaro anu imuka irauaiai simi. Moi orouma emenu imukanu imuka imuke dakaisake emenu ararae meramawere ukeka ibake meramawere ukeibaisa. Emua eno ukeibaisaba dawara ufe daiwerema boudi ma merama ukaku enaenari i orouma emenu Godi imukeka ma merama ukeibaisa. ²⁰Moi miyaima eno uisi. Emenu ibiye Aimeniasini Arekisanaini, i miyaima Godibairo wake merama da wefisike iwoka sifisine ibake nama emua we mune seidaninu buna wanaro mame odia.

Guriguri ukekabake wei wake

¹Anu bokai waiya wakeye eno, Godibairo yewa orofa akaka oroubake guriguri ukaada we ma irauaiai uyana. ²I gaemani orou yawokeka dai orouini iyanu dai oroubake Godibairo guriguri uaro Godima emua unu kofiaro iya yaisina me irauaiai ibaada urane rarane da ufeke me ibaada Godi imukenewaa ufeke irauaiai ibife. ^3-4Iya yaisina eno ufeisiie irauaiaiba ibake iya ma wirokakuni Godi Dawae rooro ukaku. Godi Danu ararae eme yaisina wirokeka. Godi Danu ararae emua yaisina Danu wake naukeka. ⁵Godi moi mero Dawa demui mane. Godini emenu abanaro enare wake yoya ukeka Mini Emuae una demui. I Mi Dawae Yesu Keriso. ⁶Dawama eme yaisina ma wirofiake Godibairo odifiane ibake yewa dooro ibinisa orounu orofa munike Dawama korosiro feari. Godima i ma wirokeka odo idua farinua wei ibake iya yaisina ibai eno iwoka sinaisi, Yesuma Godinu arara uike eme yaisinabake korosiro idua feari.

⁷Godima ibake nae Danu wake weekaini afasoro mi we mune odikara. Nae meo we me, ba farafa weakune. I imusu orouma Godinu ba wake imufisake Dawabairo wirofisane ibake nae emenu sisa mi we mune odikara.

⁸Emema guriguri ufisane fare ku ukaisaie nanu arara emua yaisina urane rarane mero dino mero irauaiai mane ukaada wana ei mamaada Godibairo guriguri ukeifisane ibake yewa wake abairo weakune.

I awekabonu wake

^9-10Nanu ararae i Godinu wake naukaisa awekaboe irauaiai ibifisane ibake weakune. Emenu irau waubake fukeru da ufisake weree imusu imusu erawa naukawa emenu bokairo weree da ufisake emenu bokai inisa ubu imusu imusu ufisaro arake ibifine eno mane da imukeifisane ibake weakune. Nono nanu ararae i awekaboma Godinu wake naukenewaa ufeisake i dawa irauaiai ufeisaie emenu weree ari eno. ¹¹Emuama guriguri ukaadae wake keuwere da wefisake Godinu wake mane naukenewaa ufisake iwoka sifisane ibake weakune. ¹²Na arara me awekaboma eme we ma iwoka ukeka eno uke dakaisaba i ari eno da ufisa. Yanu sosi uwararo awekaboma Godinu wake da wefisane weakune. ¹³Anemebake eno weakune imukaisa? I danu ubiye Godima i mi Adamu dawako ubu uike nono danu aweka Iwi dubuenaro ubu uiba ibake weakune. ¹⁴Seidanima Adamu we iruke dauike dawae Iwi we iruiro nauike meramawere ui ibake awekaboma emeaka da we ma iwoka ufiakane ibake weakune.

¹⁵Awekabonu waiyae amara doraada oferi mamaneka. Eno ufisake Godi imufisake wake daiwere da wefisake irauaiai ibifisake emebake imukari ufiakaro Godima emua ma wirofiane ibake weakune.

Godinu sosi yawokeka orounu wake

¹Nanu moi wakeye eno, yewa wakeye meo me ba. Ainama Godinu sosi yawokeka dai mi sifine imufekuie danu imukekae irauaiai. ^2-3I sosi uwara yawokeka dai mi dawae irauaiai gienabu ibifeku ibake nono eme moima dawae merama miya eno da wefeisa. Danu ibekae i ari eno uke ibifi. Danu awekae una demui mane mufi. Dawae anemerabu ufine ukaadae owainanaku ufi. Dawae irauaiai imuka imukeka mi. Dawae irauaiai wake mane weeka mi. Dawae imusu orou we waure aare danu uwararo uruna makeibaku mi. Dawae irauaiai we ma iwoka ukeka mi. Dawae ara adua iseroma beforo gogore ukeka me mi. Dawae urane rarane da ufekuke me irauaiai ibifeku mi. Dawae oi muneka imuka mane da imufeku mi. ⁴Dawae danu koa irauaiai yawokada danu amaraku irauaiai yawokeifiakuro danu amaraku danu wake da nauke medifeisake danu wefeku enaenari ufeisa mi. ⁵Nono dawa danu koa yawokenewaa uke dafeku ide aneme aneme Godinu sosi uwara yawokenewaa ufeku? ⁶Dawae Godinu wake kawama naukeibeka mi me. Kawama naukeifeku mima naufekuke nono Godinu sosi uwara yawokada fukeru ufekuro seidanima uke irufekuro meramawere ufekuie Godima seidani fanisi mai enaenari i mi fanisi mafeku. ⁷I mi danu ibekae i ari eno uke ibifiro Godinu wake nauke dakaisa orouma dawae irau miya wefisaro seidanima dawa da ma fukeru ufiro dawa da birufi. Abairo nanu sosi uwara yawokeka wake idua me sininu.

Sosi uwararo waiya ukeka orounu wake

⁸Dikoni sineka wakeye eno, i dikoni orouini nono i sosi uwara yawokeka dai orouini emenu ukeka sinekae demui irauaiai mane ufisa. Dikoni orou emenu ukeka sinekae irauaiai mane eno ufisa, ara adua daiwere da ifisa. Emenu ararae oi mane munekabake da imufisa. ⁹Godima emuabairo Danu imukeka we ma boroo yarakuba emenu nega negabu imukama imukada Yesu Keriso imukenewaa ufisa. ¹⁰Emenu arara dikoni waiya ufisane wefeisaie sosiro moi waiya mafiakaro emuama i waiya irauaiai ufisaro eme moima efiakake emenu waiyae irauaiaiya wefeisaie Godinu wake naukaisa orouma emua idua dikoni orou we mune odifiakaisa.

¹¹I dikoni orou emenu awekaboe irauaiai ibifisa. Emuae ara adua daiwere da ifisake eme moibairo wake merama da wefisake emebairo irauaiai mane ufisa. ¹²I dikoni orou emenu awekaboe una deidemu mane mufisa. Emuama emenu amaraku we iifa ufiakaro emenu wake da nauke medifisake irauaiai mane ufisa. ¹³I dikoni orouma irauaiai ufeisaie Godinu wake naukeifeisa orouma emuae irau dai oroua wefeisaro i dikoni orouma Yesu Keriso imukenewaa ufeisake Danu waiya ukenewaa ufeisa. Abairo nanu dikoni sineka wake idua me sininu.

Godinu wake ubi urekabai ara daiwere

¹⁴Nanu ararae yabairo sabu famane ibake weakune. Nae yabairo sabu famauba sabu da famau ari na iwoka meba yewa wake yaisina kakufakuie enaenari mane ua. ¹⁵Yewa wake kakufakuie iyanu me ibinu Godinu sosi uwararo waiya ukeka orou aneaneme orouma we mune odifiaku ibai ae iwoka sinaku. I me ibinu Godinu sosi uwararo waiya ukeka orouma Danu ba wake yawokenewaa ufisaro moi orouma i wake ma merama da ufisa.

¹⁶Yesu Keriso imukekanu ubiye daiwere. Ibake iyama eno weibaisi, Dawae ba eme siniro Danu Imumu Irauma Danu irau ukeka sineka ma boroo yari. Aneruma Dawa ereibaisaro emema Danu wake i orofa akaka goi goi yaisinaro weibaisaro naukeibaisa. I orofa akakaro moi orouma emenu imuka yaisina Dawabairo oisaro Godima Yesu munike Danu arakekawere orofaro waure amuke ane odia eno weibaisi.

Meo we ma iwoka ukeka orounu wake

¹Godinu Imumu Irauma eno weaku, eme keuwere i dubuena kai odoro Godi medifeisake seidaninu sisa orounu we ma iwoka ukeka imufeisake emenu daabaro anifeisaya eno weaku. ²Seidaninu sisa orouma meomao weada eno wefeisa, seidanima emenu irau imukeka imuka ma merama uike inaama yanao uiba ibake ba wake mero meo wake mane wefeisa.

³I orounu meo wefeisa wakeye i ari eno, adara una a aweka da mua, aruma una a eme da mua. Uruna moi da iawe, eno wefeisa. ⁴Godima emebairo uruna yaisina marieba emema Godibairo emenu urunabake we ma irauaiai ufeisaie i yaisina ifeisa. ⁵Godima i uruna yaisina we ma irauaiai ukakuba ibake iyama Godibairo iyanu urunabake we ma irauaiai ufeisiie i uruna yaisina irauaiai mane sifeku.

Dimodi Godinu waiya irauaiai ua wei wake

⁶Dimodi, a yewa nanu riba wake Godinu wake naukaisa oroubairo wefakuie a dawa Yesu Kerisonu irau wake weeka mi sifakuro Godinu ba wakeini Danu we ma iwoka ukekaini uruna ari ifakuba ibake buna ukaada irauaiai ufaku. ⁷I adina ubi mero sara dadaa ie Godinu dadaa meya da imuake Godinu wake imukenewaa uake anu Godi imukeka imuka ma ara ua. ⁸Moi mima danu ubu ofe ma buna ufine ibake aneme ubu uke kowokowo irauaiai ukakuie yewa doonu irauaiai ukeka. Enoba nanu ararae ama anu imuka yaisina Godibairo odifake buna ufake Godinu ukeka sineka enaenari ukenewaa ufane ibake weakune. Eno ufakuie yewa dooini urenu irauaiai ukeka ufaku. ^9-10Yewa wakeye irauaiai riba wakeya naukenewaa ua. Iyanu i me ibinu Godi Dawae eme yaisina emenu ma wirokeka Mi. Aina ainama emenu imuka yaisina Dawabairo odaisaie emua idua Dawama ma wirokakune. Enoba iyae Dawa imukenewaa ukaada emema iya emisane ibake iyama Danu waiya ukenewaa ukaisi.

¹¹Iduaya, eme yaisinabairo yewa wake weada eno we ma iwoka uyana. ¹²Emema ae adara miya wefeisake meramawere wefeisaie irauaiai me ibake yewa ari eno ufane ibake weakune, irau wake mane weake irauaiai ibiake imukari uake Godi imukenewaa uake moi minu aruma aweka enare odeka imuka da imua. Eno ufakuie a dawa irauaiai miya eno we imufeisa. ¹³Eme yaisinabairo Godinu wake kakureibiake i wakenu ubi weibiake i orou we ma iwoka ukeibiyanaroma nae ai abairo fama.

¹⁴Dimodi, Godinu we bou urie orouma abake we bou uisaro enaenari Godinu Imumu Irauma abairo buna maiyairo i sosi uwara yawokeibisa orouma emenu wana anu iiriro oisaya i waiya ukenewaa ua. ¹⁵I waiya ukenewaa ukeibiaro emema anu irau ukeifaku ibai ereifisa. ¹⁶Anu ukeka sinekaini we ma iwoka ukekaini irauaiai ukenewaa ufao! A irauaiai ukeifakuie Godima aini anu wake naukeifeisa orouini ya yaisina unu koreifiakuro yanu ibekae me irauaiai ibeifoisa.

Irau ukekama emenu imuka ma gienabu ufiaku wake

¹Nanu eme we iifa ukeka wakeye eno, ae awoena mi ibake i dai oroubairo we iifa ukeka wake weadae dino uke ibaada da weake anu babaebairo irauaiai weaku wake enaenari emuabairo wea. I awoena orou yaisina anu kaka nabuebairo ukeibaku i ari eno i oroubairo enaenari ua. ²Anu amaebairo ukeibaku i ari eno i awekabo yaisinabairo enaenari ua. I aruaruma yaisina anu isare kowede aruaruma ari eno uake emua iboo odeka imuka da imua.

Wabu awekabobake weaku wake

³Moi awekanu eme feafekuro dawa yawokeka eme me enoya i moi wabu awekabo ama yawoyana. ⁴Moi wabu aweka danu amarakuini akaemuku boboro danu amarakuma emenu Godibairo waiya ufisake emenu amaema emuabake budu ui enoba dawa yawokenewaa ufeisaie Godima i ari enoe irauaiaiya we imufeku. ⁵I amara aruma me wabu awekaboma Godi imukenewaa ufeisake guriguri ukeifeisaie Godinu wake naukaisa orouma emua yawofiakane weakune. ⁶Nono i wabu awekaboma emenu arara mane ufeisaie emuae feareka orou ariba ibake Godinu wake naukeka orouma emua da yawofiakane weakune. ⁷I wake enaenari bunawere wefaro i wabu awekaboma enaenari ufisaro emema ibai efiakake moi orouma emuabairo meramawere wake da wefisane ibake weakune. ⁸Ainama danu akaemuku demui orou da yawofiakuie dawa ba me. Nono ainama danu koawere da yawofiakuie dawa i Godinu wake nauke me orou emua ari mero nono dawae ba dai meramawere ufeku.

^9-10Moi wabu awekama i sosi uwararo i moi wabu awekaboma ukaisa waiya enaenari ufine wefekuie eno imuke ea. Dawa oya sikisidi (60) munike nono dawae demui eme una mane muni. Danu amaraku irauaiai yawokeibirieke imusu eme fareibisaro we kuureibirieke uruna makeibirieke Godinu wake naukeka orounu umu urokeibirieke arama ukeibisa orou unu koreibirieke aneme aneme i yaisina irauaiai mane ukeibike i sosi uwararo wabu awekabonu ibi ibinisa orofa danu ibi iro owaowa uke odia.

¹¹Nono i ewai ure me awoena wabu awekabonu ibi i orofaro owaowa da uke odia. I ewai ure me awoena wabu awekaboma moi awoena emeaka mufisane ukaadae Yesu Keriso koko akaisa. ¹²Emuama eno ufeisaie emenu Godibairo we bou ukeka abanaro enare kuufeisaro Godima emua fanisi mafiaku. ¹³I ewai ure me awoena wabu awekaboma ofe koroko ufeisake moi orounu ukeka sineka ere kobo umane ane weneibaisa orounu uwara uwararo anifeisake wake keuwere me sara wefeisake moi orounu ukeka sineka imufeisa. ¹⁴Ibake nanu imukekae eno imukakune, i ewai ure me awoena wabu awekaboma eme mufisake amara aruma dore maifisake emenu uwara yawokenewaa ufisaro seidanima ya Godinu wake naukaisa oroubake meramawere da wefine weakune. ¹⁵Nono moi ewai ure me awoena wabu awekaboma owerada seidaninu umuro anaisaba ibake weakune. ¹⁶Godinu wake naukaisa oroubairo ainama iwa demui wabu aweka boboie dawama yawofiro Godinu wake naukeka orouma i wabu aweka da yawofisake i moi orouma yawoke dakakuneka wabu awekabo yawofiakane ibake yewa wake weakune.

Dai bisara oroubake weaku wake

¹⁷I sosi uwara yawokeka dai orou emuama Godinu wake weadae we ma iwoka ukenewaa ukeibaisaya ya Godinu wake naukaisa orouma emua we iifa uyakaweke emenu moko makeka daiwere mayakawe. ¹⁸Godinu bukaroma eno weaku, boromakauma uidi kaibai duboro amuke adiadi yafiro uidi kaibai buruburu yare isafeisaie boromakaunu bebeku dadau da uaro dawa uidi kai ifine ufekuie ifi eno weaku. Eno weakuke nono eno weaku, moi waiya ukeka mima yanu waiya ukakua danu moko maewero mufi eno weaku. ¹⁹Ainama i sosi uwara yawokeka dai mi wayai wefine ufekuie danu wake da naua. Ibake efeisa orou una raara o una buuba emuama dawako mi wefeku enaenari mane wefeisaie idua ba wefeisaya emenu wefeisa wake naukenewa ua. ²⁰Abo dai yawokeka mima ba me merama ukeifekuie Godinu wake naukeifeisa oroubairo waure ane odiaweke kodo uawero eme moima ibai efisake ia iyarada i ba me merama ukeka da ufisa.

²¹Godini Yesu Kerisoini Godinu irau aneruini emenu ibooro enare ibaada wake bunawere wemaro a naua. Yewa wake yaisina moi oroubairo gienabu wea. Yewa miye nanu naiyero nono yeka miye nanu kakari enoba yewa wake emuabairo da wemau eno da we imuake yewa wake eme yaisinabairo bunawere wefaro naufisane ibake weakune. ²²Moi mi sosi yawokeka dai mi mune odifane ukaadae anu wanama danu iiriro me sara da odiake danu ukeka sineka erenewaa ua. I minu ba me ukeka aini demuiro ufuaisiie erenewaa ua. ²³Adua mane da ia. Anu boana arama ukakuyainua waini adua dai menukuini iseibia

²⁴Moi orouma ba me merama aruro ukaisaro moi orouma ibai eraada Godima fanisi mafiakubai emua idua iwoka sinaisa. Moi orouma feroma ba me meramawere ukaisaro moi orouma awoena ibai ere dakaisaro nono Godima emenu ba me meramawere ukeka eraku enoba dubuenaro emua fanisi mafiakuro ibai efeisa. ²⁵Enaenari moi orounu irau ukeka eraisake nono moi orounu irau ukeka ere dakaisaroma nono Godima i irauaiai ukeka ibai dubuenaro ma boroo yafekuro efeisa.

Moi orounu waiya ukeka oroubake wei wake

¹I Godinu wake naukada waiya ukeka orouma emenu eme ereka orou we iifa ufiakake emenu ibi we ma daiwere ufiakaro emema Godinu ibi ma ino da ufisake yanu we ma iwoka ukekabake wake merama da wefisane ibake weakune. ²Moi waiya ukeka orounu eme ereka oroue Godinu wake naukaisa orou idua. Emuaini Godinu wake naukaisa orouba emenu eme ereka orounu wake da nauke medifisake we iifa ufisane ibake weakune. I eme ereka oroue Godinu wake naukaisa orouba Godima emua imukari ukakuneba ibake i waiya ukeka orouma waiya ukenewaa ufisane weakune. Yewa wake i oroubairo wenewaa ufaro naufisane ibake weakune.

Eraerabusa keuwere munekabake wei wake

^3-4Ainama Yesu Kerisonu irau imukeka ie Godinu imukeka i ari eno da we ma iwoka ufekuke nono imusu orounu imukeka we ma iwoka ufekuie dawa fukeru bobo mike danu awarae buna me. Danu ararae bebekuma wake we makaneka. Moi orouini wake keuwere we makafisane ukaada emenu wake ma berefine ukakuba ibake urane rarane ufeisake meomao wayai wake wefeisake nono emebake meramawere imufeisa. ⁵I bebekuma wake we makaneka orou emenu ba me ukekama emenu imukeka irau ma merama ukakuba ibake emuae ba wake we dakaisake meomao mane weaisa. Emenu ararae oi mane mufisane ibake Godinu irau wake mane weaisa. I oroubairo ama awaawa da ania. ⁶Abo mi dawae eraerabusa keuwere mi? Ainama urane rarane mero Godi mane imukada irauaiai ibakuie dawa eraerabusa keuwere mi ari eno. ⁷Iyanu amaemukuma iya doisaro yewa orofaroma eraerabusa waureroma fare da uisiba nono iya feafeisiie eraerabusa da waure anifeisi. ⁸Iyabairo urunaini okone yabeke ukeka wauini ibifekuie moi eraerabusa da yodia ufeke ie iduaya wefeisi. ⁹Moi orouma emenu ararae oi daiwere mufisane ibake meramawere ukaisa. Emenu meramawere ukekama emenu imuka ma merama ukakuba ibake i orouma meramawere imukaisake me sarawere ukaisaba ibake i feare dakaku inaaro anifeisake iro me ibene ibene ibifeisa. ¹⁰Anu arara oi mane mufane ufakuie i oi muneka araranu ukekae i meramawere ukeka yaisinanu ubi. Moi orounu ararae oi muneka maneba ibake emenu Godi imukeka imuke medaisa. Emuae eno ukaisaba warima abu yanakeibaku i ari emenu ba me merama ukeka ima emenu imukaro yanakeibaku ibake imuka merama mane imukeibaisa.

I wirokeka mamenewaa ua wei wake

¹¹Dimodi, ae Godinu amaraya i meramawere ukekabairoma durame aniake irauaiai ukeka mane uake Godi imukada Dawa ari eno siake eme moibake imukari uyanake emenu imusu imusu ukeka sineka da imuake dino da ua. ¹²Anu imukeka daiwere sifiro seidanini aine wai ure uraneka ari ukeibia. Ama emebairo nae Godi imukakunea wei ibake Godima abairo me ibene ibene ibeka mamine we mune odiai. Enoya i me ibene ibene ibeka mamenewaa ua. ^13-14Godima eno weaku ibake i eraerabusa yaisina me ibinu. Yesu Kerisoma Fonidia Faeradibairo enare ibaada ia iyare dauike Dawae ba wake wei. Nae i Godini Yesu Kerisonu ibooro enare ibaada abake wake bunawereroma eno weakune, Godinu we iifa ukeka wake yewadoma Yesu Kerisonu fafeku odoroma ukenewaa ukeifaro emema erefisake abake merama wake da wefisane ibake weakune. ¹⁵Iyanu buna Godi, Dawae i Kini orounu Kini, Dawae i dai orou yaisinanu Dai Waria Mi. Danu we odi odo fafekuro Dawama Yesu Keriso ureroma we odaifekuro isare aafekuro iya yaisina Dawa efeisi. ¹⁶Iyanu Godi Dawae amae me. Dawabairo ubi me, Dawabairo risi me. Enoba Dawae me ibe aarakuba Dawa da feafeku. Danu meninoke eno ibinu. Godi Dawae edorowerero ibinu. I edoroe daiwere ibake emema iro ane dakaisake Godi ere dakaisa. Yewa Godinu ibi we ma daiwere ukeifero Dawama iya me ibene ibene yawokeimine ibake yewa wake abairo weakune.

Eraerabusa keuwere bobo orounu wake

¹⁷I eraerabusa keuwere bobo oroubairo wake eno wefaro naufisane weakune. Eraerabusa keuwere bobo orou fukeru da uaweke i awoena ibinu oi wairo me sifeku ibake i da imuaweke Godi Dawa i eraerabusa yaisina makakuniro munaisi enoya Godi mane imuawe. ¹⁸I orouma irauaiai ufisane weakune. Emenu irauaiai ukekae i ari eno ufisa, eraerabusae i erabusa me oroubairo naka naka ufisane weakune. ¹⁹Emua eno ufeisaie emenu dubuena kai fafeku odoro sabu uke bou ufeisake i ba ibeka i dawa i me ibene ibene ibeka mufeisa ibake eno wearo naufisake enaenari ufisa.

Anu waiya erenewaa ukaada ukeibia wei wake

^20-21Dimodi, nanu wake naua! Godima abairo maiyai i waiyaini Danu irau wake weekaini i eraerabusa yaisina yawokenewaa ufane ibake weakune. Moi orouma Godinu wake mero imusu wake imusu imusu weaisake ie baya imukada eno weaisa. I orouma eno weada Godi medaisa. Godinu irau wake da ma merama ufane ibake weakune. Godinu imuka abairo ibifiro Godima a irauaiai unu koreifine ibake weakune. Nanu wake idua me sininu.