1 Dioni

DIONINU BOKAI OWAOWA

Godinu me ibene ibene ibeka wake

¹Yesu Kerisobake ba Dawa Godinu amaraya wefene ibake yewa owaowa yanake odaisi. Enoya iyanu wake ma iwoka ufero eawe. Adinami nauwaro Godima ureini doo ubu uke me, i furo Yesu Dawa ibeibi. Dawa ibeebe nono iroma ba eme sini. I ba Eme Sini Mi Danu wake iyama nauke Dawa ere, Dawa wanama ure burise ere, eno ukeibisi ibake Dawae Godinu me ibene ibene ibeka wake we ma boroo yari enoba Danu wake iyama yabairo weaisi. ²Dawae i me ibene ibene ibekanu ubi. Enoba i me ibene ibene ibekanu ubiye Ba Eme Siniro iyama Dawa ekike nono i wake iyama yabairo we ma boroo yaraisi. I me ibene ibene ibekanu ubiye Godibairo ibeebe nono Ba Eme Siniro iyanu naisama Dawa eki. ³Dawa ekike Danu wake nauisi ibake nono yabairo wefero yama naufone weaisi. Yaini iyaini demuiro Godibairo awaawa uke makafene ibake weaisi. ⁴Iyama Godini Danu Amaraini awaawa demuiro uke makanaisi, i ari enoe ya eme yaisina iyaini Godini Yesu Kerisobairo awaawa uke makafeisi. Yaini iyaini rooro ukenewaa ufene ibake yewa owaowa yanake odaisi.

Iya yaisina edororo eneifene wei wake

^5-7Yesuma yewa wake weiro nauisike ibake yabairo nono eno weaisi, Godi Dawae edoro ari eno. Dawabairo merama ukeka sineka ibe me. Nono iyama Godini awaawa uke makanaisia weadama nono meramawere ukaisiie iya dumuro enaadama meo weaisi. Godi Dawa merama uke dakaku ibake edororo ibinuba nono iyama merama daukaisiie Danu edororo enaada Dawaini awaawa ba demuiro ukaisi. Eno ukaisiro Godinu Amara Yesu Kerisoma iyabake fearike Danu iwama iyanu merama ukeka sineka yaisina urokakuke mune imuke medaku.

⁸Iyanu imuka ubarenaro merama ibe meya weaisiie iyanu onarou meo weada ibake ba wake iya iwoka me. ⁹Iyanu merama ukeka Dawabairo weforafeisiie Godi Danu aneme weakuie enaenari ukakuke i weakubai yaisina enaenari gienabu mane ukenewaa ukakuba ibake Dawama iyanu merama yaisina mufekuke imuke medaada nono i ba me ukeka urokeifekuro me amearubu mane ibifeisi. ¹⁰Godima eno wei, eme yaisina merama ukaisaya weiroma nono iyae merama uke meya wefeisiie Godi Dawa meo weakua wefeisi. Eno weadae Danu wake da imufeisiro Danu wake iyabairo da ibifeku.

Yesu Keriso Dawae iya unu koreka miya wei wake

¹Nanu amara aruma ya merama da ufone ibake yewa wake owaowa yanake odakune. Nono ainama ba me ufekuie Godini iyaini iyanu abanaro enare wake weeka mi ibinu, Dawae i gienabu ukaku mi Yesu Keriso. Dawae iyabairoma Godibairo wake yoya uke weibaku. ²Enoba Godima iyanu merama ukekabake dino uiba ibake Yesu Kerisoma i dino uibai ma oa ufike iyanu merama ukeka mufike imuke medifine ibake iyanu inimu Dawama waurike feari. Nono iyanu ba me ukaisi i mane mero i doo baruna ure baruna eme aweka yaisina emenu ba me merama ukeka eraada mune imusu odifine ibake feari.

³Godinu we iifa ukeka wake naukaisike ukaisiie iya iwoka Dawa imukenewaa ukaisi. ⁴Nono ainama na Godi iwoka sinakunea eno wefekuke nono Godinu wake da naufekuie i mi dawae meo bobo miro nono dawabairo i ba irau wake ibe me. ⁵Nono ainama Godinu wake naukakuie iya eno iwoka sinaisi, dawae ba Godi imukada emeini imukari ukenewaa ukaku. I ari enoe iyama enaenari ukaisiie iyae Godinu orou sinaisi ibake iya iwoka sinaisi. ⁶Ainama nae Godibairo ibinea wefekuie Yesunu ukeka sineka enaenari ufine ibake weakune.

Ainama danu naiyemukubake imukari ukakuie dawa Godinu edororo ibinu wake

⁷Nanu amara aruma, yabake awoena buna wake owaowa yanake ode dakakune. Enoba yewa buna wake adinaroma yabairo ibinu. Yewa buna wake ya adinaro nauisa. ⁸Enoba yewae awoena darawadu wake ari nono owaowa yanake odakune. I darawadu wakenu ba ubiye iyanu iyanu imukari uke makanaisi. I imukari ukekae Yesu Kerisobairo ekike nono awoena yabairo eraisi. Enoba iyanu merama ukaisi odo i dumu ari eno idua me sifine uiro Yesu fari ibake i edoro idua awoena farinu.

⁹Ainama na Godinu edororo enakunea weadama nono danu naiyebake imuka ka ukakuie dawa dumuro ibinu mi. ¹⁰Ainama danu naiyebake imukari daiwere ukakuie dawa Godinu edororo enarenewaa ukaada ibake dawa arara me merama ukeka ibake meramawere uke dakaku. ¹¹Nono ainama i merama imuka imukada danu naiyebake imuka ka ufekuie dawabairo dumu mane sine ibinuba ibake i dumuro enakuro dumuma danu naisa dadau ukaku ibake i Godibairo aneka daaba ma nuna ukaku.

¹²Nanu amara aruma, Godima Yesu iyabake ma’iro iyanu merama ukeka sineka mune imuke medakuba ibake na Dioni nama yabake owaowa yanake odakune. ¹³Ya dai orouma Yesu Keriso i adinami nauwaroma ibinu mi iwoka ukaisa ibake yabairo yewa owaowa yanake odakune. Enoba ya nono awoena orouma i merama ukeka mi ma bereisa ibake na Dioni nama yabake yewa owaowa yanake odakune. ¹⁴Ya amarananakuini aruarumananakuini yama Babae Godi iwoka sinaisa ibake na Dioni nama yabake yewa owaowa yanake odakune. Ya dai orouma i adinaroma ibeibike nono awoena iini ibinu Mi iwoka sinaisa ibake nama yewa owaowa yanake odakune. Ya awoena orouma buna uisake i merama ukaku mi ma bereisa ibake Godinu wake yanu imuka ubarenaro ibinu enoba nama yabake yewa owaowa yanake odakune.

Iyanu imukeka yaisina yewa dooro mane da odifene wei wake

¹⁵Yewa dooro meramawere eraerabusa da imuawe. Ainama yewa dooro meramawere eraerabusa imuka mane imukenewaa ufekuie dawa Godi imukenewaa da ufeku. ¹⁶Enoba yewa doonu imukekae eno, irau erabusa eraisake emenu arara mufisane ukaisa i ari eno anu naiyenu awekanu umuro anekaini nono eraerabusa daiwere muneka ie yewa doonu imukekaro nono ie Godinu imukeka me. ¹⁷Enoba yewa dooini danu merama eraerabusaini i yaisina me sifekuro nono Godinu imukeka ari eno imukaisa i orou mane me ibene ibene ibifeisa.

Yesu Kerisoini wasai ukaisa oroubake wei wake

¹⁸Nanu amara aruma, i dubuena kai odo idua fafine ukakuro nono i wasai kerisonu fareka wakeye ya yaisina nauisa. Enoba awoenae wasai keriso keuwere faraisaba nono i dubuena kai odoe idua fafine ukakuro iya yaisina ibai iwoka sinaisi. ¹⁹I wasai keriso emua iyabairo iya Godinu wake naukeka orouini demuiro ku uke ibeebe nono iroma iya mediisa ibake i oroue Godinu wake adaadake nauke dakaisa orou eme yaisina ibai emua iwoka sinaisa. Enoba emuae imusu orouro nono emuae Godinu wake naukeka orou me. I oroue Godinu wake naukeka orou meba ibake iyabairoma yabairo aafeisaie emenu wake da nauawe. I orou iyanu wake naukeka orouronae iyabairo ibifisane emua iyanu orou me ibake anisaro ibai yama iwoka sinaisaya emenu wake da nauawe. ²⁰Yae i orou ari eno me. Godinu Imumu Irauma yabairo isare aarike ibinuba ibake yae ba Godinu irau wake mane iwoka sinaisa. ²¹Yae ba Godinu wake ma nuna ukaisaba ibake Godinu wake yaisina iwoka sinaisa? Ie ya iwoka sinaisake nono Godi imukenewaa ukaisa. Ie meo me i dawa ba ya iwoka sinaisaroma nono nama Godinu wake duboro owaowa yanake odakune.

^22-23Ainadei dawa meo bobo mi? Ainama Yesu Dawa i Keriso meya wefekuie i mi dawama Godinu wake meomao weada eneifeku mi dawa iduaya danu wake da nauawe. I mima eno ufekuie dawa Babae Godini Danu Amaraini Emenu wake da naufeku ibake dawa wasai keriso iduaya weawe. Nono aina mima Godinu Amara na imukakunea weakuie dawa Godi ba imukada ibake eno weaku.

Godinu Imumu Irauma yabake ba wake we ma iwoka ukakune wake

²⁴Enoba yanu bokai nauisa wake mune imukaro odiaweke imukenewaa uawe. I Godinu wake yanu imukaro ibenewaa ufekuie yaini Godinu Amara Yesu Kerisoini Godini demuiro ibifoisa. ²⁵Enoba Yesuma i me ibene ibene ibeka yabairo mafiane eno we bou ui. ²⁶I Godinu wake meo weeka oroubake nono nama ya we iifa umiane ibake yewa owaowa yanake odakuneba idua me sininu. ²⁷Godima Danu Imumu Irau we odairo yabairo isare aarike ibinuba ibake moi orouma ya da we ma iwoka ufiakaisa. Inu ubiye Godinu Imumu Irauma ya yaisinabairo meo we mero ba mane we ma iwoka ukakune. Eno uke we ma iwoka ukakuneba ibake Dawabairo ibenewaa ufone weakune. ²⁸Nanu amara aruma ya Yesubairo ibenewaa uforo Yesu fareifiro maru da sifoke ia da sifoke Danu fareifeku odoro Danu ibooro gienabu enafone ibake weakune. ²⁹Yesu Keriso Dawae irauaiai Mi iduaba ibake aina ainama irauaiai ukaisa orou emuae Godinu amara aruma sine ibeibaisa.

Awoena iyae Godinu amara arumaya wei wake

¹I Godima iyabake imukari daiwere ukenewaa ukakuke iyabake yae Nanu amara arumaya eno weaku ibake iya Danu amara aruma sine ibaisi. I weakubai imuke eawe. I orofa akaka orou Godinu wake nauke me orou emuae Godi iwoka me ibake iyaini iini ma nuna ukakunisa. ²Nanu orou yabake yewa wake weakune. Awoenae yaini naini iyae Godinu amara aruma sine ibinisikema nono dubuenaroe anemerabu ari sifeisi ibai yaini naini iya iwoka me. Nono dubuenaroe Yesu fafekuie Dawa eraada Dawa ari sifeisi. ³Iduaba ainama na Yesu Keriso ari simaua eno imukakuie dawa arara me merama ukeka. Ibake danu ararae Yesunu weeka ukeka mane ufine ibake Yesunu imukaku ari eno irauaiai imukenewaa ukaada danu merama ukeka medifine imukeibaku.

⁴Nono ainama ba me ukeibakuie dawa Godinu darawadu wake ma merama ukeibaku. Enoba i meramawere ukekama Godinu darawadu ma merama ukaku. ⁵Yesuma iyanu merama ukaisi ibai mufine ibake Ba Eme Sini. Dawa Ba Eme Sinike merama uke dauike irauaiai mane ibeibi. ⁶Enoba ainama Yesubairo ibakuie dawa merama uke dakeibaku. Nono ainama merama ukeibakuie dawa Yesubairo ibe dakaada dawa Yesu iwoka me ibake eno ukeibaku.

⁷Nanu amara aruma, moi orouma ya we irufiakane fafeisaie emenu wake da nauawe. Ainama irauaiai ukeibakuie dawa irauaiai mi. I danu irau ukekae Yesunu irauaiai ukeibaku i ari eno. ⁸Nono ainama ba me merama ukeibakuie dawa seidaninu amara. Seidanima adinaroma ba me merama uke aareibiro nono i Godinu Amara Yesu Kerisoma emenu ba me merama ukeka mune imuke medifike seidaninu buna ma merama ufine ibake yewa dooro isare aari. ⁹Godima moi mi we munakuke Danu Imumu Irau i minu imuka ubarenaro makakuro ibaku ibake i mi dawa arara me merama ukeka ibake meramawere da ukeibaku. Godima i mi dawa we munaku ibake dawa arara me merama ukeka. ¹⁰Enoba i Godinu orou iya iwoka sinakunekike nono i seidaninu orou emua eno iwoka sinakuneki. Enoba ainama ba me merama ukeibakuie dawa Godinu amara mero nono ainama danu naiyebake imukari uke dakakuie dawa Godinu amara me.

Naiyemukubake imukari ufene wei wake

¹¹Yewa wake wemaro nauawe, yaini naini iyanu iyanu imukari uke makafene wei wake adinaroma naukeibaisi. ¹²Enoba yae i mi Keini ari me. Keini dawae seidaninu miba ibake danu nabue uriro feari. Anemebake danu nabuenu nodo kuuriro feari? Keininu ukekae meramawerero nono danu nabuenu ukeka sinekae irauaiai ibake danu nodo kuuriro feari.

¹³Nanu orou yabake yewa wake weakune. I orofa akakaro Godinu wake nauke dakaisa orouma ya imuka ka uke yareifiakaisaie imuka foria da uawe! ¹⁴Iyanu naiyemukubake imukari ukakunekiba iya feafeisiie i merama orofaro da anifeisike i me ibene ibene ibeka orofaro anifeisi. Nono ainama danu naiyebake imukari uke dakakuie dawa i merama orofa daabaro anaku ibai iya iwoka sinaisi. ¹⁵Nono ainama danu naiyebake imuka ka ukakuie dawa eme ma feareka mi ari eno. Imuke eawe! I eme ma feareka orouma Godibairo me ibene ibene da ibifeisa. ¹⁶Yesu Kerisoma iyabake imukari ukaada isare aarike yewa dooro feari. Yesuma eno ui ibake i imukari ukekanu ubi ibai imukada iwoka sinaisi. Enoba yaini naini iyanu naiyemukubake imukari ukaada emuabake feafeisi. ¹⁷Ainabairo eraerabusa keuwere ibinuro nono moi eraerabusa mero merama mi erakuke imuka ara ukaada moibai make dakakuie Godinu imukari ukeka dawa iwoka me ibake eno ukaku. ¹⁸Nanu amara aruma imukari ukeka wake mane da wefeke nono ba imukari ukenewaa ufene ibake weakune.

I Godinu wake naukeka mima Godinu ibooro ia iyare meya wei wake

¹⁹Iya Godinu waiya ba irauaiaike ukaisiie iya Godinu orou iwoka sinaisiro Godima iya erakuniro Danu ibooro maru uke da ukaisi. ²⁰Yaini naini iyanu imukama iyanu onaroue merama oroua eno we imukaisiie iyanu imukeka okoanakuro nono Godi Dawae daiwere. Godi Dawa yaisina iwoka sinakuke iyabake imukari ukakuke iyanu merama ukaisibai mune imuke medeibaku ibake iyanu imukama ia sine dakaisike Godi imukenewaa ukaisi.

^21-22Nanu orou yabake yewa wake weakune. Yaini naini iyanu imukama iyanu mane iyae merama oroua da we imufeisiie Godibake ia iyare dakaisike Danu weaku wake enaenari ukaisike aneme aneme we nauke eraisiie Dawama iya eraada rooro ukakuke iyanu we nauke eraisi eraerabusa enaenari makakuni. ²³Enoba Godinu weaku wakeye i ari eno, iyanu imuka Danu Amara Yesu Kerisobairo ibifiro Dawa imufeke iyanu iyanu imukari uke makafene ibake Dawae iyabairo we enaenari ukaku. ²⁴Danu weaku wake enaenari ukaisiie iya Dawabairo ibaisiro nono Dawae iyabairo ibaku. Enoba Dawa iyabairo ibinu ibai aneaneme iwoka sifeisi? Dawa Danu Imumu Irau we odairo iyanu imuka ubarenaro isare aare ibinu ibake ibai yaisina iya iwoka sinaisi.

Godinu ba Irau Imumuini seidaninu me sara imumuini emenu wake

¹Nanu orou, nanu imuka yaisina yabairo ibinu enoya yewa wake wemaro nauawe. Moi merama imumu bobo orounu wake da naufone weakune. I orouma eno weaisa, Godinu Imumu Irau iyabairo ibinua weaisaie emua meo weaisa. I wake imuke eawe! I emuabairo ibinu imumu yodia uke eawe. I imumu Godibairoma fariba me ariya i meomao weaisa orou i orofa akaka aboro aboro eno meo we eneibaisaya erenewaa uyakawe. ²Godinu Imumu Irau bobo orou emua aneaneme iwoka sinakuneki? Godinu Imumu Irau bobo orouma eno weaisa, Godinu Amara Yesu Keriso, Dawa ba eme sinia weaisa ibake emenu wakeye Godibairoma fari ibai ya yaisina iwoka sinaisa. ³Enoba Godinu Irau Imumu ibe me orouma eno weaisa, Godinu Amara Yesu Keriso Dawa Ba Eme Sine meya weaisa ibake emenu wakeye Godibairoma fare daui. Enoroma nono i imukekae i wasai kerisonu imukeka. Enoba emema fafeisake wasai kerisonu imukeka wake wefeisaya wenero ya naukisa. I ari enoe i imukeka wake yewa orofaro adinaro weisaro ya nauisa.

⁴Enoya nanu amara aruma, yae Godinu oroubake Godinu wake nauke me we irukeka wake meo weaisa orou ma berekaisa. Enoba i yabairo ibinu Imumu Dawa daiwerero nono emuabairo ibinu imumu dawa okoanaku ibake yama emua ma berekaisa. ⁵I orou emuae yewa orofa orou ibake Godinu wake nauke dakaisa i orouma emenu wake naukaisa. ⁶Nono yaini naini iyae Godinu orou ibake Godinu wake naukaisa orouma iyanu wake naukaisaro nono Godinu wake nauke me orouma iyanu wake nauke dakaisa. I orouma eno ukaisa ibake i Irau Imumu bobo orouini i merama imumu bobo orouini emuae iya iwoka sinaisi.

Godi Dawae imukari ukekanu ubiya wei wake

⁷Nanu orou, yaini naini iyanu iyanu imukari uke makafene ibake weakune. I ba imukari ukeka Godibairoma farinu ibake iyanu iyanu imukari uke makafeisi. Enoba ainama imukari ukakuie dawa Godinu amara ibake dawae Godi iwoka sinaku. ⁸Enoba Godi Dawae imukari ukekanu ubiba ainama eme moibake imukari da ufiakuie dawa Godi iwoka meba ibake dawae Godinu amara me. ⁹Godima Danu Amara iyabake feafiro iya me ibene ibene ibifene ibake Dawa yewa orofaro we odairo isare aari. Godima eno uiie Danu ba imukari ukeka iyabairo idua ma boroo yaraadama ui. ¹⁰Enoba iyama Godibake imukari uke da uisiroma nono Godima iya imukada iyabake imukari ukenewaa ui. Ibake Dawae Danu Amara iyanu merama ukeka sineka yaisina mune medifine ibake Yesu Keriso we odairo yewa dooro isare aari. I dawa ba imukari ukekae idua. ¹¹Nanu orou, Godima iyabake eno imukari ukenewaa uiba ibake yaini naini iyanu iyanu enaenari imukari uke makafene ibake weakune. ¹²Iya eme yaisina Godi ere dakaisikema nono iyanu iyanu imukari uke makanaisiie Godi Dawa iyanu imuka ubarenaro ibinu. Dawa iro ibinuba ibake Danu imukari ukeka imukada iyanu iyanu imukari irauaiai ukenewaa uke makanaisi.

¹³Godima Danu Imumu Irau we odairo yewa dooro isare aare iyabairo ibinu. Ibake iya eno iwoka sinaisi, Godima iyabairo ibinuro nono iyama Dawabairo ibinisi ibai iya iwoka sinaisi. ¹⁴Enoba Godima Danu Amara yewa dooro eme aweka yaisina ma wirofiane ibake we odairo isare aari. Yesu isare aariro iyanu naisama eki ibake nono yabairo ibai weforakaisi. ¹⁵Enoba ainama Yesu Dawa Godinu Amaraya weakuie Godima i minu imuka ubarenaro ibinuro dawa Godibairo ibinu. ¹⁶Enoba Godima iyabake imukari ukakuni ibai iya iwoka sinaada imukenewaa ukaisiro Godima iyabake imukari ukenewaa ukaku. I Dawae i ba imukari ukekanu ubi. Ainama emebake imukari ukakuie dawa Godibairo ibinuro nono Godima danu imuka ubarenaro ibinu.

¹⁷Godima iyanu imuka ubarenaro ibinu ibake Danu imukari ukaku enaenari eme yaisinabake imukari ukenewaa ukaisi. Eno ukaisiba Godinu kodo ureka odo fafekuro Dawabake ia da sifeisi. ¹⁸Yewa orofaro Dawa imukari ukaku ari enoe iyama yaure ibaada enaenari ukaisi ibake Danu kodo odo fafekuro Dawabake ia da sifeisi. Enoba iya ba imukari ukenewaa ukaisiie ia sine dakaisi. I ba imukari ukeka ima i ia sinekabai ma berekaku. Iyama ia sinaadae Godi imukenewaa uke dakaisi ibake ia sinaisi. Enoba Godima iya fanisi mamisiba me ari eno we imukada ibake ia sinaisi. Enoba ainama eno ukakuie dawa Godinu imukari ukeka imukenewaa dakaku. ¹⁹Dawae iyabake Dawako imukari u’iba ibake iyae Dawabake imukari ukaisi. Ibai imukenewaa uawe. ²⁰Ainama na Godibake imukari ukakunea weadama nono danu naiyebake imuka ka ukakuie dawa meo bobo mi. Enoba aneaneme ainama nae Godi ere dakadama Godibake imukari ukakunea wefekukema nono danu naiye eraada imukari uke dafekuie dawa Godibake imukari uke me. ²¹Enoba Yesuma eno bunawereroma weaku, ae Godibake imukari ukaku enaenari anu naiye imukari ua weaku.

Godinu wake naukeka mima yewa doonu merama ukeka sineka ma berekaku wake

¹Ainama Yesu Dawae i Kerisoya eno we imukakuie dawa Godinu amara. Nono ainama Babae Godibake imukari ukakuie Danu amara arumabake enaenari imukari ukaku. ²Enoba iyae Godibake imukari ukaada Danu weaku wake naukaisike ukaisiie Danu oroubake enaenari imukari ukaisi ibai iya iwoka sinaisi. ³Ainama Godibake imukari ukakuie dawa Godinu wake yaisina naukenewaa ukaku. Enoba iyabairo Godinu wakeye inimu me. ⁴Inimu me ibake Godinu we mune odakuro Danu wake naukaisi orou iyama yewa orofanu merama ukeka sineka ma berekaisi. Enoba iyama Yesu Keriso imukenewaa ukaisiie i merama ukeka sineka ma berekaisi. ⁵Enoba ainama Yesu Keriso Dawa Godinu Amaraya eno we imukakuie dawa mane yewa doonu merama ukeka sineka ma berekaku.

Godima Danu Amaranu wake aruro we ma boroo yari wake

⁶Yesu Keriso Dawa yewa orofaro babadaido ufike me ibifiro Danu iwama isafiro feafine ibake isare aari. Enoroma Dawa babadaido mane ufine fare daui. Dawae babadaido ufiro Danu iwa isafine ibake isare aari. Enoba i Godinu Imumu Irauma i Yesubake wake eno weaku. Godinu Imumu Irau Dawa ba ibake ba weaku. ^7-8Yesunu babadaido ukekaini Danu iwa isarekaini nono Godinu Imumu Irauma weaku wakeini i deibuuba emuama i wake demui iyabairo weforakaisake eno we ma boroo yaraisa, Yesu Keriso Dawae Godinu Amaraya eno weaisa. ⁹Enoba iyama emenu weaisa wake naukaisiroma nono Godinu weaku wakeye bunawerero nono emenu weaisa wakeye buna me. Enoba i Godima eno wei, Yesu Keriso Dawa Nanu Amaraya eno wei ibake Danu wei buna wake iya naukenewaa ukaisi. ¹⁰Enoba ainama Godinu Amara Yesu imukenewaa ukakuie Godima Yesu Keriso Nanu Amara ubiya wei wake dawa imukakuro i wake danu imuka ubarenaro ibaku. Enoba ainama Godinu wake nauke dakakuie dawa Godi meo boboya eno weaku. Godima Yesu Keriso Nanu Amaraya weiroma nono aina mima i wake nauke dakakuie Godi Dawa meo boboya eno weaku. ¹¹Godinu wei wake aneme ari eno? Danu wei wakeye eno wei, Nanu Amara ubi yabairo we odaimauro isare aafike yabake feafiro me ibene ibene ibifone ibake weakuneba Nanu wakeye i ari enoya wei. ¹²Ainama Yesu Keriso imukenewaa ukakuie Godinu me ibene ibene ibeka mufeku ibai dawa iwoka sinaku. Enoba ainama Yesu Keriso imukenewaa dakakuie dawa Godinu me ibene ibene ibeka da mufeku.

Iyae wirofeisike me ibene ibene ibeifeisi ibai iya iwoka sinaisia wei wake

¹³Godinu me ibene ibene ibeka yabairo ibinuba imukenewaa ufone ibake ya Godinu wake naukaisa oroubairo yewa owaowa yanake odakune. ¹⁴Iyae Godinu imukeka imukada ibake aneme aneme Dawabairo we nauke eraisiie Dawa naukaku. Ibake i wakenu ubi imukenewaa ukaisi. ¹⁵Enoba Godima iyanu we nauke ereka naukaku ibake Dawa yaisina iyabake makakuni. Enoba ibai iya iwoka sinaisi.

¹⁶Yama eraisaro Godinu moi naukeka mima ba me merama ukakuro eraisaie danu ba me merama ukekae feareka daabaro aneka ari me enoya yama Godibairo guriguri uawero Godima i mi ma wirofi. Nono moi orounu ukekae ba me merama feareka daabaro aneka ari enoba Godibairo guriguri da ufone weakune. ¹⁷I ba me merama ukekae yaisina meramawereya Godima eno weaku. Nono moi ba me merama ukeka Godima mune imuke medifekuke nono moi ba me merama ukekae Godima da mune imuke medifeku. ¹⁸I Godibairoma faraisa orou emua ba me merama uke dakeibaisa. Ibake Godinu Amara Yesu, Dawa Godinu orou unu korakune ibake seidanima i orou wanama ure burise ere dakakune.

¹⁹Iya Godibairoma faki ibai iya iwoka sinaisiroma nono i orofa akakaro Godinu wake nauke me oroue seidanibairo ibinisa. ²⁰Enoba Godinu Amara yewa dooro isare aari Danu ubiye iyabairo iwoka daiwere mamiro Dawa iwoka sifene ibake isare aari. Nono iyae i Ba Eme Sini Mi Godinu Amara Yesu Kerisobairo ibinisi. Enoba yewa Yesu Keriso Dawae ba Godi. Nono yewa wirokekae me ibene ibene ibeka. Ibai iya yaisina iwoka sinaisi.

²¹Nanu amara aruma, i ba me godi mediawe. Nanu wake idua me sininu.